Yezaya 20:1-6
-
Kidimbu sambu na Ezipte mpi Etiopia (1-6)
20 Na mvula yina ntotila Sargoni ya Asiria tindaka Tartani* na Ashdodi,+ yandi nwanaka ti Ashdodi mpi botulaka yo.+
2 Na ntangu yina, Yehowa tubaka na nzila ya Yezaya+ mwana ya Amozi nde: “Kwenda, katula saki na luketo na nge mpi katula basandale na makulu na nge.” Mpi yandi salaka mutindu yina, yandi tambulaka kinkonga* mpi makulu-ngulu.
3 Ebuna Yehowa tubaka nde: “Kaka mutindu nsadi na mono Yezaya me tambula kinkonga mpi makulu-ngulu bamvula tatu bonso kidimbu+ mpi lukebisu sambu na Ezipte+ ti Etiopia,+
4 mutindu mosi mpi ntotila ya Asiria ta nata bampika ya Ezipte+ mpi bantu ya Etiopia ya bo me nataka na insi ya nkaka, bana-babakala ti minunu; yandi ta nata bo kinkonga mpi makulu-ngulu, mpi nsi ya luketo* ya kukonda kufika, kinkonga* ya Ezipte.
5 Ebuna bo ta wa boma ya ngolo mpi bo ta wa nsoni sambu na Etiopia kivuvu na bo, mpi sambu na Ezipte lulendo na bo.*
6 Na kilumbu yina, bantu ya insi yina kele na lweka ya nzadi-mungwa ta tuba nde, ‘Tala mambu yina me bwila kivuvu na beto, kisika ya beto tinaka sambu na kusosa lusadisu mpi luguluku na maboko ya ntotila ya Asiria! Inki mutindu beto ta tina ntangu yai?’”
Banoti na nsi ya lutiti
^ To “komanda.”
^ To “ti bilele ya kati.”
^ Na kisina, “mataku.”
^ To “nsoni.”
^ To “yina bo sepelaka ti kitoko na yandi.”
