Yezaya 14:1-32

  • Izraele ta zinga na insi na yo mosi (1, 2)

  • Bo me sosila ntotila ya Babilone (3-23)

    • Muntu ya ke pesaka nsemo ta katuka na zulu mpi ta bwa (12)

  • Diboko ya Yehowa ta bedisa muntu ya Asiria (24-27)

  • Nsangu sambu na Filistia (28-32)

14  Sambu Yehowa ta wila Yakobi+ mawa, mpi yandi ta sola diaka Izraele.+ Yandi ta tula bo* na insi na bo,+ ebuna banzenza ta kwisa kukuta bo mpi ta kangama ti nzo ya Yakobi.+  Bantu ta baka bo mpi ta nata bo na kisika na bo mosi, ebuna nzo ya Izraele ta baka bo bonso bansadi ya babakala mpi ya bankento+ na insi ya Yehowa; bo ta kanga bantu yina nataka bo na kimpika, mpi bo ta yala bantu yina vandaka kupusa bo na kusala kisalu.*  Kilumbu yina Yehowa ta pemisa nge na mpasi na nge, na mambu ya ke yangisa nge mpi na kimpika ya ngolo yina bo tulaka nge,+  nge ta tuba kingana* yai na ndinga ya ngolo sambu na ntotila ya Babilone: “A mutindu muntu yina vandaka kupusa bankaka na kusala kisalu* me suka! A mutindu kuniokwama me suka!+   Yehowa me buka nti ya bantu ya mbi,Nti ya bamfumu,+   Muntu yina vandaka kubula bantu makofi na nganzi yonso kukonda kuyambula,+Muntu yina vandaka kuyala makanda na makasi yonso kukonda kulemba mpi kumonisa yo mpasi.+   Ntangu yai, ntoto ya mvimba me pema, yo me kuma na ngemba. Bantu ke tula milolo ya kiese.+   Ata banti ya yenevriye kele na kiese sambu na ngeKumosi ti banti ya sedre ya Libani. Yo ke tuba nde: ‘Katuka ntangu nge me bwaka,Ata muntu mosi ve ya ke zengaka banti ke kwisa sambu na kuzenga beto.’   Ata Maziamu* na nsi ya ntoto me nikanaSambu na kuyamba nge ntangu nge me kwisa. Sambu na nge, yo me tedimisa bantu yina me konda ngolo na lufwa,Bantwadisi yonso* ya ntoto yina vandaka kuniokula bantu. Yo me sala nde bantotila yonso ya makanda kutelama na bakiti na bo ya kimfumu. 10  Bo yonso ke tuba mpi ke songa nge nde,‘Keti nge mpi me lemba bonso beto? Keti nge me kuma bonso beto? 11  Bo me kulumusa lulendo na nge na Maziamu,*Makelele ya bima na nge ya kubudila miziki.+ Mikuni me tandama na nsi na nge bonso mbeto,Mpi misopi kele lele na nge ya kufika.’ 12  A mutindu nge me katuka na zulu mpi me bwa,O muntu ya ke pesaka nsemo, mwana-bakala ya suka! A mutindu bo me zenga nge mpi me bwisa nge na ntoto,Nge muntu yina bedisaka makanda!+ 13  Nge tubaka na ntima na nge nde, ‘Mono ta tombuka na zulu.+ Mono ta tombula kiti na mono ya kimfumu+ na zulu ya bambwetete ya Nzambi,Mpi mono ta vanda na zulu ya ngumba ya lukutakanu,Na bisika ya kuluta ntama ya nordi.+ 14  Mono ta tombuka na zulu ya matuti;Mono ta sala na mpila nde mono kuma kiteso mosi ti Muntu ya Kuluta Zulu.’ 15  Kansi, bo ta kulumusa nge na Maziamu,*Na bisika ya kuluta ntama ya Dibulu. 16  Bantu yina ke mona nge ta tala nge;Bo ta tala nge mbote-mbote, mpi ta tuba nde,‘Keti yai muntu yina vandaka kunikisa ntoto,Yina salaka nde bimfumu kutekita,+ 17  Yina kumisaka ntoto bonso ntoto-makangaMpi bwisaka bambanza na yo,+Yina buyaka kuyambula bantu na yandi ya boloko na kukwenda na nzo?’+ 18  Bantotila yonso ya nkaka ya makanda,Ee, bo yonso, ke lala na nkembo,Konso muntu na maziamu* na yandi mosi. 19  Kansi bo me losa nge kukonda maziamu,Bonso kimenina* ya bo me mengaka,Nge me lwata bamvumbi yina bo me fwaka na mbele ya bitumba,Bayina ke kulumuka tii na matadi ya dibulu mosi,Bonso mvumbi yina bo ke niata-niata na nsi ya makulu. 20  Bo ta zika nge ve ti bo,Sambu nge fwaka insi na nge mosi,Nge fwaka bantu na nge mosi. Bo ta bingaka diaka ve ata fioti bazina ya bana ya bantu ya ke salaka mambi. 21  Beno yilama sambu na kufwa bana na yandi ya babakalaSambu na kifu ya ba-nkaka na bo,Mpidina bo ta telama ve sambu na kubaka ntotoMpi kufulusa insi ti bambanza na bo.” 22  “Mono ta telama sambu na kunwanisa bo,”+ Yehowa ya makesa muntu me tuba. “Mpi mono ta katula kimakulu na Babilone zina, bantu yina ta bikala, bana mpi bantu yina ta kwisa na nima,”+ Yehowa muntu me tuba. 23  “Mpi mono ta kumisa yandi nzo ya bampuku* mpi kisika ya biziba, ebuna mono ta komba yandi ti kikombo ya lufwa,”+ Yehowa ya makesa muntu me tuba. 24  Yehowa ya makesa me zenga kieleka nde:“Kaka mutindu mono kanaka, yo ta salama mutindu yina, Kaka mutindu mono bakaka lukanu, yo ta lungana mpi mutindu yina. 25  Mono ta bedisa muntu ya Asiria na insi na mono,Mpi mono ta niata-niata yandi na bangumba na mono.+ Bo ta katula vangu na yandi na maboko na bo,Mpi bo ta katula kilo na yandi na dipeka na bo.”+ 26  Yai kele lukanu ya bo me baka* sambu na kunwanisa ntoto ya mvimba,Mpi yai kele diboko yina kele ya kutandula sambu na kunwanisa* makanda yonso. 27  Sambu Yehowa ya makesa me baka lukanu,Nani lenda kanga yo nzila?+ Diboko na yandi kele ya kutandula,Nani lenda konika yo?+ 28  Na mvula yina ntotila Ahazi fwaka,+ bo pesaka nsangu yai: 29  “Filistia, ata muntu na nge mosi ve kuwa kiese,Kaka sambu fimbu ya muntu yina ke bula nge me bukana. Sambu nioka ya ndikila+ ta basika na musisa ya nioka,+Mpi mwana na yo ta vanda nioka ya ke pumbukaka mpi ya ke basisaka tiya.* 30  Ntangu mwana ya ntete ya muntu ya kukonda mfunu ta dia,Mpi nsukami ta lala na ngemba,Mono ta fwa musisa na nge na nzala,Mpi yina ta bikala na nge ta fwa.+ 31  Dila, O kielo! Boka, O mbanza! Beno yonso ta lemba nitu, O Filistia! Sambu midinga ke katuka na ndambu ya nordi,Mpi bantu ya ke kwendaka malembe-malembe kele ve na bandonga na yandi.” 32  Inki mvutu bo fwete pesa binati-nsangu ya dikanda? Nde Yehowa me tula fondasio ya Sioni,+Mpi nde bantu ya kukonda mfunu yina kele na kati ya bantu na yandi ta tina na yandi.

Banoti na nsi ya lutiti

To “ta pesa bo ngemba.”
To “bamfumu na bo ya kisalu.”
To “masota.”
To “A mfumu ya kisalu.”
To “Sheole,” disongidila, maziamu ya bantu yonso. Tala Bantendula ya Bangogo.
Na kisina, “Bankombo yonso ya babakala.”
To “Sheole,” disongidila, maziamu ya bantu yonso. Tala Bantendula ya Bangogo.
To “Sheole,” disongidila, maziamu ya bantu yonso. Tala Bantendula ya Bangogo.
Na kisina, “nzo.”
To “lutangu.”
To “baporkepiki.”
Na kisina, “ndongisila ya bo me pesa.”
To “yina kele ya kuyilama sambu na kubula.”
To “nioka yina kele ti ndikila mpi ya ke tambulaka ntinu.”