Yeremia 8:1-22

  • Bantu me sola kuzinga bonso bantu ya makanda (1-7)

  • Inki mayele kele kana muntu kubuya ndinga ya Yehowa? (8-17)

  • Yeremia ke dila sambu na lufwa ya Yuda (18-22)

    • “Keti balsami kele ve na Gileadi?” (22)

8  Yehowa me tuba nde: “Na ntangu yina, mikwa ya bantotila ya Yuda, mikwa ya bamfumu na yo, mikwa ya banganga-nzambi, mikwa ya bambikudi, mpi mikwa ya bantu ya Yeruzalemi, bo ta basisa yo na maziamu na bo.  Bo ta tanda yo na ntangu, na ngonda, mpi na makesa yonso ya zulu yina bo zolaka, bo sadilaka, bo landaka, bo sosaka, mpi bo fukiminaka.+ Bo ta vukisa yo ve, mpi bo ta zika yo ve. Yo ta kuma bonso nsasa na zulu ya ntoto.”+  “Mpi bantu ya dikanda yai ya mbi yina ta bikala, bayina ta guluka ta sola lufwa na kisika ya kusola luzingu na bisika yonso yina mono ke panza bo,” Yehowa ya makesa muntu me tuba.  “Mpi nge fwete tubila bo nde, ‘Yehowa ke tuba nde: “Keti bo ta bwa mpi ta telama diaka ve? Kana muntu mosi kuvutuka, keti muntu ya nkaka ta vutuka mpi ve?   Sambu na nki bantu yai, Yeruzalemi, ke landa kusala mambu ya kukonda kwikama na ntwala na mono? Bo me kangama ngolo na luvunu;Bo ke buya kuvutuka.+   Mono tulaka dikebi mpi landaka kuwa, kansi mutindu bo vandaka kutuba vandaka mbote ve. Muntu mosi ve balulaka ntima na mambi na yandi to yulaka nde, ‘Inki mono me sala?’+ Konso muntu ke landa kuvutuka na nzila ya bantu yonso, bonso mpunda yina ke kwenda ntinu na bitumba.   Ata mubila na zulu ke zabaka bansungi na yo;*Diyembe, ti ndeke ya bo ke bingaka martine mpi nzwanzu* ke zitisaka ntangu na yo ya kuvutuka.* Kansi bantu na mono ke bakisa ve lusambisu ya Yehowa.”’+   ‘Inki mutindu beno lenda tuba nde: “Beto kele mayele, mpi beto kele ti nsiku* ya Yehowa”? Sambu ya kieleka, bo me sadila kilapi ya luvunu+ ya bansekudi* kaka sambu na mambu ya luvunu.   Bo me pesa bantu ya mayele nsoni.+ Bo me wa boma ya ngolo mpi bo ta kanga bo. Tala! Bo me buya ndinga ya Yehowa,Mpi nki mayele bo kele na yo? 10  Yo yina mono ta pesa bankento na bo na babakala ya nkaka,Bilanga na bo na bantu ya nkaka;+Sambu yantika na muntu ya kukonda mfunu tii na muntu ya mfunu mingi, konso muntu ke baka luta na banzila ya luvunu;+Yantika na mbikudi tii na nganga-nzambi, konso muntu ke sadila luvunu.+ 11  Mpi bo ke meka kubelula na zulu-zulu kubukana ya mwana-nkento ya bantu na mono, bo ke tuba nde,“Ngemba kele! Ngemba kele!” Kansi ngemba kele ve.+ 12  Keti bo ke wa nsoni sambu na mambu ya nzanzi ya bo me sala? Bo ke wa ve nsoni ata fioti! Bo me zaba nkutu ve mutindu bo ke waka nsoni!+ Yo yina bo ta bwa na kati ya bantu yina me bwaka. Ntangu mono ta pesa bo ndola, bo ta bula sakuba,’+ Yehowa muntu me tuba. 13  ‘Ntangu mono ke vukisa bo, mono ta sukisa bo,’ Yehowa muntu me tuba. ‘Ata kisuka mosi ve ta bika- la na nti ya vinu, mbuma mosi ve ya fige ta bikala na nti ya bafige, mpi matiti ta yuma. Mpi bima yina mono pesaka bo ta vila.’” 14  “Sambu na nki beto me vanda awa? Bika beto vukana mpi beto kota na bambanza ya ngolo+ ebuna beto fwa kuna. Sambu Yehowa Nzambi na beto ta fwa beto,Mpi yandi ke pesa beto masa ya ndikila sambu beto nwa,+Sambu beto me sala masumu na ntwala ya Yehowa. 15  Beto vandaka kuvingila ngemba, kansi kima mosi ve ya mbote kwisaka,Beto vandaka kuvingila ntangu ya kubeluka, kansi boma ya ngolo kele!+ 16  Katuka na Dani, bo ke wa makelele ya bampunda na yandi. Ntangu makelele ya kudila ya bampunda na yandi ke wakana,Ntoto ya mvimba ke nikana. Bo ke kota mpi ke fwa insi mpi ke dia bima yonso yina kele na kati na yo,Mbanza ti bantu na yo.” 17  “Sambu tala, mono ke tinda banioka na kati na beno,Banioka ya ndikila yina bo lenda lembika ve,Mpi bo ta tatika beno kibeni,” Yehowa muntu me tuba. 18  Bo lenda manisa ve mawa na mono;Ntima na mono ke bela. 19  Katuka na insi mosi ya ntama, bo ke wa kudila yina mwana-nkento ya bantu na monoKe dila sambu na kulomba lusadisu: “Keti Yehowa kele ve na Sioni? To keti ntotila na yo kele ve na kati na yo?” “Sambu na nki bo me pesa mono makasi ti biteki na bo,Ti banzambi na bo ya nzenza ya kukonda mfunu?” 20  “Nsungi ya kukatula bima na bilanga me luta, nsungi ya mvula me mana,Kansi beto me gulukaka ve!” 21  Mono ke niokwama sambu na mpasi ya mwana-nkento ya bantu na mono;+Mono kele na mawa. Boma ya ngolo me simba mono. 22  Keti balsami* kele ve na Gileadi?+ To keti muntu ya ke belulaka* kele ve kuna?+ Sambu na nki mwana-nkento ya bantu na mono me belukaka ve?+

Banoti na nsi ya lutiti

To “bantangu na yo ya bo me tulaka.”
To mbala ya nkaka, “ndeke ya bangombe.”
To “ntangu na yo ya kusala nzietelo.”
To “malongi.”
To “basekretere.”
To “pomade ya ke lembikaka.”
To “munganga.”