Yeremia 52:1-34

  • Sidikiya me kolamina Babilone (1-3)

  • Nebukadenezare me ziunga Yeruzalemi (4-11)

  • Bo me fwa mbanza mpi tempelo (12-23)

  • Bo me nata bantu na kimpika na Babilone (24-30)

  • Bo me basisa Yehoyakini na boloko (31-34)

52  Sidikiya+ vandaka ti bamvula 21 ntangu yandi kumaka ntotila, mpi yandi yalaka bamvula 11 na Yeruzalemi. Zina ya mama na yandi Amutale+ mwana ya Yeremia muntu ya Libna.  Yandi landaka kusala mambu ya mbi na meso ya Yehowa, na kuwakana ti mambu yonso yina Yehoyakimi salaka.+  Mambu yai salamaka na Yeruzalemi mpi na Yuda sambu Yehowa waka makasi, tii kuna yandi kulaka bo na meso na yandi.+ Ebuna Sidikiya kolamaka na ntotila ya Babilone.+  Na mvula ya uvwa ya luyalu ya Sidikiya, na ngonda ya kumi, na kilumbu ya kumi ya ngonda, Nebukadenezare* ntotila ya Babilone kwisaka ti basoda na yandi yonso sambu na kunwanisa Yeruzalemi. Bo tulaka camp sambu na kunwanisa yo mpi bo tungaka kibaka na nziunga na yo.+  Mpi bo ziungaka mbanza yina tii na mvula ya 11 ya ntotila Sidikiya.  Na ngonda ya iya, na kilumbu ya uvwa ya ngonda,+ nzala vandaka ngolo na mbanza, mpi bantu ya insi+ vandaka ve ti madia.  Nsuka-nsuka, bo tobulaka kibaka ya mbanza, mpi basoda yonso tinaka na mpimpa na nzila ya kielo yina vandaka na kati-kati ya bibaka zole yina vandaka pene-pene ya masamba ya ntotila, mpi bantu ya Kaldea ziungaka mbanza; ebuna bo landaka kukwenda na nzila ya Araba.+  Kansi basoda ya Kaldea landaka ntotila, mpi bo kangaka Sidikiya+ na ntoto ya zelo na zelo ya Yeriko, ebuna basoda na yandi yonso panzanaka mpi tinaka yandi.  Na nima bo kangaka ntotila, bo nataka yandi na ntotila ya Babilone na Ribla na insi ya Amati, mpi yandi zengilaka yandi nkanu. 10  Ebuna ntotila ya Babilone fwaka bana ya Sidikiya na meso na yandi, yandi fwaka mpi bamfumu yonso ya Yuda kuna na Ribla. 11  Ebuna ntotila ya Babilone tobulaka Sidikiya meso,+ kangisaka yandi miniololo ya kwivre, nataka yandi na Babilone, mpi tulaka yandi na boloko tii na kilumbu yina yandi fwaka. 12  Na ngonda ya tanu, na kilumbu ya kumi ya ngonda, disongidila, na mvula ya 19 ya ntotila Nebukadenezare* ntotila ya Babilone, Nebuzaradani mfumu ya bantu yina ke taninaka ntotila, yina vandaka nsadi ya ntotila ya Babilone, kotaka na Yeruzalemi.+ 13  Yandi yokaka nzo ya Yehowa,+ nzo ya ntotila, mpi banzo yonso ya Yeruzalemi tiya; yandi yokaka mpi banzo yonso ya nene tiya. 14  Mpi basoda yonso ya Kaldea yina vandaka ti mfumu ya bantu yina ke taninaka ntotila+ bwisaka bibaka yina vandaka kuziunga Yeruzalemi. 15  Nebuzaradani mfumu ya bantu yina ke taninaka ntotila nataka bantu ya nkaka ya kukonda mfunu mpi bantu yina bikalaka na mbanza na insi ya nkaka. Yandi nataka mpi bantu yina tinaka mpi kwendaka na ntotila ya Babilone, mpi bantu ya nkaka yina ke salaka bisalu ya maboko mbote-mbote+ yina bikalaka. 16  Kansi Nebuzaradani mfumu ya bantu yina ke taninaka ntotila bikisaka bantu ya nkaka ya insi yina, bayina vandaka bansukami ya ngolo, sambu bo vanda bantu ya ke salaka bilanga ya vinu mpi bantu ya bo ke pusaka na kusala bisalu ya ngolo.+ 17  Ebuna bantu ya Kaldea zengaka bitini-bitini makunzi ya kwivre+ ya nzo ya Yehowa, bapusu-pusu,+ mpi Nzadi-Mungwa ya kwivre+ yina vandaka na nzo ya Yehowa, ebuna bo nataka kwivre yonso na Babilone.+ 18  Bo bakaka mpi mabungu ya kutudila putulu ya tiya, bapawu, bima ya kufwila tiya, babolo,+ makopa,+ mpi bisadilu yonso ya kwivre yina bo vandaka kusadila na kisalu ya tempelo. 19  Mfumu ya bantu yina ke taninaka ntotila bakaka malonga ya nene,+ bima ya kunatila tiya, babolo, mabungu ya kutudila putulu ya tiya, bima ya kutudila minda,+ makopa, mpi babolo yina bo salaka na wolo ya kieleka mpi na arza ya kieleka.+ 20  Kansi makunzi zole, Nzadi-Mungwa, bangombe 12 ya kwivre+ yina vandaka na nsi ya Nzadi-Mungwa, mpi bapusu-pusu yina ntotila Salomo salaka sambu na nzo ya Yehowa, mpila ya kutesa kilo ya kwivre ya bima yai yonso vandaka ve. 21  Sambu na makunzi, nda ya konso dikunzi vandaka maboko* 18, nsinga ya kutesila ya maboko 12 lenda ziunga yo;+ nene na yo vandaka nene ya misapi* iya, mpi yo vandaka dibulu. 22  Mpi kima yina vandaka bonso nkalu na nsongi na yo vandaka ya kwivre; nda ya kima yina mosi vandaka maboko tanu;+ mpi muyungulu ti bagrenade yina vandaka na nziunga ya kima yina ya vandaka bonso nkalu, bo salaka yo na kwivre. Dikunzi ya zole vandaka kaka kiteso mosi ti yo, bagrenade mpi vandaka kiteso mosi. 23  Yo vandaka ti bagrenade 96 na bandambu na yo; na kimvuka, yo vandaka ti bagrenade 100 na nziunga ya muyungulu.+ 24  Mfumu ya bantu yina ke taninaka ntotila bakaka mpi Seraya+ mfumu ya banganga-nzambi, Sefania+ nganga-nzambi ya zole, mpi bankengidi yonso tatu ya bakielo.+ 25  Na mbanza, yandi bakaka kapita mosi ya nzo ya ntotila yina vandaka kutwadisa basoda, bandongisi nsambwadi ya ngolo ya ntotila yina bo monaka na mbanza, sekretere ya mfumu ya basoda, muntu yina vandaka kuvukisa bantu ya insi sambu na kisalu ya kisoda, mpi bantu 60 na kati ya bantu ya kukonda mfunu ya insi yina bo monaka na mbanza. 26  Nebuzaradani mfumu ya bantu yina ke taninaka ntotila bakaka bo mpi nataka bo na ntotila ya Babilone na Ribla. 27  Ntotila ya Babilone bedisaka bo mpi fwaka bo na Ribla+ na insi ya Amati. Mutindu yina bo katulaka Yuda na insi na yandi mpi nataka yandi na insi ya nzenza.+ 28  Yai bantu yina Nebukadenezare* nataka na insi ya nkaka: na mvula ya nsambwadi, Bayuda 3 023.+ 29  Na mvula ya 18 ya Nebukadenezare,*+ bo bakaka bantu* 832 na Yeruzalemi. 30  Na mvula ya 23 ya Nebukadenezare,* Nebuzaradani mfumu ya bantu yina ke taninaka ntotila nataka Bayuda na insi ya nkaka, bantu*+ 745. Na kimvuka, bo nataka bantu* 4 600 na insi ya nkaka. 31  Ebuna na mvula ya 37 yina Yehoyakini+ ntotila ya Yuda vandaka na insi ya nkaka, na ngonda ya 12, na kilumbu ya 25 ya ngonda yina, Evile-merodaki ntotila ya Babilone, na mvula yina yandi kumaka ntotila, yambulaka* Yehoyakini ntotila ya Yuda mpi basisaka yandi na boloko.+ 32  Yandi tubilaka yandi na mawete yonso mpi yandi tulaka kiti na yandi ya kimfumu na zulu kibeni kuluta bakiti ya kimfumu ya bantotila ya nkaka yina vandaka ti yandi na Babilone. 33  Yo yina Yehoyakini katulaka bilele na yandi ya boloko, mpi yandi vandaka kudia mbala na mbala na ntwala na yandi bilumbu yonso ya luzingu na yandi. 34  Bo vandaka kupesa yandi mbala na mbala madia yina vandaka kukatuka na ntotila ya Babilone, konso kilumbu, tii na kilumbu yina yandi fwaka, bilumbu yonso ya luzingu na yandi..

Banoti na nsi ya lutiti

Na kisina, “Nebukadrezare,” mutindu ya nkaka ya kusonika yo.
Na kisina, “Nebukadrezare,” mutindu ya nkaka ya kusonika yo.
Diboko mosi kele basantimetre 44,5. Tala Bangindu ya Ngika B14.
Nene ya misapi kele basantimetre 1,85. Tala Bangindu ya Ngika B14.
Na kisina, “Nebukadrezare,” mutindu ya nkaka ya kusonika yo.
Na kisina, “Nebukadrezare,” mutindu ya nkaka ya kusonika yo.
To “mioyo.”
Na kisina, “Nebukadrezare,” mutindu ya nkaka ya kusonika yo.
To “mioyo.”
To “mioyo.”
Na kisina, “tombulaka ntu ya.”