Yeremia 5:1-31

  • Bantu me buya ndola ya Yehowa (1-13)

  • Bo ta fwa bantu kansi bo ta manisa bo ve kibeni (14-19)

  • Yehowa ke sambisa bantu (20-31)

5  Beno tambula-tambula na babala-bala ya Yeruzalemi. Beno tala na nziunga mpi beno tula dikebi. Beno sosa na babala-bala na yandi ya nene sambu na kutalaKana beno lenda mona muntu yina ke sala mambu na lunungu,+Muntu yina ke sosa kuvanda muntu ya kwikama,Ebuna mono ta lolula mbanza yai.   Ata kana bo tuba nde: “Ya kieleka mutindu Yehowa kele na luzingu!” Bo ta landa kuzenga kieleka na mambu ya luvunu.+   O Yehowa, keti meso na nge ke sosaka ve kwikama?+ Nge bulaka bo, kansi yo salaka bo kima ve.* Nge manisaka bo, kansi bo buyaka kundima ndola.+ Bo kumisaka baluse na bo ngolo kuluta ditadi,+Mpi bo buyaka kubaluka.+   Kansi mono kuditubilaka nde: “Ya kieleka bantu yai fwete vanda bantu ya kukonda mfunu. Bo ke sala mambu na buzoba, sambu bo me zaba ve nzila ya Yehowa,Mutindu Nzambi na bo ke sambisaka.   Mono ta kwenda na bantu ya lukumu mpi ta solula ti bo,Sambu yo lombaka nde bo tula dikebi na nzila ya Yehowa,Mutindu Nzambi na bo+ ke sambisaka. Kansi bo yonso me bukaka vanguMpi bo me zengaka bansinga.”*   Yo yina ntambu ya mfinda ke nwanisa bo,Kibulu ya ntoto ya zelo na zelo ke landa kufwa bo,Nkoyi ke landa kukengila pene-pene ya bambanza na bo. Konso muntu yina ke basika na nganda, yo ke pasula yandi bitini-bitini. Sambu mambu na bo ya mbi kele mingi;Mambu na bo ya kukonda kwikama kele mingi.+   Inki mutindu mono lenda lolula nge sambu na diambu yai? Bana na nge me yambula mono,Mpi bo ke zenga kieleka na zina ya kima yina kele ve Nzambi.+ Mono lungisaka banzala na bo,Kansi bo landaka kusala bizumba,Mpi bo fulukaka na nzo ya nkento ya ndumba.   Bo kele bonso bampunda yina kele ti nzala ya ngolo ya kuvukisa nitu,Konso muntu ke tudila nkento+ ya muntu ya nkaka makelele.   “Keti mono fwete sambisa bo ve sambu na mambu yai?” Yehowa muntu me tuba. “Keti mono* fwete vutula ve mbi na dikanda ya mutindu yai?”+ 10  “Beno kwisa na bilanga na yo ya vinu mpi beno bebisa yo,Kansi beno manisa yo ve kimakulu.+ Beno katula balutangu na yo yina ke yalumuka,Sambu yo kele ve ya Yehowa. 11  Sambu nzo ya Izraele mpi nzo ya YudaMe yekula mono kibeni,” Yehowa muntu me tuba.+ 12  “Bo me buya Yehowa, mpi bo ke landa kutuba nde,‘Yandi ta sala kima ve.*+ Mpasi mosi ve ta bwila beto;Beto ta mona ve mbele ya bitumba to nzala.’+ 13  Bambikudi me fuluka ti mupepe,Mpi bo kele ve na ndinga.* Bika diambu yai kukumina bo!” 14  Yo yina Yehowa, Nzambi ya makesa, ke tuba nde: “Sambu bantu yai ke tuba diambu yai,Mono ke kumisa bangogo na mono tiya na munoko na nge,+Mpi bantu yai kele bankuni,Mpi yo ta yoka bo.”+ 15  “Mono ke tindila nge dikanda mosi yina ta katuka ntama, O nzo ya Izraele,”+ Yehowa muntu me tuba. “Yo kele dikanda yina ke zingaka mingi, Yo kele dikanda ya ntama,Dikanda yina nge me zaba ve ndinga na yo,Mpi yina nge lenda bakisa ve mambu yina yo ke tuba.+ 16  Lupaya na bo kele bonso maziamu ya kukanguka;Bo yonso kele basoda. 17  Bo ta dia bima ya nge me katula na bilanga mpi mampa na nge.+ Bo ta dia bana na nge ya babakala mpi ya bankento. Bo ta dia mameme na nge mpi bangombe na nge. Bo ta dia banti na nge ya vinu mpi ya bafige. Bo ta fwa bambanza na nge ya ngolo yina nge ke tudilaka ntima na mbele ya bitumba.” 18  “Kansi ata na bilumbu yina,” Yehowa muntu me tuba, “Mono ta manisa beno ve kibeni.+ 19  Ebuna ntangu bo ke yula nde, ‘Sambu na nki Yehowa Nzambi na beto me sala beto mambu yai yonso?’ nge fwete pesa bo mvutu nde, ‘Kaka mutindu beno yambulaka mono sambu na kusadila nzambi ya nzenza na insi na beno, mutindu mosi beno ta sadila banzenza na insi yina kele ve ya beno.’”+ 20  Beno zabisa yo na nzo ya Yakobi,Mpi beno samuna yo na Yuda nde: 21  “Beno wa, beno bazoba mpi bantu ya me konda mayele:*+ Bo kele na meso kansi bo ke monaka ve;+Bo kele na makutu kansi bo ke waka ve.+ 22  ‘Keti beno ke wa mono boma ve?’ Yehowa muntu me tuba,‘Keti beno fwete tekita ve na ntwala na mono? Mono muntu tulaka zelo bonso ndilu ya nzadi-mungwa,Nsiku ya ntangu yonso yina yo lenda luta ve. Ata bitembo na yo ke tombuka-tombuka, yo lenda nunga ve;Ata yo ke tula makelele, yo lenda luta yo ve.+ 23  Kansi bantu yai kele ti ntima ya ngolo mpi ya kukolama;Bo me vilaka nzila mpi bo me kwendaka na nzila na bo mosi.+ 24  Mpi bo ke tuba ve na ntima na bo nde: “Ntangu yai bika beto wa Yehowa Nzambi na beto boma,Muntu yina ke pesaka mvula na nsungi na yo,Mvula ya ntete ti mvula ya nsuka,Muntu yina ke taninaka sambu na beto bamposo ya bo me tulaka sambu na kukatula bima na bilanga.”+ 25  Bifu na beno mosi me kangaka bima yai nzila sambu yo kwisa ve;Masumu na beno mosi me yiminaka beno mambu ya mbote.+ 26  Sambu bantu ya mbi kele na kati ya bantu na mono. Bo ke landa kutala, bonso ntangu bantu ya ke kangaka bandeke ke kondamaka. Bo ke tula mutambu yina ke fwaka. Bo ke kanga bantu. 27  Bonso buyamba ya me fuluka ti bandeke,Mutindu mosi banzo na bo kele ya kufuluka ti luvunu.+ Yo yina bo me kuma ngolo mpi bamvwama. 28  Bo me kuma mafuta mpi ngebu-ngebu;Bo me fuluka ti mambu ya mbi. Bo ke nwanina ve diambu ya mwana yina me konda tata,+Sambu bo nunga;Mpi bo ke zenga ve makambu ya bansukami na lunungu.’”+ 29  “Keti mono fwete sambisa bo ve sambu na mambu yai?” Yehowa muntu me tuba. “Keti mono* fwete vutula ve mbi na dikanda ya mutindu yai? 30  Diambu mosi ya ke yitukisa mpi ya ke pesa boma me salama na insi yai: 31  Bambikudi ke bikula mambu ya luvunu,+Mpi banganga-nzambi ke yala na kiyeka na bo mosi. Mpi bantu na mono ke zola nde yo vanda mutindu yina.+ Kansi beno ta sala nki ntangu nsuka ta kwisa?”

Banoti na nsi ya lutiti

Na kisina, “bo lembaka ve.”
Na kisina, “bima ya kukangila.”
To “moyo na mono.”
To mbala ya nkaka, “Yandi kele ve.”
Disongidila, ndinga ya Nzambi.
Na kisina, “beno bazoba yina me konda ntima.”
To “moyo na mono.”