Yeremia 46:1-28

  • Mbikudulu sambu na Ezipte (1-26)

    • Nebukadenezare fwete nunga Ezipte (13, 26)

  • Balusilu sambu na Izraele (27, 28)

46  Yehowa tubilaka mbikudi Yeremia sambu na makanda+ nde:  Sambu na Ezipte,+ na yina me tala basoda ya Farao Neko+ ntotila ya Ezipte, yina vandaka pene-pene ya Nzadi ya Efrate mpi yina Nebukadenezare* ntotila ya Babilone bedisaka na Karkemishi na mvula ya iya ya Yehoyakimi+ mwana ya Yoziasi, ntotila ya Yuda:   “Beno yidika bitaninu na beno ya fioti* mpi ya nene,Mpi beno kwenda na bitumba.   Beno bantu yina ke tambusaka bampunda, beno kangisa mikaba ya bampunda mpi beno mata. Beno yilama mpi beno lwata bampu na beno. Beno tula makonga na beno makasi mpi beno lwata binkutu na beno ya bibende.   ‘Sambu na nki mono ke mona bo, bo ke tekita na boma? Bo ke vutuka nima, bo me bedisa basoda na bo. Bo me tina na boma, basoda na bo me baluka ve. Boma ya ngolo kele bisika yonso,’ Yehowa muntu me tuba.   ‘Muntu ya ntinu ke kuka ve kutina, mpi basoda ke kuka ve kutina. Na nordi, pene-pene ya Nzadi ya Efrate,Bo me bula sakuba mpi bo me bwa.’+   Nani yina ke kwisa kutombuka bonso Nzadi ya Nile,Bonso banzadi yina bamasa na yo ke dasukaka?   Ezipte ke kwisa kutombuka kaka bonso Nzadi ya Nile,+Bonso banzadi yina bamasa na yo ke dasukaka,Mpi yo ke tuba nde, ‘Mono ta tombuka mpi ta fulusa ntoto. Mono ta fwa mbanza mpi bantu yina ke zinga kuna.’   Beno bampunda, beno tombuka! Beno bapusu-pusu, beno tambula na kilawu! Bika basoda kukwenda na ntwala,Kushi ti Puti, yina ke sadilaka kitaninu,+Mpi bantu ya Ludime,+ yina ke sadilaka mpi ke konikaka* munduki ya tolo-tolo.+ 10  “Kilumbu yina kele ya Mfumu ya Kuluta Nene, Yehowa ya makesa, kilumbu ya kuvutula mbi sambu yandi vutula mbi na bambeni na yandi. Ebuna mbele ya bitumba ta fwa bo, yo ta fuluka mpi ta nwa menga na bo, sambu Mfumu ya Kuluta Nene, Yehowa ya makesa, kele ti kimenga yina yandi ta pesa na insi ya nordi pene-pene ya Nzadi ya Efrate.+ 11  Tombuka na Gileadi sambu na kubaka balsami,+O mwana-nkento ya mwense ya Ezipte. Nge me kumisaka bankisi na nge mingi sambu na mpamba,Sambu nkisi ya kubelula nge kele ve.+ 12  Makanda me wa nsangu ya nsoni na nge,+Mpi bidilu na nge me fuluka na insi. Sambu soda mosi me tutana ti soda ya nkaka,Mpi bo zole me bwa kumosi.” 13  Yai mambu yina Yehowa tubilaka mbikudi Yeremia na yina me tala kukwisa ya Nebukadenezare* ntotila ya Babilone sambu na kufwa insi ya Ezipte:+ 14  “Beno zabisa yo na Ezipte, beno zabisa yo na Migdole.+ Beno zabisa yo na Nofi* mpi na Tapanesi.+ Beno tuba nde, ‘Beno yilama mpi beno kudibongisa,Sambu mbele ya bitumba ta dia bisika yonso na nziunga na beno. 15  Sambu na nki bo me fwa bantu na nge ya ngolo? Bo telamaka ve na kisika na bo,Sambu Yehowa me bwisa bo. 16  Bo ke bula sakuba mpi ke bwa mingi kibeni. Bo ke tuba bo na bo nde: “Telama! Beto vutuka na bantu na beto mpi na insi na betoSambu na kutina mbele ya bitumba ya nku.”’ 17  Bo me zabisa kuna nde,‘Farao ntotila ya Ezipte kele kaka makelele ya mpambaYina me bikisa nde dibaku ya mbote* kuluta.’+ 18  ‘Ya kieleka mutindu mono kele na luzingu,’ Ntotila muntu me tuba, yina zina na yandi kele Yehowa ya makesa,‘Yandi* ta kwisa bonso Tabore+ na kati ya bangumbaMpi bonso Karmele+ pene-pene ya nzadi-mungwa. 19  Yidika bima na nge sambu na kukwenda na insi ya nkaka,O mwana-nkento yina ke zingaka na Ezipte. Sambu Nofi* ta kuma kima ya ke pesa boma;Bo ta tula yo tiya* mpi bo ta bikisa yo kukonda bantu.+ 20  Ezipte kele bonso mwana-ngombe ya nkento ya kitoko,Kansi banzinzi ya ke tatikaka ta katuka na nordi mpi ta kwisila yandi. 21  Ata basoda ya yandi ke futaka mbongo yina kele na kati na yandi kele bonso bana-bangombe ya mafuta,Kansi bo me vutuka nima mpi bo me tina kumosi. Bo lendaka ve kutelama na kisika na bo,+Sambu kilumbu ya mpasi na bo me kwisila bo,Ntangu ya kupesa bo ndola.’ 22  ‘Makelele na yandi kele bonso makelele ya nioka yina ke tambula,Sambu bo ke landa yandi na ngolo, ti masoka,Bonso bantu yina ke zenga banti.* 23  Bo ta zenga mfinda na yandi,’ Yehowa muntu me tuba, ‘ata yo ke monana nde muntu lenda kota ve kuna. Sambu bo kele mingi kuluta bampasu, mpila ya kutanga bo kele ve. 24  Bo ta pesa mwana-nkento ya Ezipte nsoni. Bo ta pesa yandi na maboko ya bantu ya nordi.’+ 25  “Yehowa ya makesa, Nzambi ya Izraele, ke tuba nde: ‘Ntangu yai mono ke tula dikebi na mono na Amone+ ya No,*+ na Farao, na Ezipte, na banzambi na yandi,+ mpi na bantotila na yandi—ee, na Farao mpi na bantu yonso yina ke tudilaka yandi ntima.’+ 26  “‘Mpi mono ta pesa bo na maboko ya bantu yina ke sosa kufwa bo,* na Nebukadenezare* ntotila ya Babilone+ mpi na bansadi na yandi. Kansi na nima, bantu ta zinga diaka kuna bonso na bantangu ya ntama,’ Yehowa muntu me tuba.+ 27  ‘Kansi nge nsadi na mono Yakobi, kuwa boma ve,Mpi O Izraele,+ kutekita ve. Sambu mono ta gulusa nge katuka na kisika ya ntamaMpi mono ta gulusa bana* na nge katuka na insi yina bo nataka bo na kimpika.+ Yakobi ta vutuka, ta vanda na ngemba, mpi bo ta yangisa yandi ve,Mpi muntu mosi ve ta pesa bo boma.+ 28  Yo yina, nsadi na mono Yakobi, kuwa boma ve,’ Yehowa muntu me tuba, ‘sambu mono kele ti nge. Mono ta manisa bantu na kati ya makanda yonso bisika yina mono panzaka nge,+Kansi nge, mono ta manisa nge ve.+ Mono ta pesa nge ndola* na kiteso yina me fwana,+Kansi mono ta konda ve ata fioti kupesa nge ndola.’”

Banoti na nsi ya lutiti

Na kisina, “Nebukadrezare,” mutindu ya nkaka ya kusonika yo.
Kitaninu mosi ya fioti, mbala mingi bantu ya ke sadilaka munduki ya tolo-tolo bantu vandaka kulwata yo.
Na kisina, “ke niataka.”
Na kisina, “Nebukadrezare,” mutindu ya nkaka ya kusonika yo.
To “Memfisi.”
Na kisina, “ntangu ya bo me tulaka.”
Disongidila, muntu yina ta bedisa Ezipte.
To “Memfisi.”
To mbala ya nkaka, “Yo ta kuma ntoto ya mpamba.”
To “ke lokuta bankuni.”
Disongidila, Tebesi.
To “ke sosa moyo na bo.”
Na kisina, “Nebukadrezare,” mutindu ya nkaka ya kusonika yo.
Na kisina, “nkuna.”
To “ta sungika nge.”