Yeremia 4:1-31

  • Kubalula ntima ke nataka balusakumunu (1-4)

  • Mpasi ta katuka na ndambu ya nordi (5-18)

  • Yeremia ke wa mpasi sambu na bampasi yina ta kwisa (19-31)

4  “O Izraele, kana nge vutuka,” Yehowa muntu me tuba,“Kana nge vutukila monoMpi kana nge katula biteki na nge ya nzanzi na ntwala na mono,Nge ta vanda ve muntu yina ke tina-tina.+   Mpi kana nge dia ndefi nde,‘Ya kieleka mutindu Yehowa kele na luzingu!’ na kieleka mpi na lunungu,Makanda ta kudibakila lusakumunu na nzila na yandi,Mpi bo ta kudikumisa na yandi.”+  Sambu Yehowa ke tubila bantu ya Yuda mpi ya Yeruzalemi nde: “Beno bundula ntoto yina bo lenda kuna bima,Kansi beno landa ve kukuna na kati ya bansende.+   Beno kudiyotisa sambu na Yehowa,Mpi beno katula mpusu ya bantima na beno,+Beno bantu ya Yuda mpi bantu ya Yeruzalemi,Sambu makasi na mono kupela ve bonso tiyaMpi yo pela ebuna muntu mosi ve kufwa yo,Sambu na bisalu na beno ya mbi.”+   Beno zabisa yo na Yuda, mpi beno zabisa yo na Yeruzalemi. Beno boka mpi beno bula kibongo na insi ya mvimba.+ Beno tuba na ndinga ya ngolo nde: “Beno vukana,Mpi beto tina na bambanza ya ngolo.+   Beno tedimisa kidimbu* na ndambu ya Sioni. Beno sosa lutaninu, mpi beno telama ve kisika mosi,” Sambu mono ke tinda mpasi ya ke katuka na ndambu ya nordi,+ mpasi ya ngolo.   Yandi me basika bonso ntambu na mwa-mfinda na yo;+Muntu ya ke bebisaka makanda me kwenda.+ Yandi me basika na kisika na yandi sambu na kukumisa insi na beno kima ya ke pesa boma. Bambanza na beno ta kuma mayumbu, kukonda bantu.+   Yo yina, beno lwata basaki,+Beno vanda na mawa* mpi beno dila,Sambu makasi ya ngolo yina Yehowa wilaka beto me mana ve.   “Na kilumbu yina,” Yehowa muntu me tuba, “kikesa* ya ntotila ta mana,+Mpi kikesa* ya bamfumu;Banganga-nzambi ta wa boma, mpi bambikudi ta yituka.”+ 10  Ebuna mono tubaka nde: “O Yehowa Mfumu ya Kuluta Nene! Ya kieleka nge me kusa kibeni bantu yai+ mpi Yeruzalemi ntangu nge tubaka nde, ‘Beno ta vanda na ngemba,’+ kansi mbele ya bitumba kele na mingungu na beto.”* 11  Na ntangu yina, bo ta tubila bantu yai mpi Yeruzalemi nde: “Mupepe ya tiya yina me katuka na bangumba ya fioti ya ntoto-makanga yina kele ve ti bantiTa bula mwana-nkento ya* bantu na mono;Yo ke kwisa ve sambu na kukatula bampusu to kukatula mvindu. 12  Mupepe yonso ke katukaka na bisika yina na ntuma na mono. Ntangu yai mono ta zengila bo nkanu. 13  Tala! Yandi ta kwisa bonso matuti ya mvula,Mpi bapusu-pusu na yandi kele bonso mupepe ya ngolo.+ Bampunda na yandi kele ntinu kuluta bango-zulu.+ Mawa na beto, sambu beto me beba! 14  O Yeruzalemi, yobisa ntima na nge mpi katula mambu ya mbi, sambu nge guluka.+ Tii nki ntangu nge ta landa kubumba bangindu ya mbi? 15  Sambu ndinga mosi ke zabisa nsangu katuka na Dani,+Mpi yo ke zabisa mpasi katuka na bangumba ya Efrayimi. 16  Beno zabisa yo, ee, na makanda;Beno zabisa yo na Yeruzalemi.” “Bambeni* ke kwisa, bo me katuka na insi mosi ya ntama,Mpi bo ta tombudila bamba- nza ya Yuda mingungu na bo. 17  Bo ke kwisa kunwanisa yandi na bandambu yonso bonso bankengidi ya nseke,+Sambu yandi me kolama na ntwala na mono,”+ Yehowa muntu me tuba. 18  “Banzila na nge mpi bisalu na nge, bo ta vutudila nge yo.+Mpasi na nge kele mbi kibeni, Sambu yo me kuma tii na ntima na nge!” 19  O mpasi na mono,* mpasi na mono! Mono ke wa mpasi ya ngolo na kati ya ntima na mono.* Ntima na mono ke bula na kati na mono. Mono lenda vanda ve pima,Sambu mono* me wa makelele ya kibongo,Makelele ya kubinga bantu na bitumba.*+ 20  Mpasi na mpasi, yina nsangu ya bo ke pesa,Sambu bo me fwa insi ya mvimba. Batenta na mono mosi me fwa na kintulumukina,Bilele ya tenta+ na mono me fwa na mbala mosi. 21  Tii nki ntangu mono ta landa kumona kidimbu,*Mpi ta landa kuwa makelele ya kibongo?+ 22  Sambu bantu na mono kele bazoba;+Bo ke tudila mono ve dikebi. Bo kele bana ya bazoba, bo me konda mayele ya kubakisa mambu. Bo kele mayele mingi na kusala mambu ya mbi,Kansi bo zaba ve mutindu ya kusala mambu ya mbote. 23  Mono monaka insi, mpi tala! yo vandaka mpamba mpi kukonda bantu.+ Mono talaka na zulu, mpi nsemo na yo vandaka diaka ve.+ 24  Mono monaka bangumba, mpi tala! yo vandaka kutekita,Mpi bangumba ya fioti vandaka kunikana.+ 25  Mono monaka, mpi tala! muntu vandaka ve,Mpi bandeke yonso ya zulu me tinaka.+ 26  Mono monaka, mpi tala! kisika ya bo me kunaka banti yina ke butaka bambuma me kuma ntoto-makanga,Mpi bo me fwaka bambanza na yo yonso.+ Yo vandaka sambu na Yehowa,Sambu na makasi na yandi ya ngolo. 27  Sambu Yehowa ke tuba nde: “Insi ya mvimba ta bikala mpamba,+Kansi mono ta manisa yo ve kimakulu. 28  Yo yina insi yai ta dila,+Mpi zulu ta kuma ndombe.+ Yo kele sambu mono me tuba, mono me baka lukanu,Mono ta soba ve mabanza na mono,* mpi mono ta vutuka ve nima sambu na yo.+ 29  Ntangu makelele ya bantu yina ke tambusaka bampunda mpi ya bantu yina ke sadilaka minduki ya batolo-tolo ke wakana,Mbanza ya mvimba ke tina.+ Bo ke kota na mwa-bamfinda,Mpi bo ke mata na matadi.+ Bo ke bikisa bambanza yonso,Mpi muntu mosi ve ke zinga kuna.” 30  Ntangu yai ya bo me bebisa nge, nge ta sala nki? Nge vandaka kulwata bilele ya mbwaki mingi,Nge vandaka kulwata bima ya wolo ya kukumisa nitu kitoko,Mpi kukumisa meso na nge nene ti mukubu ya ndombe.* Kansi nge kudikumisaka kitoko+ ya mpamba,Sambu bantu yina vandaka ti nzala ya ngolo ya kuvukisa nitu ti nge me buya nge;Ntangu yai bo ke sosa kufwa nge.*+ 31  Sambu mono me wa makelele bonso makelele ya nkento yina ke bela,Mpasi bonso mpasi ya nkento yina ke buta mwana na yandi ya ntete,Ndinga ya mwana-nkento ya Sioni yina ke landa kupema na mpasi. Ntangu yandi ke tandula maboko na yandi,+ yandi ke tuba nde: “Mawa na mono, sambu bantu yina ke fwaka bantu me lembisa mono!”*

Banoti na nsi ya lutiti

To “nti yina kele kidimbu.”
To “Beno bula bantulu.”
Na kisina, “ntima.”
Na kisina, “ntima.”
To “kansi mbele ya bitumba me kuma na moyo na beto.”
Kutuba ya kifwani, ziku yo ke monisa mawa mpi kuditula na kisika ya muntu.
Na kisina, “Bankengidi,” disongidila, bantu yina ke kengilaka mbanza sambu na kuzaba ntangu ya kunwanisa yo.
Na kisina, “misopo na mono.”
Na kisina, “na bibaka ya ntima na mono.”
To “moyo na mono.”
To mbala ya nkaka, “milolo ya bitumba.”
To “nti yina kele kidimbu.”
To “ta wa ve mawa.”
To “bima ya ndombe yina bankento ke tulaka na meso.”
To “ke sosa moyo na nge.”
To “moyo na mono.”