Yeremia 34:1-22

  • Nsangu ya ndola sambu na Sidikiya (1-7)

  • Bo me fwa kuwakana ya ke pesa bampika kimpwanza (8-22)

34  Yai ndinga yina katukaka na Yehowa mpi kwisilaka Yeremia, ntangu Nebukadenezare* ntotila ya Babilone, basoda na yandi yonso, bimfumu yonso ya nsi-ntoto yina vandaka na nsi ya luyalu na yandi, mpi bantu yonso vandaka kunwanisa Yeruzalemi mpi bambanza na yo:+  “Yehowa Nzambi ya Izraele ke tuba nde, ‘Kwenda kusolula ti Sidikiya+ ntotila ya Yuda mpi songa yandi nde: “Yehowa ke tuba nde, ‘Mono ke pesa mbanza yai na maboko ya ntotila ya Babilone, ebuna yandi ta yoka yo tiya.+  Mpi nge ta tina ve na maboko na yandi, sambu bo ta kanga nge kibeni mpi bo ta pesa nge na maboko na yandi.+ Nge ta mona ntotila ya Babilone meso na meso, mpi yandi ta solula ti nge mbunzu na mbunzu, ebuna nge ta kwenda na Babilone.’+  Kansi, wa mambu yina Yehowa ke tuba, O Sidikiya ntotila ya Yuda, ‘Yehowa ke tubila nge nde: “Nge ta fwa ve na mbele ya bitumba.  Nge ta fwa na ngemba,+ mpi bo ta yoka bima ya nsudi ya kitoko sambu na nge mutindu bo salaka sambu na batata na nge, bantotila ya ntama yina vandaka na ntwala na nge, mpi bo ta dila nge nde, ‘Mawa, O mfumu!’ sambu ‘mono me tuba mambu yina,’ Yehowa muntu me tuba.”’”’”  Na nima, mbikudi Yeremia tubilaka Sidikiya ntotila ya Yuda mambu yai yonso na Yeruzalemi,  ntangu basoda ya ntotila ya Babilone vandaka kunwanisa Yeruzalemi mpi bambanza yonso ya Yuda yina bikalaka,+ bo vandaka kunwanisa Lakishi+ mpi Azeka;+ sambu bambanza yai mpamba bikalaka na kati ya bambanza ya ngolo ya Yuda.  Yai ndinga yina katukaka na Yehowa mpi kwisilaka Yeremia na nima ya ntangu yina ntotila Sidikiya salaka kuwakana ti bantu yonso na Yeruzalemi sambu na kuzabisa bo kimpwanza,+  nde konso muntu fwete pesa kimpwanza na bampika na yandi ya Baebreo, bakala to nkento, sambu ata muntu mosi ve kuvanda diaka ti mpangi na yandi Muyuda bonso mpika na yandi. 10  Bamfumu yonso mpi bantu yonso lemfukaka. Bo salaka kuwakana nde konso muntu fwete pesa bampika na yandi ya babakala ti ya bankento kimpwanza mpi kubika bo diaka ve bo vanda bampika. Bo lemfukaka mpi bo bikaka bo, bo kwenda. 11  Kansi, na nima bo vutulaka bampika ya babakala ti ya bankento yina bo pesaka kimpwanza, mpi bo pusaka bo diaka na ngolo na kuvanda bampika. 12  Yo yina, yai ndinga ya Yehowa yina katukaka na Yehowa mpi kwisilaka Yeremia: 13  “Yehowa Nzambi ya Izraele ke tuba nde, ‘Mono salaka kuwakana ti ba-nkaka na beno+ kilumbu yina mono basisaka bo na insi ya Ezipte, na nzo ya kimpika;+ mono songaka bo nde: 14  “Na nsuka ya bamvula nsambwadi, konso muntu na kati na beno fwete pesa kimpwanza na mpangi na yandi Mu-Ebreo yina bo tekilaka yandi mpi yina me sadila yandi bamvula sambanu; nge fwete pesa yandi kimpwanza.”+ Kansi ba-nkaka na beno waka ve mpi bo tudilaka mono ve makutu. 15  Mpi ntama mingi ve* beno mosi balukaka mpi salaka mambu ya mbote na meso na mono na mutindu beno zabisaka kimpwanza sambu na bampangi na beno, mpi beno salaka kuwakana na ntwala na mono na nzo yina kele ti zina na mono. 16  Kansi na nima, beno balukaka mpi beno kumisaka zina na mono mvindu+ na mutindu beno vutulaka bampika na beno ya babakala ti ya bankento yina beno pesaka kimpwanza na kulanda nzala* na bo, mpi beno pusaka bo na ngolo na kuvanda bampika.’ 17  “Yo yina, Yehowa ke tuba nde: ‘Beno me lemfukila mono ve na mutindu beno me zabisa kimpwanza, konso muntu na mpangi na yandi mpi na nkweno na yandi.+ Yo yina, ntangu yai mono ta zabisa beno kimpwanza,’ Yehowa muntu me tuba, ‘beno ta fwa na mbele ya bitumba, na kipupa,*+ mpi na nzala, ebuna mono ta kumisa beno kima ya ke pesa boma na bimfumu yonso ya nsi-ntoto.+ 18  Mpi yai mambu yina ta kumina bantu yina fwaka kuwakana na mono na mutindu bo zitisaka ve bangogo ya kuwakana yina bo salaka na ntwala na mono ntangu bo zengaka mwana-ngombe na bitini zole mpi bo lutaka na kati-kati ya bitini yina,+ 19  disongidila, bamfumu ya Yuda, bamfumu ya Yeruzalemi, bakapita ya nzo ya ntotila, banganga-nzambi, mpi bantu yonso ya insi yai yina lutaka na kati-kati ya bitini ya mwana-ngombe yina: 20  Mono ta pesa bo na maboko ya bambeni na bo mpi ya bantu yina ke sosa kufwa bo,* mpi bamvumbi na bo ta kuma madia sambu na bandeke ya zulu mpi sambu na bambisi ya ntoto.+ 21  Mpi mono ta pesa Sidikiya ntotila ya Yuda ti bamfumu na yandi na maboko ya bambeni na bo, na maboko ya bantu yina ke sosa kufwa bo,* mpi na maboko ya basoda ya ntotila ya Babilone,+ yina me bikisa kunwanisa beno.’+ 22  “‘Mono ta pesa nsiku,’ Yehowa muntu me tuba, ‘mpi mono ta vutula bo na mbanza yai, bo ta nwanisa yo, bo ta botula yo, mpi bo ta yoka yo tiya;+ ebuna mono ta kumisa bambanza ya Yuda ntoto ya mpamba, kukonda muntu ya ke zinga kuna.’”+

Banoti na nsi ya lutiti

Na kisina, “Nebukadrezare,” mutindu ya nkaka ya kusonika yo.
Na kisina, “bubu yai.”
To “moyo.”
To “maladi.”
To “ke sosa mioyo na bo.”
To “ke sosa mioyo na bo.”