Yeremia 33:1-26

  • Nzambi me sila nde bantu ta vutuka na insi na bo (1-13)

  • Lutaninu na nsi ya “lutangu ya lunungu” (14-16)

  • Kuwakana ti Davidi mpi banganga-nzambi (17-26)

    • Kuwakana ya me tala mwini ti mpimpa (20)

33  Ndinga ya Yehowa kwisilaka Yeremia na mbala ya zole, ntangu bo vandaka kaka me kanga yandi na Kibansala ya Bankengidi,+ nde:  “Yai mambu Yehowa Muntu yina salaka ntoto ke tuba, Yehowa yina salaka yo mpi tulaka yo ngolo; zina na yandi Yehowa,  ‘Binga mono, ebuna mono ta ndima mpi ta songa nge na luzolo yonso mambu ya nene mpi ya nge lenda bakisa ve yina nge me zabaka ve.’”+  “Sambu yai mambu yina Yehowa Nzambi ya Izraele ke tuba sambu na banzo ya mbanza yai mpi banzo ya bantotila ya Yuda yina bo me bwisa sambu na mwa bangumba ya ntoto ya bo me tula sambu na kunwanisa yo mpi sambu na mbele ya bitumba,+  mpi sambu na bantu yina ke kwisa sambu na kunwana ti bantu ya Kaldea, mpi ke fulusa kisika yai ti bamvumbi ya bantu yina mono fwaka na makasi na mono mpi na nganzi na mono, bantu yina mambi na bo me pusa mono na kubumba luse na ntwala ya mbanza yai:  ‘Mono ke sala nde yandi kuma diaka mbote mpi mono ke belula yandi,+ ebuna mono ta belula bo, mono ta pesa bo ngemba mingi ti kieleka mingi.+  Mono ta vutula bantu ya Yuda yina kwendaka na kimpika ti bantu ya Izraele yina kwendaka na kimpika,+ mpi mono ta tunga bo mutindu mono salaka na luyantiku.+  Mono ta katula bo mvindu ya makambu yonso ya bo nataka sambu na masumu yina bo salaka na ntwala na mono,+ mpi mono ta lolula makambu yonso ya bo nataka sambu na masumu mpi mambu ya mbi yina bo salaka na ntwala na mono.+  Sambu na mono yandi ta kuma zina ya kiese, lukumu, mpi kitoko na ntwala ya makanda yonso ya ntoto yina ta wa nsangu ya bumbote yonso ya mono ta monisila bo.+ Bo ta wa boma ya ngolo mpi bo ta tekita+ sambu na bumbote yonso yina mono ta monisila yandi mpi ngemba yonso yina mono ta pesa yandi.’”+ 10  “Yehowa ke tuba nde: ‘Na kisika yai ya beno ta tuba nde yo kele ntoto ya mpamba, ya me konda bantu mpi bitwisi, na bambanza ya Yuda mpi na babala-bala ya Yeruzalemi yina kele mpamba, kukonda bantu, bantu yina ke zinga kuna, to bitwisi, kuna bo ta wa diaka 11  makelele ya kuyangalala mpi milolo ya kiese,+ ndinga ya bakala yina ke kwela mpi ndinga ya nkento yina ke kwela, ndinga ya bantu yina ke tuba nde: “Beno pesa Yehowa ya makesa matondo, sambu Yehowa kele mbote;+ zola na yandi ya kwikama ke zingaka kimakulu!”’+ “‘Bo ta nata makabu ya kupesa matondo na nzo ya Yehowa,+ sambu mono ta vutula bantu ya insi yai yina kwendaka na kimpika, bonso na luyantiku,’ Yehowa muntu ke tuba.” 12  “Yehowa ya makesa ke tuba nde: ‘Na ntoto yai ya mpamba, ya me konda bantu mpi bitwisi, mpi na bambanza na yo yonso, kuna banseke ta vanda diaka sambu bangungudi kupemisa bitwisi na bo.’+ 13  “‘Na bambanza ya ntoto ya bangumba, na bambanza ya bansi yina kele na ndambu ya nsi, na bambanza ya sudi, na ntoto ya Benyamini, na bisika yina kele na nziunga ya Yeruzalemi,+ mpi na bambanza ya Yuda,+ bitwisi ta luta diaka na nsi ya maboko ya muntu yina ke tangaka yo,’ Yehowa muntu ke tuba.” 14  “‘Tala! Bilumbu ke kwisa,’ Yehowa muntu me tuba, ‘ntangu mono ta lungisa lusilu ya mbote yina mono salaka sambu na nzo ya Izraele mpi nzo ya Yuda.+ 15  Na bilumbu yina mpi na ntangu yina, mono ta basisila Davidi lutangu ya lunungu,*+ mpi yandi ta sambisa mambu na lunungu na insi yai.+ 16  Na bilumbu yina bo ta gulusa Yuda+ mpi Yeruzalemi ta zinga na lutaninu.+ Yai mutindu bo ta binga yandi: Yehowa Kele Lunungu na Beto.’”+ 17  “Sambu Yehowa ke tuba nde: ‘Ntangu yonso yo ta vandaka ti muntu mosi ya dibuta ya Davidi yina ta vandaka na kiti ya kimfumu ya nzo ya Izraele,+ 18  mpi banganga-nzambi yina kele Balevi ta konda ve kuvanda ti muntu mosi yina ta telama na ntwala na mono sambu na kupesa makabu ya mvimba ya kuyoka, sambu na kuyoka makabu ya mbuma, mpi sambu na kupesa bimenga.’” 19  Ebuna ndinga ya Yehowa kwisilaka diaka Yeremia nde: 20  “Yehowa ke tuba nde, ‘Kana beno kuka kufwa kuwakana na mono ya me tala mwini mpi kuwakana na mono ya me tala mpimpa, sambu na kukanga mwini ti mpimpa nzila sambu yo kwisa ve na ntangu na yo,+ 21  na ntangu yina, kuwakana na mono ti nsadi na mono Davidi lenda fwa,+ na mpila nde yandi vanda ve ti mwana yina ke yala bonso ntotila na kiti ya kimfumu na yandi,+ mpi yo kele mutindu mosi sambu na kuwakana na mono ti banganga-nzambi yina kele Balevi, bansadi na mono.+ 22  Kaka mutindu bo lenda tanga ve makesa ya zulu mpi bo lenda tesa ve zelo ya nzadi-mungwa, mutindu mosi mpi mono ta kumisa mingi bana* ya nsadi na mono Davidi mpi Balevi yina ke sadilaka mono.’” 23  Ebuna ndinga ya Yehowa kwisilaka diaka Yeremia nde: 24  “Keti nge me wa ve mambu yina bantu yai ke tuba, ‘Yehowa ta buya mabuta zole yina yandi solaka’? Bo ke sadila bantu na mono mambu kukonda luzitu, mpi bo ke baka bo diaka ve bonso dikanda. 25  “Yehowa ke tuba nde: ‘Ya kieleka, kaka mutindu mono me tulaka kuwakana na mono ya me tala mwini ti mpimpa,+ bansiku ya zulu mpi ya ntoto,+ 26  mutindu mosi mpi mono ta buya ve ata fioti bana* ya Yakobi mpi ya nsadi na mono Davidi, sambu na kubaka ve na kati ya bana* na yandi bamfumu sambu bo yala bana* ya Abrahami, ya Izaki, mpi ya Yakobi. Sambu mono ta vutula bantu na bo yina kwendaka na kimpika+ mpi mono ta wila bo mawa.’”+

Banoti na nsi ya lutiti

To “muntu ya lunungu yina ta baka dikabu.”
Na kisina, “nkuna.”
Na kisina, “nkuna.”
Na kisina, “nkuna.”
Na kisina, “nkuna.”