Yeremia 29:1-32

  • Mukanda yina Yeremia tindilaka bantu yina vandaka na kimpika na Babilone (1-23)

    • Izraele ta vutuka na nima ya bamvula 70 (10)

  • Nsangu sambu na Shemaya (24-32)

29  Yai bangogo ya mukanda yina mbikudi Yeremia tindaka katuka na Yeruzalemi na bankuluntu yina bikalaka na kati ya bantu ya bo nataka na insi ya nkaka, banganga-nzambi, bambikudi, mpi bantu yonso, yina Nebukadenezare bakaka na Yeruzalemi mpi nataka na Babilone,  na ntangu Yekonia,+ mama ya ntotila,*+ bakapita ya nzo ya ntotila, bamfumu ya Yuda ti ya Yeruzalemi, mpi bantu ya ke salaka bisalu ya maboko ti bantu ya ke salaka bima ya bibende* vandaka me basika na Yeruzalemi.+  Yandi tindaka mukanda yina na maboko ya Elasa mwana ya Shafani+ mpi ya Gemaria mwana ya Hilkia, yina Sidikiya+ ntotila ya Yuda tindaka na Babilone na Nebukadenezare ntotila ya Babilone. Yo vandaka kutuba nde:  “Yai mambu yina Yehowa ya makesa, Nzambi ya Izraele, ke tubila bantu yonso yina bo nataka na insi ya nzenza, yina mono salaka nde bo baka bo na Yeruzalemi mpi bo nata bo na kimpika na Babilone,  ‘Beno tunga banzo mpi beno zinga kuna. Beno kuna bilanga mpi beno dia bima na yo.  Beno kwela bankento mpi beno buta bana ya babakala ti ya bankento; beno kwedila bana na beno ya babakala bankento mpi beno kwedisa bana na beno ya bankento, sambu bo mpi kubuta bana ya babakala ti ya bankento. Beno kuma mingi kuna, kansi ntalu na beno kukulumuka ve.  Beno sosa ngemba ya mbanza yina mono me nata beno, mpi beno samba Yehowa sambu na yo, sambu na ngemba na yo beno ta vanda na ngemba.+  Sambu Yehowa ya makesa, Nzambi ya Izraele, ke tuba nde: “Beno bika ve nde bambikudi na beno mpi banganga-ngombo na beno yina kele na kati na beno kukusa beno,+ mpi beno wa ve bandosi yina bo ke lala.  Sambu ‘bo ke bikudila beno mambu ya luvunu na zina na mono. Mono me tinda bo ve,’+ Yehowa muntu me tuba.”’” 10  “Sambu Yehowa ke tuba nde, ‘Ntangu bamvula 70 ta lunga na Babilone, mono ta tudila beno dikebi,+ mpi mono ta vutula beno na kisika yai+ sambu na kulungisa mambu yina mono tubaka.’ 11  “‘Sambu mono me zaba mbote bangindu yina mono ke yindula sambu na beno,’ Yehowa muntu me tuba, ‘bangindu ya ngemba, kansi ya mpasi ve,+ sambu na kupesa beno makwisa mpi kivuvu.+ 12  Beno ta binga mono, beno ta kwisa, mpi beno ta samba mono, ebuna mono ta wa beno.’+ 13  “‘Beno ta sosa mono mpi beno ta mona mono,+ sambu beno ta sosa mono na ntima na beno ya mvimba.+ 14  Mpi mono ta bika nde beno mona mono,’+ Yehowa muntu me tuba. ‘Mono ta vukisa bantu na beno yina kele na kimpika mpi mono ta vukisa beno katuka na makanda yonso mpi na bisika yonso yina mono panzaka beno,’+ Yehowa muntu me tuba. ‘Mpi mono ta vutula beno na kisika yina mono bakaka beno mpi tindaka beno na insi ya nkaka.’+ 15  “Kansi beno me tuba nde, ‘Yehowa me basisila beto bambikudi na Babilone.’ 16  “Sambu yai mambu yina Yehowa ke tubila ntotila yina me vanda na kiti ya kimfumu ya Davidi+ mpi bantu yonso yina ke zinga na mbanza yai, bampangi na beno yina kwendaka ve ti beno na insi ya nkaka, 17  ‘Yehowa ya makesa ke tuba nde: “Mono ke tindila bo mbele ya bitumba, nzala, mpi kipupa,*+ mpi mono ta kumisa bo bonso bafige ya kupola* yina kele mbi kibeni mpila ya kudia yo kele ve.”’+ 18  “‘Mpi mono ta landa bo ti mbele ya bitumba,+ ti nzala, ti kipupa, ebuna mono ta kumisa bo kima ya ke pesa boma na bimfumu yonso ya nsi-ntoto,+ mpi lusingu, mpi kima ya ke yitukisa, kima ya kubudila mwita,+ mpi kima ya nsoni na kati ya makanda yina mono ke panza bo,+ 19  sambu bo waka ve mambu na mono yina mono tindilaka bo na nzila ya bansadi na mono bambikudi,’ Yehowa muntu me tuba, ‘mono vandaka kutinda bo mbala na mbala.’*+ “‘Kansi beno waka ve,’+ Yehowa muntu me tuba. 20  “Yo yina, beno wa ndinga ya Yehowa, beno yonso bantu yina bo me nataka na insi ya nkaka, bantu yina mono katulaka na Yeruzalemi mpi tindaka na Babilone. 21  Yai mambu yina Yehowa ya makesa, Nzambi ya Izraele, ke tuba sambu na Ahabi mwana ya Kolaya mpi sambu na Sidikiya mwana ya Maaseya, bayina ke bikudila beno mambu ya luvunu na zina na mono,+ ‘Mono ke pesa bo na maboko ya Nebukadenezare* ntotila ya Babilone, mpi yandi ta fwa bo na meso na beno. 22  Mpi mambu yina ke kumina bo ta kuma lusingu yina bantu yonso ya Yuda ya bo me nataka na Babilone ta tubaka: “Bika Yehowa kukumisa nge bonso Sidikiya mpi bonso Ahabi, yina ntotila ya Babilone yokaka na tiya!” 23  sambu bo me sala mambu ya nsoni na Izraele,+ na mutindu bo salaka bizumba ti bankento ya bankweno na bo mpi bo tubaka mambu ya luvunu na zina na mono, mambu yina mono tindaka bo ve.+ “‘“Mono kele Muntu yina me zaba, mpi mono kele mbangi,”+ Yehowa muntu me tuba.’” 24  “Ebuna nge ta tubila Shemaya+ muntu ya Nehelami nde, 25  ‘Yehowa ya makesa, Nzambi ya Izraele, ke tuba nde: “Sambu nge tindaka mikanda na zina na nge na bantu yonso yina kele na Yeruzalemi, na Sefania+ mwana ya Maaseya, nganga-nzambi, mpi na banganga-nzambi yonso nde, 26  ‘Yehowa me tula nge nganga-nzambi na kisika ya nganga-nzambi Yehoyada sambu nge kuma nkengi ya nzo ya Yehowa, sambu nge vanda ti kiyeka ya kutala konso muntu ya kilawu yina ke sala mambu bonso mbikudi mpi kutula yandi na mabaya;*+ 27  ebuna sambu na nki nge me nganina ve Yeremia muntu ya Anatoti,+ yina ke sala mambu bonso mbikudi sambu na beno?+ 28  Sambu ata na Babilone yandi tindilaka beto ndinga nde: “Yo ta baka ntangu mingi! Beno tunga banzo mpi beno zinga kuna. Beno kuna bilanga mpi beno dia bima na yo,+—”’”’” 29  Ntangu nganga-nzambi Sefania+ tangaka mukanda yai na makutu ya mbikudi Yeremia, 30  ndinga ya Yehowa kwisilaka Yeremia nde: 31  “Tindila bantu yonso yina bo me nataka na insi ya nkaka nsangu nde, ‘Yehowa ke tuba sambu na Shemaya muntu ya Nehelami nde: “Sambu Shemaya bikudilaka beno, ata mono tindaka yandi ve, mpi yandi mekaka kunata beno na kutula ntima na mambu ya luvunu,+ 32  yo yina, Yehowa ke tuba nde, ‘Mono ke tudila Shemaya muntu ya Nehelami mpi bana na yandi dikebi. Muntu na yandi mosi ve ta guluka na kati ya bantu yai, mpi yandi ta mona ve mambu ya mbote yina mono ta sadila bantu na mono,’ Yehowa muntu me tuba, ‘sambu yandi me siamisa bantu na kukolama na Yehowa.’”’”

Banoti na nsi ya lutiti

To “nkento ya lukumu.”
To mbala ya nkaka, “bantu ya ke tungaka bibaka ya ngolo ya lutaninu.”
To “maladi.”
To mbala ya nkaka, “ya kupasuka.”
Na kisina, “mono vandaka kutelama na suka-suka mpi kutinda bo.”
Na kisina, “Nebukadrezare,” mutindu ya nkaka ya kusonika yo.
Na kisina, “na mabaya ya kutobula mpi na kibende ya nkingu.”