Yeremia 26:1-24

  • Bo me pesa Yeremia boma nde bo ta fwa yandi (1-15)

  • Yeremia me guluka (16-19)

    • Bo me vutukila mbikudulu ya Mika (18)

  • Mbikudi Uriya (20-24)

26  Na luyantiku ya luyalu ya Yehoyakimi+ mwana ya Yoziasi, ntotila ya Yuda, nsangu yai katukaka na Yehowa:  “Yehowa ke tuba nde, ‘Telama na kibansala ya nzo ya Yehowa mpi tuba sambu na* bantu yonso ya bambanza ya Yuda yina ke kwisa kusamba* na nzo ya Yehowa. Songa bo mambu yonso yina mono ke songa nge; kukatula ve ata diambu mosi.  Mbala ya nkaka bo ta wa mpi konso muntu ta yambula nzila na yandi ya mbi, ebuna mono ta soba mabanza na mono* sambu na mpasi yina mono ke kana kunatila bo sambu na bisalu na bo ya mbi.+  Tubila bo nde: “Yehowa ke tuba nde, ‘Kana beno wila mono ve mpi beno zitisa ve nsiku* na mono yina mono me pesa beno,  mpi beno wa ve bangogo ya bansadi na mono bambikudi yina mono ke tindila beno mbala na mbala,* yina beno me wila ve,+  mono ta kumisa nzo yai bonso Shilo,+ mpi mono ta kumisa mbanza yai kima ya bo me singa sambu na makanda yonso ya nsi-ntoto.’”’”+  Ebuna banganga-nzambi, bambikudi, mpi bantu yonso waka Yeremia ke tuba mambu yai na nzo ya Yehowa.+  Yo yina, ntangu Yeremia manisaka kutuba mambu yonso yina Yehowa songaka yandi na kutubila bantu yonso, banganga-nzambi, bambikudi, mpi bantu yonso kangaka yandi mpi tubaka nde: “Nge ta fwa kibeni.  Sambu na nki nge me bikula na zina ya Yehowa nde, ‘Nzo yai ta kuma bonso Shilo, bo ta bebisa mbanza yai mpi yo ta bikala kukonda bantu’?” Ebuna bantu yonso vukanaka na nziunga ya Yeremia na nzo ya Yehowa. 10  Ntangu bamfumu ya Yuda waka mambu yai, bo katukaka na nzo ya ntotila mpi bo kwisaka na nzo ya Yehowa ebuna bo vandaka na munoko ya kielo ya mpa ya nzo ya Yehowa.+ 11  Banganga-nzambi ti bambikudi tubilaka bamfumu mpi bantu yonso nde: “Muntu yai me fwana na kubaka ndola ya lufwa,+ sambu yandi me bikula mambu ya mbi sambu na mbanza yai mutindu beno me wa yo na makutu na beno mosi.”+ 12  Ebuna Yeremia tubilaka bamfumu yonso ti bantu yonso nde: “Yehowa muntu tindaka mono na kubikula mambu ya mbi sambu na nzo yai mpi sambu na mbanza yai mambu yonso yina beno me wa.+ 13  Yo yina ntangu yai, beno tomisa banzila na beno mpi bisalu na beno, mpi beno lemfukila ndinga ya Yehowa Nzambi na beno, ebuna Yehowa ta soba mabanza na yandi* sambu na mpasi yina yandi me tuba sambu na beno.+ 14  Kansi mono, mono kele na maboko na beno. Beno sala mono mambu yonso yina beno me mona nde yo me fwana mpi yo kele mbote na meso na beno. 15  Kansi kana beno fwa mono, beno zaba kibeni nde, beno ta tula menga ya muntu yina me sala mbi ve na zulu na beno mosi, na zulu ya mbanza yai, mpi na zulu ya bantu na yo, sambu ya kieleka Yehowa muntu tindaka mono na beno sambu na kutuba mambu yai yonso na makutu na beno.” 16  Ebuna bamfumu mpi bantu yonso tubilaka banganga-nzambi ti bambikudi nde: “Muntu yai me fwana ve na kubaka ndola ya lufwa, sambu yandi tubilaka beto na zina ya Yehowa Nzambi na beto.” 17  Diaka, bankuluntu ya nkaka ya insi telamaka mpi yantikaka kutubila dibundu ya mvimba nde: 18  “Mika+ ya Moresheti vandaka kubikula na bilumbu ya Ezekiasi+ ntotila ya Yuda, mpi yandi tubilaka bantu yonso ya Yuda nde, ‘Yehowa ya makesa ke tuba nde: “Bo ta bundula Sioni bonso kilanga,Yeruzalemi ta kuma mayumbu,+Mpi ngumba ya Nzo* ta kuma bonso bangumba na mfinda.”’*+ 19  “Keti Ezekiasi ntotila ya Yuda mpi Yuda ya mvimba fwaka yandi? Keti yandi waka ve Yehowa boma mpi keti yandi bondilaka ve Yehowa sambu yandi wila bo mawa,* yo yina Yehowa sobaka mabanza na yandi* sambu na mpasi yina yandi tubaka sambu na bo?+ Yo yina beto ke zola kudinatila mpasi ya ngolo.* 20  “Kuvandaka mpi ti muntu ya nkaka yina vandaka kubikula na zina ya Yehowa, Uriya mwana ya Shemaya muntu ya Kiriati-yearimi,+ yina bikulaka mambu ya mbi sambu na mbanza yai mpi sambu na insi yai ti bangogo bonso ya Yeremia. 21  Ntotila Yehoyakimi,+ bantu na yandi yonso ya ngolo, mpi bamfumu yonso waka mambu yina yandi tubaka, ebuna ntotila sosaka kufwa yandi.+ Ntangu Uriya waka yo, na mbala mosi yandi waka boma mpi yandi tinaka na Ezipte. 22  Ebuna ntotila Yehoyakimi tindaka Elnatani+ mwana ya Akbore ti bantu ya nkaka kumosi ti yandi na Ezipte. 23  Bo bakaka Uriya na Ezipte mpi bo nataka yandi na ntotila Yehoyakimi; ntotila fwaka yandi na mbele ya bitumba+ mpi losaka mvumbi na yandi na maziamu ya bantu ya mpamba.” 24  Kansi Ahikami+ mwana ya Shafani+ sadisaka Yeremia, yo yina bo pesaka yandi ve na maboko ya bantu sambu bo fwa yandi.+

Banoti na nsi ya lutiti

To “tuba na.”
To “kufukama.”
To “ta wa mawa.”
To “malongi.”
Na kisina, “mono ke telama na suka-suka mpi ke tindila beno.”
To “ta wa mawa.”
To “ngumba ya tempelo.”
To “bonso nsongi ya ngumba ya me fuluka ti banti.”
To “sosaka ve kulembika luse ya Yehowa.”
To “waka mawa.”
To “kunata mpasi ya ngolo na mioyo na beto.”