Kuyantika 32:1-32

  • Bawanzio me kutana ti Yakobi (1, 2)

  • Yakobi ke yilama sambu na kukutana ti Ezau (3-23)

  • Yakobi me nwana ti wanzio (24-32)

    • Zina ya Yakobi me kuma Izraele (28)

32  Ebuna Yakobi simbaka nzila mpi kwendaka, mpi bawanzio ya Nzambi kutanaka ti yandi.  Ntangu yandi monaka bo, Yakobi tubaka nde: “Yai camp ya Nzambi!” Yo yina yandi pesaka kisika yina zina Mahanayimi.*  Ebuna Yakobi tindaka binati-nsangu na ntwala na yandi na mpangi na yandi Ezau na insi ya Seire,+ na ntoto* ya Edomi,+  mpi yandi songaka bo nde: “Beno ta tubila mfumu na mono Ezau nde, ‘Nsadi na nge Yakobi ke tuba nde: “Mono zingaka* ti Labani ntangu mingi tii bubu yai.+  Mono me baka bangombe, bampunda, mameme, mpi bansadi ya babakala ti ya bankento,+ mpi mono ke tindila mfumu na mono nsangu yai, sambu nge me ndima mono.”’”  Na nima, binati-nsangu vutukaka na Yakobi mpi tubaka nde: “Beto me kutana ti mpangi na nge Ezau, mpi ntangu yai yandi ke kwisa kukutana ti nge, mpi yandi kele ti bantu 400.”+  Ebuna Yakobi waka boma mingi mpi kudiyangisaka.+ Yo yina yandi kabulaka bantu yina vandaka ti yandi, mameme, bangombe, mpi bashamo, na bacamp zole.  Yandi tubaka nde: “Kana Ezau kunwanisa camp mosi, camp ya nkaka ta tina.”  Na nima Yakobi tubaka nde: “O Nzambi ya tata na mono Abrahami mpi Nzambi ya tata na mono Izaki, O Yehowa, nge muntu ke tubila mono nde, ‘Vutuka na insi na nge mpi na bampangi na nge, mpi mono ta sadila nge mambu ya mbote,’+ 10  mono me fwana ve na kubaka zola yonso ya kwikama mpi kwikama yonso yina nge me monisila nsadi na nge,+ sambu mono sabukaka Yordani yai kaka ti nti na mono, mpi ntangu yai mono me kuma ti bacamp zole.+ 11  Mono ke bondila nge,+ gulusa mono na maboko ya mpangi na mono Ezau, sambu mono ke wa yandi boma nde yandi lenda kwisa kunwanisa mono+ ti bamama mpi bana na bo. 12  Ebuna nge tubaka nde: ‘Mono ta sadila nge kibeni mambu ya mbote, mpi mono ta kumisa bana* na nge bonso bambuma ya zelo ya nzadi-mungwa, yina bo lenda tanga ve sambu yo kele mingi.’”+ 13  Na nima, yandi lalaka pana. Ebuna yandi bakaka ndambu ya bima na yandi bonso dikabu sambu na mpangi na yandi Ezau:+ 14  bankombo ya bankento 200, bankombo ya babakala 20, mameme ya bankento 200, mameme ya babakala 20, 15  bashamo 30 ya ke nwisa bana na yo, bangombe ya bankento 40, bangombe ya babakala 10, bampunda ya bankento 20 mpi bampunda ya babakala ya kuyela 10.+ 16  Yandi pesaka yo na bansadi na yandi, kimvuka mosi na nima ya kimvuka ya nkaka, mpi yandi tubilaka bansadi na yandi nde: “Beno sabuka na ntwala na mono, mpi beno fwete bika kitamina na kati ya kimvuka mosi mpi kimvuka yina ke landa.” 17  Yandi songaka mpi muntu ya ntete nde: “Kana mpangi na mono Ezau kukutana ti nge mpi kuyula nde, ‘Nge kele muntu ya nani, mpi nge ke kwenda na wapi, mpi bambisi yina kele na ntwala na nge kele ya nani?’ 18  nge fwete tuba nde, ‘Ya nsadi na nge Yakobi. Yo kele dikabu yina yandi me tindila mfumu na mono, Ezau,+ yandi mosi kele mpi na nima na beto.’” 19  Yandi songaka mpi muntu ya zole, muntu ya tatu, mpi bantu yonso yina vandaka kulanda bimvuka yina nde: “Beno ta tubila Ezau mutindu yai ntangu beno ta kutana ti yandi. 20  Beno fwete tuba mpi nde, ‘Nsadi na nge Yakobi kele na nima na beto.’” Sambu yandi kuditubilaka nde: ‘Kana mono tindila yandi dikabu na ntwala, mono ta lembika ntima na yandi,+ ebuna ntangu mono ta mona yandi, mbala ya nkaka yandi ta yamba mono mbote.’ 21  Yo yina dikabu sabukaka na ntwala na yandi, kansi yandi mosi lalaka na camp. 22  Na nima, na mpimpa yina, yandi telamaka mpi bakaka bankento na yandi zole+ ti bansadi na yandi zole ya bankento+ ti bana na yandi ya babakala 11 mpi bo sabukaka masa ya Yaboki+ na kisika ya bo ke sabukaka na makulu. 23  Yo yina yandi bakaka bo mpi sabukaka masa* ti bo, ebuna yandi sabukaka mpi ti bima yonso ya nkaka yina yandi vandaka na yo. 24  Nsuka-nsuka, Yakobi bikalaka yandi mosi. Ebuna bakala mosi yantikaka kunwana ti yandi tii ntongo tanaka.+ 25  Ntangu yandi monaka nde yandi ke nunga yandi ve, yandi simbaka mukwa ya luketo na yandi; ebuna mukwa ya luketo ya Yakobi katukaka na kisika na yo ntangu yandi vandaka kunwana ti yandi.+ 26  Na nima yandi tubaka nde: “Bika mono, mono kwenda, sambu ntongo ke zola kutana.” Ebuna yandi tubaka nde: “Mono ta bika nge ve tii kuna nge ta sakumuna mono.”+ 27  Yo yina yandi tubilaka yandi nde: “Zina na nge nani?” yandi tubaka nde: “Yakobi.” 28  Ebuna yandi tubaka nde: “Zina na nge ta vanda diaka ve Yakobi kansi Izraele,*+ sambu nge me nwana ti Nzambi+ mpi ti bantu mpi nsuka-nsuka nge me nunga.” 29  Na nima Yakobi yulaka yandi nde: “Pardo, songa mono zina na nge.” Kansi yandi tubaka nde: “Sambu na nki nge ke yula zina na mono?”+ Ebuna yandi sakumunaka yandi pana. 30  Yo yina Yakobi pesaka kisika yina zina Peniele,*+ sambu yandi tubaka nde, “Mono me mona Nzambi na meso, kansi luzingu* na mono me guluka.”+ 31  Mpi ntangu yantikaka kubasika ntangu yandi vandaka kuluta na Penuele,* kansi yandi vandaka kutambula kifu sambu na luketo na yandi.+ 32  Yo yina tii bubu yai, bana ya Izraele ke diaka ve musisa ya mbendi* yina ke vandaka kisika mikwa ya luketo me vukanaka, sambu yandi simbaka musisa ya mbendi ya Yakobi kisika mikwa ya luketo me vukanaka.

Banoti na nsi ya lutiti

Yo ke tendula “Bacamp Zole.”
Na kisina, “nseke.”
To “zingaka bonso munzenza.”
Na kisina, “nkuna.”
To “muwanda ya masa; muwanda.”
Yo ke tendula “Muntu ya Ke Nwana (Ke Kwamina) ti Nzambi” to “Nzambi Ke Nwana.”
Yo ke tendula “Luse ya Nzambi.”
To “moyo.”
To “Peniele.”
Na kisina, “musisa ya banere ya mbendi.”