Kusonga ya Yoane 4:1-11
4 Na nima ya mambu yai, mono monaka kielo mosi ya kukanguka na zulu, mpi ndinga ya ntete ya mono waka ke tuba na mono vandaka bonso mpungi; yo tubaka nde: “Tombuka awa, mpi mono ta songa nge mambu yina fwete salama.”
2 Na nima, mpeve ya Nzambi kwisaka na zulu na mono na mbala mosi, ebuna kiti ya kimfumu vandaka na zulu, mpi muntu mosi vandaka na kiti yina ya kimfumu.+
3 Muntu yina me vanda vandaka kumonika bonso ditadi ya yaspe+ mpi ditadi ya sardwane,* mpi nkongolo yina vandaka kumonika bonso emerode vandaka na nziunga ya kiti ya kimfumu.+
4 Bakiti ya kimfumu 24 vandaka na nziunga ya kiti yina ya kimfumu, mpi mono monaka bankuluntu 24+ me vanda na bakiti yai ya kimfumu, bo me lwata bilele ya zulu ya mpembe, mpi bo vandaka ti bampu ya kimfumu ya wolo na ba-ntu na bo.
5 Nzasi,+ bandinga, mpi makelele ya banzasi vandaka kubasika na kiti ya kimfumu;+ mpi minda nsambwadi ya tiya yina vandaka kupela vandaka na ntwala ya kiti ya kimfumu; minda yina ke monisa bampeve nsambwadi ya Nzambi.+
6 Kima mosi yina vandaka kumonika bonso nzadi-mungwa ya tala-tala,+ bonso kristale, vandaka na ntwala ya kiti ya kimfumu.
Bigangwa iya ya moyo+ yina vandaka ya kufuluka ti meso na ntwala mpi na nima vandaka na kati-kati ya kiti ya kimfumu* mpi na nziunga ya kiti ya kimfumu.
7 Kigangwa ya moyo ya ntete vandaka bonso ntambu;+ kigangwa ya moyo ya zole vandaka bonso mwana-ngombe;+ kigangwa ya moyo ya tatu+ vandaka ti luse bonso luse ya muntu; mpi kigangwa ya moyo ya iya+ vandaka bonso ngo-zulu ya ke pumbuka.+
8 Sambu na bigangwa iya yina ya moyo, konso kigangwa vandaka ti mapapu sambanu; bo vandaka ya kufuluka ti meso na nziunga mpi na nsi ya mapapu.+ Konso ntangu mpi konso kilumbu, bo ke tuba nde: “Santu, santu, santu kele Yehowa*+ Nzambi, Nkwa-Ngolo Yonso, yina vandaka, yina kele, mpi yina ke kwisa.”+
9 Konso ntangu yina bigangwa ya moyo ke pesa nkembo, lukumu, mpi matondo na Muntu yina me vanda na kiti ya kimfumu, Muntu yina ke zingaka mvula na mvula,+
10 bankuluntu 24+ ke fukama na ntwala ya Muntu yina me vanda na kiti ya kimfumu mpi bo ke sambila Muntu yina ke zingaka mvula na mvula; bo ke losa bampu na bo ya kimfumu na ntwala ya kiti ya kimfumu, mpi bo ke tuba nde:
11 “Yehowa* Nzambi na beto, nge me fwana na kubaka nkembo,+ lukumu,+ mpi ngolo,+ sambu nge muntu gangaka bima yonso,+ mpi yo kwisaka na luzingu mpi yo gangamaka sambu na luzolo na nge.”
Banoti na nsi ya lutiti
^ To “ditadi ya ntalu ya mbwaki.”
^ To “na kati-kati ti kiti ya kimfumu.”
^ Tala Bangindu ya Ngika A5.
^ Tala Bangindu ya Ngika A5.
