Kusonga 15:1-8

  • Bawanzio nsambwadi ti bampasi nsambwadi (1-8)

    • Nkunga ya Moize mpi ya Mwana-Dimeme (3, 4)

15  Mono monaka kidimbu ya nkaka na zulu, ya nene mpi ya kuyituka: bawanzio nsambwadi+ ti bampasi nsambwadi. Yo kele bampasi ya nsuka, sambu na nzila na yo, makasi ya Nzambi ta kuma na nsuka.+  Ebuna mono monaka kima mosi yina vandaka bonso nzadi-mungwa ya tala-tala;+ yo me vukana ti tiya. Mono monaka mpi bantu yina me nunga+ mbisi ya mfinda, kifwani na yo,+ mpi ntalu ya zina na yo.+ Bo me telama pene-pene ya nzadi-mungwa yina ya tala-tala, bo me simba bakidare ya Nzambi.  Bo vandaka kuyimba nkunga ya Moize+ mpika ya Nzambi mpi nkunga ya Mwana-Dimeme+ nde: “Yehowa* Nzambi, Nkwa-Ngolo Yonso,+ bisalu na nge kele ya nene mpi ya kuyituka.+ Ntotila ya kukonda nsuka,+ banzila na nge kele ya lunungu mpi ya kieleka.+  Yehowa,* nani ta wa nge boma ve, mpi ta pesa ve zina na nge nkembo, sambu nge mpamba kele ya kwikama?+ Sambu makanda yonso ta kwisa mpi ta sambila na ntwala na nge,+ sambu bansiku na nge ya lunungu me monanaka.”  Na nima, mono monaka kisika ya santu ya tenta ya kimbangi+ mpi yo vandaka ya kukanguka na zulu,+  mpi bawanzio nsambwadi+ yina vandaka ti bampasi nsambwadi basikaka na kisika ya santu, bo me lwata lino ya mpembe mpi ya ke ngenga mpi bo me lwata mikaba ya wolo na bantulu na bo.  Kigangwa mosi na kati ya bigangwa iya ya moyo pesaka bawanzio nsambwadi babolo nsambwadi ya wolo yina vandaka ya kufuluka ti makasi ya Nzambi+ yina ke zingaka mvula na mvula.  Kisika ya santu fulukaka ti midinga sambu na nkembo ya Nzambi+ mpi sambu na ngolo na yandi, mpi muntu mosi ve vandaka na mpila ya kukota na kisika ya santu tii kuna bampasi nsambwadi+ ya bawanzio nsambwadi manaka.

Banoti na nsi ya lutiti