Kulonga 5:1-33

  • Kuwakana ya Yehowa na Orebi (1-5)

  • Bo me vutukila Bansiku Kumi (6-22)

  • Bantu me wa boma na Ngumba ya Sinai (23-33)

5  Ebuna Moize bingaka Izraele ya mvimba mpi tubilaka bo nde: “O Izraele, wa bansiku ti bankanu yina mono ke zabisa beno bubu yai, beno fwete longuka yo mpi kuzitisa yo mbote-mbote.  Yehowa Nzambi na beto salaka kuwakana ti beto na Orebi.+  Yehowa salaka ve kuwakana yai ti ba-nkaka na beto, kansi yandi salaka yo ti beto, beto yonso ya kele na luzingu awa bubu yai.  Yehowa tubilaka beno meso na meso na ngumba, na kati ya tiya.+  Na ntangu yina,+ mono vandaka ya kutelama na kati-kati ya Yehowa ti beno sambu na kuzabisa beno ndinga ya Yehowa, mpamba ve beno waka boma ya tiya mpi beno tombukaka ve na ngumba.+ Yandi tubaka nde:  ‘Mono kele Yehowa Nzambi na nge, yina basisaka nge na insi ya Ezipte, na nzo ya kimpika.+  Nge fwete vanda ve ata fioti ti banzambi ya nkaka katula mono.*+  ‘Nge fwete kudisadila ve kiteki+ to kima mosi* ya me fwanana ti konso kima yina kele na zulu to na ntoto to na masa yina kele na nsi ya ntoto.  Nge fwete fukimina yo ve to kubika nde bo nata nge na kusadila yo,+ sambu mono Yehowa Nzambi na nge, mono kele Nzambi yina ke lombaka nde bo kangama kaka na yandi,+ yina sambu na kifu ya batata ke pesaka ndola na bana, na ndonga ya tatu ya bantu, mpi na ndonga ya iya ya bantu yina ke mengaka mono,+ 10  kansi yina ke monisaka zola ya kwikama* na mafunda ya bandonga ya bantu yina ke zolaka mono mpi ke zitisaka bansiku na mono. 11  “‘Nge fwete sadila ve zina ya Yehowa Nzambi na nge na mutindu ya mbi,+ sambu Yehowa ta pesa ndola na konso muntu yina ke sadila zina na yandi na mutindu ya mbi.+ 12  “‘Zitisa kilumbu ya Kisabatu sambu yo landa kuvanda ya santu, kaka mutindu Yehowa Nzambi na nge songaka nge.+ 13  Nge ta sala kisalu ya ngolo mpi kisalu na nge yonso na bilumbu sambanu,+ 14  kansi kilumbu ya nsambwadi kele kisabatu sambu na Yehowa Nzambi na nge.+ Nge fwete sala ve ata kisalu mosi,+ yo vanda nge, mwana na nge ya bakala, mwana na nge ya nkento, mpika na nge ya bakala, mpika na nge ya nkento, ngombe na nge ya bakala, mpunda na nge to konso mbisi na nge ya bwala, to munzenza yina kele na bambanza*+ na nge, na mpila nde mpika na nge ya bakala mpi mpika na nge ya nkento kupema bonso nge.+ 15  Yibuka nde nge kumaka mpika na insi ya Ezipte mpi nde Yehowa Nzambi na nge basisaka nge kuna ti diboko ya ngolo mpi ya kutandula.+ Yo yina Yehowa Nzambi na nge songaka nge na kuzitisa kilumbu ya Kisabatu. 16  “‘Kumisa tata na nge ti mama na nge,+ kaka mutindu Yehowa Nzambi na nge songaka nge, sambu nge zinga mingi mpi nge toma* na insi yina Yehowa Nzambi na nge ke pesa nge.+ 17  “‘Nge fwete fwa ve muntu.+ 18  “‘Nge fwete sala mpi ve bizumba.+ 19  “‘Nge fwete yiba mpi ve.+ 20  “‘Nge fwete tuba ve mambu ya luvunu ntangu nge ke ta kimbangi sambu na nkweno na nge.+ 21  “‘Nge fwete yuma ve ntima sambu na nkento ya nkweno na nge.+ Nge fwete yuma mpi ve ntima na bwimi yonso sambu na nzo ya nkweno na nge, kilanga na yandi, mpika na yandi ya bakala, mpika na yandi ya nkento, ngombe na yandi, mpunda na yandi, to sambu na konso kima ya nkweno na nge.’+ 22  “Yehowa pesaka bantuma* yai na dibundu na beno ya mvimba na ngumba, na kati ya tiya, ya dituti, mpi ya mpimpa ya ngolo,+ na ndinga ya ngolo, mpi yandi yikaka ve kima ya nkaka na zulu; ebuna yandi sonikaka yo na zulu ya matadi zole mpi pesaka mono yo.+ 23  “Kansi, ntangu beno waka ndinga na kati ya mpimpa, na ntangu ngumba vandaka kupela tiya,+ bamfumu yonso ya makanda na beno mpi bankuluntu pusanaka pene-pene na mono. 24  Ebuna beno tubaka nde, ‘Ntangu yai, Yehowa Nzambi na beto me songa beto nkembo na yandi ti bunene na yandi, mpi beto me wa ndinga na yandi na kati ya tiya.+ Bubu yai beto me mona nde Nzambi lenda solula ti muntu mpi muntu yango lenda bikala na luzingu.+ 25  Sambu na nki beto fwete fwa? Mpamba ve tiya yai ya ngolo lenda yoka beto. Kana beto landa kuwa ndinga ya Yehowa Nzambi na beto, ntembe kele ve nde beto ta fwa. 26  Sambu, nani na kati ya bantu yonso* me waka ndinga ya Nzambi ya moyo ke tuba na kati ya tiya mutindu beto waka yo kansi yandi landa na kuzinga? 27  Nge mosi fwete kwenda pene-pene sambu na kuwa mambu yonso yina Yehowa Nzambi na beto ta tuba, mpi nge muntu ta songa beto mambu yonso yina Yehowa Nzambi na beto ke tubila nge, ebuna beto ta wa mpi ta sala yo.’+ 28  “Ebuna Yehowa waka mambu yina beno zabisaka mono, mpi Yehowa tubilaka mono nde, ‘Mono me wa mambu yina bantu yai me tubila nge. Mambu yonso yina bo me tuba kele mbote.+ 29  A kana ntangu yonso ntima kupusa bo na kuwa mono boma+ mpi na kuzitisa bantuma na mono yonso;+ mambu ta kwendila mbote kimakulu+ sambu na bo mpi bana na bo! 30  Kwenda songa bo nde: “Beno vutuka na batenta na beno.” 31  Kansi nge, nge fwete bikala awa ti mono, mpi mono ta songa nge bantuma, bansiku, ti bankanu yonso yina nge fwete longa bo mpi yina bo fwete zitisa na ntoto yina mono ke pesa bo sambu bo baka.’ 32  Ntangu yai, beno fwete sala ngolo na kusala kaka mutindu Yehowa Nzambi na beno me songa beno.+ Beno fwete baluka ve na diboko ya kitata to na diboko ya kimama.+ 33  Beno fwete tambula na banzila yonso yina Yehowa Nzambi na beno me songa beno,+ sambu beno zinga, beno toma mpi beno kumisa bilumbu na beno nda na insi yina beno ta baka.+

Banoti na nsi ya lutiti

To “sambu na kutelamina mono.” Na kisina, “sambu na kunwanisa luse na mono.”
To “kifwanisu.”
To “ntima ya mbote.”
Na kisina, “bakielo.”
To “mpi mambu kukwendila mbote sambu na nge.”
Na kisina, “bangogo.”
Na kisina, “nsuni yonso.”