Kulonga 22:1-30
22 “Kana nge mona ngombe to dimeme ya mpangi na nge me vila nzila, kusala ve na luzolo yonso bonso nde nge me mona yo ve.+ Nge fwete vutula yo kibeni na mpangi na nge.
2 Kansi, kana mpangi na nge ke zingaka ve pene-pene ti nge to nge zaba yandi ve, nge fwete nata kitwisi yina na nzo na nge, mpi yo ta bikala ti nge tii kuna mpangi na nge ta sosa yo. Ebuna nge fwete vutudila yandi yo.+
3 Nge fwete sala mutindu yina sambu na mpunda na yandi, sambu na lele na yandi, mpi sambu na konso kima yina mpangi na nge me vidisa mpi yina nge me mona. Nge fwete sala ve bonso nde nge me mona yo ve.
4 Kana nge mona mpunda ya mpangi na nge to ngombe na yandi me bwa na nzila, nge fwete sala ve na luzolo yonso bonso nde nge me mona yo ve. Nge fwete sadisa yandi kibeni na kutedimisa kitwisi yina.+
5 Nkento fwete lwata ve lele ya bakala, bakala mpi fwete lwata ve lele ya nkento. Sambu konso muntu yina ke sala mutindu yina kele nzanzi na meso ya Yehowa Nzambi na nge.
6 Kana nge mona buyamba ya ndeke na lweka ya nzila ti bana-bandeke to maki, yo vanda na zulu ya nti to na ntoto, mpi mama me vandila bana to maki, nge fwete baka ve mama ti bana na yo.+
7 Yambula mama yo kwenda, kansi nge lenda baka bana. Sala mutindu yina na mpila nde mambu kukwendila mbote sambu na nge mpi nge zinga mingi.
8 Kana nge tunga nzo ya mpa, nge fwete tunga mpi kamwa-lupangu sambu na ludi na nge,+ mpidina nge ta nata ve mfuka ya menga na nzo na nge sambu muntu lenda katuka na ludi mpi kubwa.
9 Nge fwete kuna ve bankeni ya mitindu zole+ na kilanga na nge ya vinu. Kana ve, konso kima yina nkeni ya nge kunaka ta basisa mpi mbuma ya kilanga ya vinu, bo ta botula yo mpi ta pesa yo na kisika ya santu.
10 “Nge fwete bundula ve ntoto ti ngombe mpi mpunda kumosi.+
11 “Nge fwete lwata ve lele ya bo me sala na lene ti lino yina bo me vukisa kumosi.+
12 “Nge fwete sala malenda na bansongi iya ya lele yina nge ke lwata.+
13 “Kana bakala mosi me kwela nkento mpi me vukisa nitu ti yandi, kansi na nima yandi kuma kumenga nkento yina,*
14 mpi yandi funda nkento yina nde yandi tambulaka na mutindu ya mbi ebuna yandi bebisa lukumu ya nkento yina mpi kutuba nde: ‘Mono kwelaka nkento yai, kansi ntangu mono vukisaka nitu ti yandi, mono monaka ve nzikisa ya ke monisa nde yandi vandaka mwense,’
15 tata mpi mama ya mwana-nkento yina fwete natila bankuluntu yina kele na kielo ya mbanza nzikisa yina ke monisa nde mwana-nkento yina vandaka mwense.
16 Tata ya mwana-nkento yina fwete tubila bankuluntu nde, ‘Mono pesaka mwana na mono ya nkento na bakala yai sambu yandi vanda nkento na yandi, kansi yandi me menga* yandi
17 mpi ke funda yandi nde yandi tambulaka na mutindu ya mbi mpi ke tuba nde: “Mono me mona nde mwana na nge ya nkento kele ve na nzikisa ya ke monisa nde yandi kele mwense.” Kansi yai kele nzikisa ya ke monisa nde mwana na mono ya nkento vandaka mwense.’ Ebuna bo ta tanda lele na ntwala ya bankuluntu ya mbanza.
18 Bankuluntu+ ya mbanza ta baka bakala yina mpi ta pesa yandi ndola.+
19 Bo ta zengila bakala yina kibawu ya bashekele* 100 ya arza mpi kupesa yo na tata ya mwana-nkento yina, sambu bakala yina me vweza mwense mosi ya Izraele,+ ebuna yandi ta landa kuvanda nkento na yandi. Bakala yina ta vanda ve ti nswa ya kufwa makwela ti mwana-nkento yina ntangu yonso ya yandi kele na luzingu.
20 “Kansi kana mambu yina bo me fundila mwana-nkento yina kele ya kieleka, mpi ata nzikisa mosi ve ke monisa nde mwana-nkento yina vandaka mwense,
21 bo fwete basisa mwana-nkento yina na munoko ya nzo ya tata na yandi, ebuna babakala ya mbanza na yandi fwete fwa yandi na matadi, sambu yandi me sala diambu mosi ya nsoni+ na Izraele mutindu yandi salaka pite* na nzo ya tata na yandi.+ Na mutindu yina nge fwete katula mambu ya mbi na kati na beno.+
22 “Kana bo kanga bakala mosi ke lala nkento ya muntu ya nkaka, bo zole fwete fwa kumosi, bakala yina lalaka ti nkento yina mpi nkento yango.+ Na mutindu yina nge fwete katula kima ya mbi na Izraele.
23 “Kana bakala mosi me silaka mwana-nkento mosi ya mwense na makwela, ebuna bakala ya nkaka me kutana ti mwana-nkento yina na mbanza mpi me lala ti yandi,
24 beno fwete basisa bo yonso zole mpi kunata bo na kielo ya mbanza yina mpi kufwa bo na matadi, mwana-nkento sambu yandi bokaka ve na mbanza mpi bakala sambu yandi pesaka nkento ya nkweno na yandi nsoni.+ Na mutindu yina nge fwete katula mambu ya mbi na kati na beno.
25 “Kansi, kana bakala yango kutanaka ti mwana-nkento yina bo me sila na makwela, na mfinda, ebuna bakala yina kangaka yandi na kingolo-ngolo mpi lalaka ti yandi, bakala yina mpamba lalaka ti yandi muntu fwete fwa,
26 mpi nge fwete sala mwana-nkento yina ata kima mosi ve. Mwana-nkento yina me sala ve disumu yina ke lomba nde yandi fwa. Yo kele kiteso mosi ti muntu yina me nwanisa nkweno na yandi mpi me fwa yandi.*+
27 Sambu bakala yina kutanaka ti mwana-nkento yina na mfinda, ebuna mwana-nkento yina ya bo silaka na makwela bokaka, kansi muntu ya kusadisa yandi vandaka ve.
28 “Kana bakala mosi kukutana ti mwana-nkento mosi ya mwense yina bo me sila ve na makwela, mpi yandi kanga yandi na kingolo-ngolo mpi kulala ti yandi, ebuna bo kanga bo,+
29 bakala yina me lala ti yandi fwete pesa tata ya mwana-nkento yina bashekele 50 ya arza, mpi yandi ta kuma nkento na yandi.+ Sambu yandi pesaka mwana-nkento yina nsoni, yandi ta vanda ve ti nswa ya kufwa makwela ti yandi ntangu yonso ya yandi kele na luzingu.
30 “Ata muntu mosi ve fwete baka nkento ya tata na yandi, sambu yandi katula ve tata na yandi lukumu.*+
Banoti na nsi ya lutiti
^ To “na nima yandi buya nkento yina.”
^ To “buya.”
^ Shekele mosi kele bagrame 11,4. Tala Bangindu ya Ngika B14.
^ To “kindumba.”
^ To “me fwa yandi, moyo.”
^ Na kisina, “mona ve nsongi ya lele ya tata na yandi.”
