Kulonga 16:1-22

  • Paki; Nkinsi ya Mampa ya Kukonda Levire (1-8)

  • Nkinsi ya Bamposo (9-12)

  • Nkinsi ya Bisasa (13-17)

  • Kutula bazuzi (18-20)

  • Bima yina Nzambi buyisaka na lusambu (21, 22)

16  “Zitisa ngonda ya Abibi,* mpi sala nkinsi ya Paki sambu na Yehowa Nzambi na nge,+ sambu Yehowa Nzambi na nge basisaka nge na Ezipte na ngonda ya Abibi na mpimpa.+  Nge fwete tambika dikabu ya Paki na Yehowa Nzambi na nge,+ dikabu ya me katuka na mameme mpi na bangombe,+ na kisika yina Yehowa me sola sambu zina na yandi kuvanda.+  Nge fwete dia ve ata kima mosi ya bo me tula levire kumosi ti kimenga yina;+ bilumbu nsambwadi nge fwete dia dimpa ya kukonda levire, dimpa ya bampasi, sambu nge basikaka na insi ya Ezipte ntinu-ntinu.+ Sala mutindu yina ntangu yonso ya nge kele na luzingu, sambu nge yibuka kilumbu yina nge basikaka na insi ya Ezipte.+  Na nsungi ya bilumbu nsambwadi,+ bo fwete mona nge ve ata ti pate ya ngani na nziunga na nge ya mvimba, mpi ata ndambu ya musuni mosi ve yina nge ta pesa kimenga na nkokila ya kilumbu ya ntete fwete bikala mpimpa ya mvimba tii na suka ya kilumbu yina me landa.+  Nge ta vanda ve ti nswa ya kutambika dikabu ya Paki na konso mbanza yina kele na kati ya bambanza yina Yehowa Nzambi na nge ke pesa nge.  Kansi nge fwete sala yo na kisika yina Yehowa Nzambi na nge me pona sambu zina na yandi kuvanda. Nge fwete tambika dikabu ya Paki na nkokila kaka na ntangu ntangu ke dinda,+ na ntangu yina nge basikaka na Ezipte.  Nge fwete lamba yo mpi kudia yo+ na kisika yina Yehowa Nzambi na nge ta sola,+ ebuna na suka nge lenda vutuka na batenta na nge.  Nge fwete dia mampa ya kukonda levire bilumbu sambanu, mpi na kilumbu ya nsambwadi, yo ta vanda ti lukutakanu mosi ya santu sambu na Yehowa Nzambi na nge. Nge fwete sala ve ata kisalu mosi.+  Nge fwete tanga bamposo nsambwadi. Nge fwete yantika kutanga bamposo nsambwadi katuka na ntangu yina nge tulaka mbele na mbala ya ntete na mbuma yina bo me katula ntete ve.+ 10  Ebuna nge fwete sala Nkinsi ya Bamposo sambu na Yehowa Nzambi na nge+ ti dikabu ya luzolo ya mbote ya me katuka na maboko na nge, ya nge ta pesa na kiteso yina Yehowa Nzambi na nge me sakumuna nge.+ 11  Nge fwete vanda na kiese na ntwala ya Yehowa Nzambi na nge, nge ti mwana na nge ya bakala, mwana na nge ya nkento, mpika na nge ya bakala, mpika na nge ya nkento, Mulevi yina kele na kati ya bambanza* na nge, munzenza, mwana yina me konda tata,* mpi mufwidi ya nkento, bayina kele na kati na beno, na kisika yina Yehowa Nzambi na nge me pona sambu zina na yandi kuvanda.+ 12  Yibuka nde nge kumaka mpika na Ezipte,+ ebuna zitisa mpi landa bansiku yai. 13  “Nge fwete sala Nkinsi ya Bisasa*+ bilumbu nsambwadi ntangu nge ke vukisa bima ya me katuka na kisika na nge ya bo ke tutaka bambuma sambu na kukatula yo bampusu mpi na kikamuninu na nge ya mafuta mpi ya vinu. 14  Na nsungi ya nkinsi+ na nge, vanda na kiese, nge ti mwana na nge ya bakala, mwana na nge ya nkento, mpika na nge ya bakala, mpika na nge ya nkento, Mulevi, munzenza, mwana yina me konda tata, mpi mufwidi ya nkento, bayina kele na kati ya bambanza na nge. 15  Bilumbu nsambwadi nge ta sala nkinsi+ sambu na Yehowa Nzambi na nge na kisika yina Yehowa me sola, sambu Yehowa Nzambi na nge ta sakumuna bima na nge yonso mpi mambu yonso yina nge ta sala,+ ebuna nge ta vanda kaka na kiese.+ 16  “Babakala na nge yonso fwete kwenda na ntwala ya Yehowa Nzambi na nge na kisika yina yandi me sola, mbala tatu na mvula: na Nkinsi ya Mampa ya Kukonda Levire,+ na Nkinsi ya Bamposo,+ mpi na Nkinsi ya Bisasa,*+ mpi ata muntu mosi ve na kati na bo fwete kwenda na ntwala ya Yehowa maboko-mpamba. 17  Dikabu yina konso muntu ke nata fwete vanda na kuwakana ti lusakumunu yina Yehowa Nzambi na nge me pesa nge.+ 18  “Nge fwete tula bazuzi+ mpi bakapita sambu na konso dikanda na bambanza yonso* yina Yehowa Nzambi na nge ke pesa nge, mpi bo fwete sambisa bantu na lunungu. 19  Nge fwete sambisa ve mambu na mutindu ya mbi,+ kupona-pona,+ to kundima avoka, sambu kundima avoka ke kangaka meso ya muntu ya mayele+ mpi ke bebisaka mambu yina muntu ya lunungu ke tuba. 20  Landa lunungu mpi kaka lunungu,+ sambu nge landa kuzinga mpi kubaka insi yina Yehowa Nzambi na nge ke pesa nge. 21  “Nge fwete kuna ve nti ya konso mutindu yina sambu yo kuma nti ya santu*+ pene-pene ya mesa-kimenga yina nge ke sala sambu na Yehowa Nzambi na nge. 22  “Nge fwete tedimisa mpi ve dikunzi mosi ya santu sambu na nge mosi,+ yo kele kima yina Yehowa Nzambi na nge ke mengaka.

Banoti na nsi ya lutiti

Na kisina, “bakielo.”
To “mwana-nsiona.”
To “Bisika ya Kuzinga ya Ntangu Fioti.”
To “Bisika ya Kuzinga ya Ntangu Fioti.”
Na kisina, “na kati ya bakielo na nge yonso.”