Ezekiele 6:1-14

  • Mambu ya mbi sambu na bangumba ya Izraele (1-14)

    • Bo ta vweza biteki ya nzanzi (4-6)

    • “Beno ta zaba nde mono kele Yehowa” (7)

6  Ndinga ya Yehowa kwisilaka mono diaka nde:  “Mwana ya muntu, balula luse na nge na ndambu ya bangumba ya Izraele mpi bikula mambu sambu na yo.  Nge fwete tuba nde, ‘O bangumba ya Izraele, beno wa ndinga ya Yehowa Mfumu ya Kuluta Nene: Yai mambu yina Yehowa Mfumu ya Kuluta Nene ke tuba na bangumba ya nene, na bangumba ya fioti, na bamasa ya fioti, mpi na miwanda: “Tala! Mono ta nata mbele ya bitumba sambu na kunwanisa beno, mpi mono ta fwa bisika na beno ya kunanguka.  Bo ta fwa bamesa-kimenga na beno, bo ta buka bamesa-kimenga na beno ya ndumbu,+ mpi bantu na beno yina bo ta fwa, mono ta losa bo na ntwala ya biteki na beno ya nzanzi.*+  Mono ta losa bamvumbi ya bantu ya Izraele na ntwala ya biteki na bo ya nzanzi, mpi mono ta panza mikwa na beno na nziunga ya bamesa-kimenga na beno.+  Na bisika yonso yina beno ke zingaka, bo ta bebisa bambanza mpi bo ta fwa bisika ya kunanguka+ mpi yo ta bikala ya kubeba.+ Bo ta buka bamesa-kimenga na beno mpi bo ta panza yo, biteki na beno ya nzanzi ta beba, bamesa-kimenga na beno ya ndumbu bo ta buka yo, mpi bo ta katula bisalu na beno.  Ebuna bantu yina bo ta fwa ta bwa na kati-kati na beno,+ mpi beno ta zaba nde mono kele Yehowa.+  “‘“Kansi mono ta bikisa ndambu ya bantu yina ta bikala, sambu bantu ya nkaka na kati na beno ta guluka na mbele ya bitumba na kati ya makanda ntangu beno ta panzana na bansi mingi.+  Ebuna bantu yina ta guluka ta yibuka mono na kati ya makanda kisika bo ta nata bo na kimpika.+ Bo ta bakisa nde mono waka mpasi na ntima sambu na ntima na bo ya kukonda kwikama* yina buyaka kulanda mono+ mpi meso na bo yina kele ti nzala ya ngolo ya* biteki na bo ya nzanzi.+ Bo ta wa nsoni mpi ta menga mambu yonso ya mbi mpi ya nzanzi yina bo me salaka.+ 10  Bo ta zaba nde mono kele Yehowa mpi nde balukebisu ya mono vandaka kupesa ya kunatila bo mpasi yai vandaka ve ya mpamba.”’+ 11  “Yehowa Mfumu ya Kuluta Nene me tuba nde: ‘Bula maboko, bula makulu, mpi monisa mawa sambu na mambu yonso ya mbi mpi ya nzanzi yina nzo ya Izraele me salaka, sambu bo ta fwa na mbele ya bitumba, na nzala, mpi na kipupa.+ 12  Muntu yina kele ntama ta fwa na kipupa, muntu yina kele pene-pene ta fwa na mbele ya bitumba, mpi konso muntu yina ta guluka na bima yai mpi ta bikala, yandi ta fwa na nzala; ebuna mono ta yambula kibeni makasi na mono sambu yo bwila bo.+ 13  Ebuna beno ta zaba nde mono kele Yehowa,+ ntangu bantu na bo yina ta fwa ta lala na kati-kati ya biteki na bo ya nzanzi, na nziunga ya bamesa-kimenga na bo,+ na zulu ya konso ngumba ya fioti, na zulu ya bansongi yonso ya bangumba, na nsi ya konso nti yina kele ti matiti mingi, mpi na nsi ya balutangu ya banti ya nene kisika yina bo me pesaka bimenga ya nsudi ya kitoko* sambu na kulembika biteki na bo yonso ya nzanzi.+ 14  Mono ta tandula diboko na mono sambu na kupesa bo ndola mpi ta sala nde insi kubikala mpamba, mpi bisika na bo yonso ya bo ke zingaka ta kuma mpamba kuluta ntoto-makanga yina kele pene-pene ya Dibla. Ebuna bo ta zaba nde mono kele Yehowa.’”

Banoti na nsi ya lutiti

Ngogo ya Kiebreo ya bo me sadila awa lenda vanda na kuwakana ti ngogo “tufi” mpi bo me sadila yo sambu na kuvweza.
To “ya mansoni; ya kisaka-saka.”
To “yina ke landa na mansoni yonso.”
To “pesaka bansudi ya kitoko.”