Ezekiele 21:1-32

  • Nzambi me basisa mbele ya kusambisa na poshi na yo (1-17)

  • Ntotila ya Babilone ta nwanisa Yeruzalemi (18-24)

  • Bo ta katula mfumu ya mbi ya Izraele (25-27)

    • “Katula mpu ya kimfumu” (26)

    • “Tii kuna muntu yina kele na nswa ya me fwana ta kwisa” (27)

  • Mbele ya bitumba sambu na kunwanisa bantu ya Amoni (28-32)

21  Ndinga ya Yehowa kwisilaka mono diaka nde:  “Mwana ya muntu, balula luse na nge na ndambu ya Yeruzalemi, mpi samuna sambu na bisika ya santu, mpi bikula mambu ya mbi sambu na insi ya Izraele.  Tubila insi ya Izraele nde, ‘Yehowa me tuba nde: “Mono ke nwanisa nge, ebuna mono ta basisa mbele na mono ya bitumba na poshi na yo+ mpi ta katula muntu ya lunungu ti muntu ya mbi na kati na nge.  Sambu mono ta katula muntu ya lunungu ti muntu ya mbi na kati na nge, mbele na mono ya bitumba ta basika na poshi na yo sambu na kunwanisa bantu* yonso, yantika na sudi tii na nordi.  Bantu yonso ta zaba nde mono, Yehowa, mono muntu me basisa mbele na mono ya bitumba na poshi na yo. Yo ta vutuka diaka ve.”’+  “Ebuna nge, mwana ya muntu, dila ntangu nge* ke tekita, ee, dila ngolo na ntwala na bo.+  Mpi kana bo tubila nge nde, ‘Sambu na nki nge ke dila?’ nge ta tuba nde, ‘Sambu na nsangu mosi.’ Sambu yo ta kwisa kibeni, ebuna konso ntima ta lemba sambu na boma, konso diboko ta kuma pete-pete, konso muntu ta lemba mpi konso dibolongo ta nokisa masa mingi.*+ ‘Tala! Yo ta kwisa kibeni—yo ta salama,’ Yehowa Mfumu ya Kuluta Nene muntu me tuba.”  Ndinga ya Yehowa kwisilaka mono diaka nde:  “Mwana ya muntu, bikula mpi tuba nde, ‘Yehowa me tuba nde: “Tuba, ‘Mbele ya bitumba! Bo me tula mbele ya bitumba makasi,+ mpi bo me ngengisa yo. 10  Bo me tula yo makasi sambu na kufwa bantu mingi; bo me ngengisa yo sambu yo sema bonso nsemo ya nzasi.’”’” “Keti beto fwete wa ve kiese?” “‘Keti yo* ta buya muhangu ya mwana na mono mosi,+ mutindu yo ke buyaka konso nti? 11  “‘Bo me pesa yo sambu bo ngengisa yo mpi bo sadila yo na diboko. Bo me tula mbele yai ya bitumba makasi mpi me ngengisa yo, sambu na kutula yo na diboko ya muntu ya ke fwaka bantu.+ 12  “‘Mwana ya muntu, boka mpi dila,+ sambu yo me kwisa kunwanisa bantu na mono; yo ke nwanisa bamfumu yonso ya Izraele.+ Bantu yai ta fwa na mbele ya bitumba kumosi ti bantu na mono. Yo yina bula mbendi na nge sambu na mawa. 13  Sambu bo me meka mbele ya bitumba,+ inki ta salama kana mbele yina ya bitumba kubuya muhangu? Yo* ta vanda diaka ve,’+ Yehowa Mfumu ya Kuluta Nene muntu me tuba. 14  “Ebuna nge, mwana ya muntu, bikula mpi bula maboko na nge mpi tuba mbala tatu nde, ‘Mbele ya bitumba!’ Yo kele mbele ya bitumba ya bantu yina bo me fwa, mbele ya bitumba ya bantu mingi ya bo me fwa, yina me ziunga bo.+ 15  Bantima na bo ta lemba sambu na boma+ mpi bantu mingi ta bwa na bakielo ya mbanza na bo; mono ta fwa bantu na mbele ya bitumba. Ee, yo ke sema bonso nsemo ya nzasi mpi bo me ngengisa yo sambu na kufwa bantu! 16  Zenga na makasi yonso na ndambu ya diboko ya kitata! Baluka na ndambu ya diboko ya kimama! Kwenda konso ndambu yina kibende na nge ke kwenda! 17  Mono ta bula mpi maboko mpi ta manisa makasi na mono.+ Mono mosi, Yehowa, muntu me tuba.” 18  Ndinga ya Yehowa kwisilaka mono diaka nde: 19  “Kansi nge, mwana ya muntu, tenda banzila zole yina mbele ya bitumba ya ntotila ya Babilone fwete kwisila. Yonso zole ta katuka na insi mosi, mpi bo fwete tula kidimbu* ya ke songisaka nzila na kisika nzila yina ke kabwana sambu na kukwenda na bambanza zole. 20  Nge fwete tenda nzila mosi sambu mbele ya bitumba kwisa kunwanisa Raba+ ya bantu ya Amoni, mpi nzila ya nkaka sambu na kukwisa kunwanisa Yeruzalemi+ mbanza ya ngolo na kati ya Yuda. 21  Ntotila ya Babilone me telama sambu na kusadila mazi na kinkonko ya nzila, kisika banzila yina zole me kabwana. Yandi me nikisa batolo-tolo. Yandi me yula biteki* na yandi; yandi me tala dizafu* mbote-mbote. 22  Mazi ya kele na diboko na yandi ya kitata ke tala na ndambu ya Yeruzalemi, sambu na kutedimisa bima ya kubukila bakielo ya nene, sambu na kupesa nsiku ya kufwa bantu, sambu na kutula milolo ya bitumba, sambu na kutula na bakielo ya nene bima ya kubukila bakielo ya nene, sambu na kutedimisa mwa ngumba, sambu na kutunga kibaka.+ 23  Kansi yo ta monana bonso mazi ya luvunu na meso ya bantu* yina diaka ndefi na ntwala na bo.+ Ata mpidina, yandi ta yibuka kifu na bo mpi ta kanga bo.+ 24  “Yo yina Yehowa Mfumu ya Kuluta Nene me tuba nde: ‘Beno me sala nde bo yibuka kifu na beno na mutindu beno me monisa mambu na beno ya mbi na pwelele yonso mpi na mutindu beno me sala nde masumu na beno kumonana na bisalu na beno yonso. Awa ya bo me yibuka beno, bo ta baka beno na ngolo.’* 25  “Kansi, kilumbu na nge me lunga, O mputa ya ke fwaka, mfumu ya mbi ya Izraele,+ ntangu ya ndola na nge ya nsuka. 26  Yehowa Mfumu ya Kuluta Nene me tuba nde: ‘Katula tirbani, mpi katula mpu ya kimfumu.+ Yo ta bikala ve mutindu mosi.+ Tombula yina kele na nsi,+ mpi kulumusa yina kele na zulu.+ 27  Mono ta kumisa yo mayumbu, mayumbu, mayumbu. Yo ta vanda ve ata ya muntu mosi tii kuna muntu yina kele na nswa ya me fwana ta kwisa,+ mpi mono ta pesa yandi yo.’+ 28  “Ebuna nge, mwana ya muntu, bikula mpi tuba nde, ‘Yai kele mambu yina Yehowa Mfumu ya Kuluta Nene me tuba sambu na bantu ya Amoni mpi sambu na mafingu na bo.’ Tuba nde, ‘Mbele ya bitumba! Bo me basisa mbele ya bitumba sambu na kufwa bantu; bo me ngengisa yo sambu na kufwa bantu mpi sambu yo sema bonso nsemo ya nzasi. 29  Ata bambona-meso ya luvunu mpi mazi ya luvunu ya bo ke tuba sambu na nge, bo ta tula nge na zulu ya bantu ya bo me fwa,* bantu ya mbi yina kilumbu na bo me lunga, ntangu ya ndola na bo ya nsuka. 30  Vutula yo na poshi na yo. Mono ta sambisa nge na kisika yina nge butukaka,* na insi yina nge katukaka. 31  Mono ta monisila nge makasi na mono. Mono ta pupula tiya ya makasi na mono na zulu na nge mpi mono ta pesa nge na maboko ya bantu ya nku, bantu yina ke zabaka kubebisa.+ 32  Nge ta kuma kima ya kupedisila tiya;+ menga na nge ta tiamuka na insi mpi bo ta yibuka nge diaka ve, sambu mono, Yehowa, muntu me tuba.’”

Banoti na nsi ya lutiti

Na kisina, “nsuni.”
Na kisina, “luketo na nge.”
Disongidila, bo ta suba sambu na boma.
Disongidila, mbele ya bitumba ya Yehowa.
To “Muhangu.”
Na kisina, “diboko.”
Na kisina, “terafimi.”
To “foie.”
Disongidila, bantu ya Yeruzalemi.
Na kisina, “na diboko.”
Na kisina, “ya bankingu ya bantu ya bo me fwa.”
Na kisina, “yina bo gangaka nge.”