Ezekiele 2:1-10

  • Nzambi me pesa Ezekiele kisalu ya kimbikudi (1-10)

    • ‘Ata bo wa to ve’ (5)

    • Bo me songa rulo ya bankunga ya mawa (9, 10)

2  Ebuna yandi tubilaka mono nde: “Mwana ya muntu,* telama sambu mono tuba ti nge.”+  Ntangu yandi tubilaka mono, mpeve kwisilaka mono mpi tedimisaka mono+ sambu mono wa Muntu yina ke tubila mono.  Yandi tubilaka mono diaka nde: “Mwana ya muntu, mono ke tinda nge na bantu ya Izraele,+ na makanda ya me kolama yina me kolamaka na ntwala na mono.+ Bo ti ba-nkaka na bo me fwaka bansiku na mono tii bubu yai.+  Mono ke tinda nge na bana yina kele ntu-ngolo* mpi ntima-ngolo,+ ebuna nge fwete tubila bo nde, ‘Yai kele mambu yina Yehowa Mfumu ya Kuluta Nene me tuba.’  Kansi bo, ata bo wa to bo buya kuwa—sambu bo kele nzo yina ke kolamaka+—bo ta zaba kibeni nde mbikudi mosi vandaka na kati na bo.+  “Kansi nge, mwana ya muntu, kuwa bo boma ve,+ mpi kuwa ve boma ya mambu yina bo ke tuba, ata banti ya bansende mpi bansende me ziunga nge*+ mpi ata nge ke zinga na kati-kati ya bankutu.* Kuwa ve boma ya mambu yina bo ke tuba,+ mpi kutekita ve sambu na baluse na bo,+ sambu bo kele nzo ya ke kolamaka.  Nge fwete tubila bo mambu ya mono ke tuba, ata bo wa to ve, sambu bo kele bantu ya ke kolamaka.+  “Kansi nge, mwana ya muntu, wa mambu yina mono ke songa nge. Kukuma ve nkolami bonso nzo yai ya ke kolamaka. Kangula munoko na nge mpi dia kima ya mono ke pesa nge.”+  Ntangu mono talaka, mono monaka diboko mosi ya kutandula na ndambu na mono,+ mpi mono monaka rulo mosi ya kusonika na kati na yo.*+ 10  Ntangu yandi kangulaka yo na ntwala na mono, yo vandaka ti bisono na ntwala mpi na nima.+ Bankunga ya mawa,* bidilu mpi milolo vandaka ya kusonika na zulu na yo.+

Banoti na nsi ya lutiti

“Mwana ya muntu”; yai kele mbala ya ntete na kati ya bambala 93 ya bo me sadila bangogo yai na Ezekiele.
To “luse ngolo.”
To mbala ya nkaka, “ata bantu kele ntu-ngolo mpi kele bonso bima yina ke tioka nge.”
To “binkala-nkala.”
To “rulo ya mukanda mosi.”
To “Bankunga ya mafwa.”