Ezekiele 14:1-23

  • Bo me nganina bantu ya ke sambilaka biteki (1-11)

  • Yeruzalemi ta konda ve kubaka ndola (12-23)

    • Bantu ya lunungu: Noa, Daniele, mpi Yobi (14, 20)

14  Bankuluntu ya nkaka ya Izraele kwisaka mpi vandaka na ntwala na mono.+  Ebuna ndinga ya Yehowa kwisilaka mono nde:  “Mwana ya muntu, bantu yai kele kaka ti lukanu ya kulanda biteki na bo ya nzanzi,* mpi bo me tula kima ya ke budisa sakuba yina ke nataka bantu na kusala disumu. Keti mono fwete pesa bo nzila ya kuyula mono?+  Ntangu yai, solula ti bo mpi songa bo nde, ‘Yehowa Mfumu ya Kuluta Nene me tuba nde: “Kana muntu mosi ya Izraele kele kaka ti lukanu ya kulanda biteki na yandi ya nzanzi mpi ke tula kima ya ke budisa sakuba yina ke nataka bantu na kusala disumu ebuna na nima yandi kwisa kuyula mbikudi, mono Yehowa, mono ta pesa yandi mvutu mbote-mbote na kuwakana ti biteki na yandi mingi ya nzanzi.  Mono ta sala nde ntima ya nzo ya Izraele kuvanda na boma ya ngolo* sambu bo yonso me tina mono mpi me landa biteki na bo ya nzanzi.”’+  “Yo yina songa nzo ya Izraele nde, ‘Yehowa Mfumu ya Kuluta Nene me tuba nde: “Beno kwisa kuvutuka, beno yambula biteki na beno ya nzanzi, mpi beno katula baluse na beno na mambu na beno yonso ya mbi.+  Kana muntu mosi ya Izraele to munzenza mosi ya ke zingaka na Izraele kukabwana ti mono mpi kele ti lukanu ya kulanda biteki na yandi ya nzanzi, ebuna yandi tula kima ya ke budisa sakuba yina ke nataka bantu na kusala disumu mpi na nima yandi kwisa kuyula mbikudi na mono,+ mono Yehowa, ta pesa yandi mvutu mono mosi.  Mono ta buya muntu yina mpi ta sala nde yandi kuma kidimbu ya ke kebisa mpi kingana, mpi mono ta katula yandi na kati ya bantu na mono;+ ebuna beno ta zaba nde mono kele Yehowa.”’  “‘Kansi kana bo kusa mbikudi mpi yandi pesa mvutu, yo kele mono, Yehowa, muntu me kusa mbikudi yina.+ Ebuna mono ta tandula diboko na mono sambu na kupesa yandi ndola mpi ta katula yandi na kati ya bantu na mono Izraele. 10  Bo ta nata kifu na bo; kifu ya muntu yina ke yula ta vanda kiteso mosi ti kifu ya mbikudi yina, 11  sambu nzo ya Izraele kubika kuyungana-yungana ntama ti mono mpi kubika kudikumisa mvindu na mambu na bo yonso ya mbi. Ebuna bo ta vanda bantu na mono, mpi mono ta vanda Nzambi na bo,’+ Yehowa Mfumu ya Kuluta Nene muntu me tuba.” 12  Ndinga ya Yehowa kwisilaka mono diaka nde: 13  “Mwana ya muntu, kana insi mosi kusala disumu na meso na mono mpi kusala mambu kukonda kwikama, mono ta tandula diboko na mono sambu na kunwanisa yo mpi ta bebisa kima na yo yina ke pesaka yo madia,*+ ebuna mono ta tinda nzala na insi yina+ mpi ta fwa muntu ti mbisi na kati na yo.”+ 14  “‘Ata kana babakala yai tatu—Noa,+ Daniele,+ mpi Yobi+—vandaka na kati na yo, bo zolaka kudigulusa kaka bo mosi* sambu na lunungu na bo,’+ Yehowa Mfumu ya Kuluta Nene muntu me tuba.” 15  “‘To yindula nde mono sala na mpila nde bambisi ya makasi ya mfinda kuluta na insi yina ebuna yo fiotuna bantu na yo* mpi kukumisa yo ntoto ya mpamba kukonda muntu ya kuluta na kati na yo sambu na bambisi yina ya mfinda.+ 16  Ya kieleka mutindu mono kele na luzingu,’ Yehowa Mfumu ya Kuluta Nene muntu me tuba, ‘ata kana babakala yai tatu vandaka na kati na yo, bo zolaka kugulusa ve bana na bo ya babakala to bana na bo ya bankento; bo zolaka kudigulusa kaka bo mosi, mpi insi zolaka kubikala mpamba.’” 17  “‘To yindula nde mono nata mbele ya bitumba sambu na kunwanisa insi yina+ mpi kutuba nde: “Bika nde mbele ya bitumba kuluta na insi yina,” mpi mono katula muntu ti mbisi na kati na yo,+ 18  ata kana babakala yai tatu vandaka na kati na yo, ya kieleka mutindu mono kele na luzingu,’ Yehowa Mfumu ya Kuluta Nene muntu me tuba, ‘bo zolaka kugulusa ve bana na bo ya babakala to bana na bo ya bankento; bo zolaka kudigulusa kaka bo mosi.’” 19  “‘To yindula nde mono tinda kipupa na insi yina,+ mono wila yo makasi mpi mono fwa muntu ti mbisi na kati na yo, 20  ata kana Noa,+ Daniele,+ mpi Yobi+ vandaka na kati na yo, ya kieleka mutindu mono kele na luzingu,’ Yehowa Mfumu ya Kuluta Nene muntu me tuba, ‘bo zolaka kugulusa ve bana na bo ya babakala to bana na bo ya bankento; bo zolaka kudigulusa kaka bo mosi* sambu na lunungu na bo.’”+ 21  “Yehowa Mfumu ya Kuluta Nene me tuba nde: ‘Yo ta vanda mutindu yina ntangu mono ta tinda bandola na mono iya*+—mbele ya bitumba, nzala, mbisi ya mfinda ya makasi, mpi kipupa+—na Yeruzalemi sambu na kufwa muntu ti mbisi na kati na yo.+ 22  Kansi, ndambu ya bantu yina ta bikala na kati ta guluka mpi bo ta basisa bo,+ yo vanda bana-babakala to bana-bankento. Bo ke kwisa kisika beno kele, mpi ntangu beno ta mona banzila na bo ti bisalu na bo, yo ta lembika beno kibeni na mpasi yina mono nataka na Yeruzalemi, sambu na mambu yonso yina mono salaka yo.’” 23  “‘Bo ta lembika beno ntangu beno ta mona banzila na bo ti bisalu na bo, ebuna beno ta zaba nde kana mono salaka mambu yina yo lombaka nde mono sala yo,+ yo vandaka ve kukonda kikuma,’ Yehowa Mfumu ya Kuluta Nene muntu me tuba.”

Banoti na nsi ya lutiti

Ngogo ya Kiebreo ya bo me sadila awa lenda vanda na kuwakana ti ngogo “tufi” mpi bo me sadila yo sambu na kuvweza.
Na kisina, “nde boma ya ngolo kusimba nzo ya Izraele na ntima na bo.”
Na kisina, “ta zenga banti na yo ya mampa.” Yo ke monana bonso nde yo ke tubila banti yina bo vandaka kusadila sambu na kubumba mampa.
To “kugulusa kaka moyo na bo.”
To “yo bikisa yo kukonda bana.”
To “kugulusa kaka moyo na bo.”
To “balusambisu na mono iya ya ke pesa mpasi.”