Bingana 25:1-28
25 Yai mpi bingana ya Salomo,+ yina bantu ya Ezekiasi+ ntotila ya Yuda sekulaka:*
2 Nkembo ya Nzambi kele kubumba diambu mosi sambu yo vanda kinsweki,+Mpi nkembo ya bantotila kele kufimpa diambu mosi.
3 Mutindu zulu kele ya kunanguka mpi nsi ya ntoto kele nda mingi,Mutindu mosi, bantu lenda bakisa ve ntima ya bantotila.
4 Katula mvindu na arza,Ebuna yo ta basika ya bunkete kibeni.+
5 Katula muntu ya mbi na ntwala ya ntotila,Ebuna bo ta tula kiti na yandi ya kimfumu ngolo na lunungu.+
6 Kudikumisa ve na ntwala ya ntotila,+Mpi kuvanda ve na kati ya bantu ya lukumu,+
7 Sambu yo kele mbote yandi tubila nge nde, “Kwisa awa,”
Na kisika ya kupesa nge nsoni na meso ya muntu ya lukumu.+
8 Kukwenda ve ntinu-ntinu sambu na kufunda muntu,Sambu nki nge ta sala na nima kana nkweno na nge kupesa nge nsoni?+
9 Samba diambu na nge ti nkweno na nge,+Kansi kubasisa ve mambu yina bo zabisaka nge na kinsweki,*+
10 Mpidina muntu yina ke wa ta pesa nge ve nsoniMpi nge ta mwanga ve nsangu ya mbi yina bo lenda soba ve.
11 Ngogo yina bo me tuba na ntangu ya mboteKele bonso bapome ya wolo na kati ya babolo ya arza.+
12 Bonso kima ya dikutu ya wolo mpi kima ya kukumisa nitu kitoko ya bo me sala na wolo ya mboteMuntu yina ke nganina ti mayele kele mutindu yina sambu na muntu yina ke waka.+
13 Kaka bonso madidi ya mvula ya mpembe* na kilumbu ya kukatula bima na bilanga,Kinati-nsangu ya kwikama kele mutindu yina sambu na bantu yina tindaka yandi,Sambu yandi ke lembikaka mfumu na yandi.*+
14 Bonso matuti mpi mupepe yina ke nataka ve mvulaMuntu yina ke kudikumisaka sambu na dikabu yina yandi me pesa ve* kele mutindu yina.+
15 Bo ke ndimisaka komanda na nsadisa ya ntima ya nda,Mpi kutuba ya mawete* lenda buka mukwa.+
16 Kana nge mona bwiki, dia kaka yina nge kele na yo mfunu,Sambu kana nge dia yo mingi kuluta, nge lenda luka.+
17 Kukwenda ve mbala na mbala na nzo ya nkweno na nge,Kana ve yandi ta lemba nge mpi ta menga nge.
18 Muntu yina ke ta kimbangi ya luvunu sambu na kubedisa nkweno na yandiKele bonso nti ya bitumba, mbele ya bitumba, mpi tolo-tolo ya makasi.+
19 Kutula ntima na bantangu ya mpasi na muntu yina bo lenda tudila ve ntima*Kele bonso dinu yina me bukana to dikulu yina ke tekita.
20 Muntu yina ke yimbila muntu ya kele na mawa+ bankungaKele bonso muntu yina me katula bilele na kilumbu ya madidiMpi bonso masa ya ngani ya bo me tiamuna na mukedi.*
21 Kana mbeni na nge* kele na nzala, pesa yandi dimpa ya kudia;Kana yandi kele na nzala ya masa, pesa yandi masa ya kunwa,+
22 Sambu nge ta tula makala ya tiya na zulu ya ntu na yandi,*+Ebuna Yehowa ta futa nge.
23 Mupepe ya nordi ke nataka mvula,Mpi ludimi ya ke tongaka ke nataka luse ya makasi.+
24 Kuzinga na kinkonko ya ludi kele mboteKuluta kuzinga nzo mosi ti nkento yina kele makelele mingi.*+
25 Nsangu ya mbote ya me katuka na insi ya ntama+Kele bonso masa ya madidi na moyo* yina me lemba.
26 Muntu ya lunungu yina ke ndima bangindu ya* muntu ya mbiKele bonso nto ya masa ya kele ti poto-poto mpi dibulu ya masa ya kubeba.
27 Yo kele ve mbote na kudia bwiki mingi kuluta,+Mpi kusosa nkembo na nge mosi ke pesaka ve nkembo.+
28 Muntu yina lenda yala ve makasi na yandi*+Kele bonso mbanza yina bo me panza, yina me konda kibaka.
Banoti na nsi ya lutiti
^ To “salaka bakopi mpi vukisaka.”
^ To “binsweki ya bantu ya nkaka.”
^ To “bonso masa ya madidi.”
^ To “moyo ya mfumu na yandi.”
^ Na kisina, “dikabu ya luvunu.”
^ To “pima.”
^ To mbala ya nkaka, “muyekudi.”
^ To “mungwa ya basenzi.”
^ Na kisina, “muntu yina ke mengaka nge.”
^ Disongidila, kulembika muntu mpi kukumisa ntima na yandi pete-pete.
^ To “ke basisaka kuswana.”
^ Tala Bantendula ya Bangogo.
^ To “ke wakana ti.” Na kisina, “ke tambula na lunziungu na ntwala ya.”
^ To “mpeve na yandi.”
