2 Samuele 7:1-29

  • Davidi ta tunga ve tempelo (1-7)

  • Kuwakana ti Davidi sambu na kimfumu (8-17)

  • Kisambu ya Davidi sambu na kupesa matondo (18-29)

7  Ntangu ntotila kumaka kuzinga na nzo na yandi*+ mpi Yehowa pesaka yandi ngemba na mutindu yandi gulusaka yandi na maboko ya bambeni na yandi yonso yina vandaka na nziunga na yandi,  ntotila tubilaka mbikudi Natani+ nde: “Tala, mono ke zinga na nzo ya banti ya sedre+ kansi Sanduku ya Nzambi ya kieleka kele na kati-kati ya bilele ya tenta.”+  Natani vutudilaka ntotila nde: “Kwenda mpi sala mambu yonso yina kele na ntima na nge, sambu Yehowa kele ti nge.”+  Kaka na mpimpa yina, ndinga ya Yehowa kwisilaka Natani nde:  Kwenda kutubila nsadi na mono Davidi nde, ‘Yehowa me tuba nde: “Keti nge fwete tungila mono nzo ya mono ta zingaka?+  Sambu katuka kilumbu yina mono basisaka bantu ya Izraele na Ezipte tii bubu yai,+ mono me zingaka ve na nzo, kansi mono vandaka bubu yai awa, mbasi kuna na kati ya tenta mpi na kati ya nzo-tenta.+  Na ntangu yonso yina mono vandaka kukwenda ti bantu yonso ya Izraele,* keti mono tubaka ata ngogo mosi na bantwadisi ya dikanda ya Izraele yina mono tulaka sambu na kugungula bantu na mono Izraele nde, ‘Sambu na nki beno me tungila mono ve nzo ya banti ya sedre?’”’  Ntangu yai tubila nsadi na mono Davidi nde, ‘Yehowa ya makesa me tuba nde: “Mono bakaka nge na banseke, sambu nge yambula kukeba mameme,+ mpi nge kuma ntwadisi ya bantu na mono Izraele.+  Mono ta vanda ti nge bisika yonso ya nge ta kwenda,+ mpi mono ta fwa* bambeni na nge yonso na ntwala na nge;+ mpi mono ta sala nde zina na nge+ kukuma nene bonso zina ya bantu ya nene ya ntoto. 10  Mono ta sola kisika mosi sambu na bantu na mono Izraele mpi ta tula bo kuna, ebuna bo ta zinga kuna mpi bo ta yangisa bo diaka ve; mpi bantu ya mbi ta niokula bo diaka ve mutindu bo salaka na ntangu ya ntama,+ 11  katuka kilumbu yina mono tulaka bazuzi+ sambu na kutwadisa bantu na mono Izraele. Ebuna mono ta pesa nge ngemba na mutindu mono ta gulusa nge na maboko ya bambeni na nge yonso.+ “‘“Diaka, Yehowa me songa nge nde Yehowa ta sala dibuta ya kimfumu*+ sambu na nge. 12  Ntangu bilumbu na nge ta suka+ mpi nge ta lala sambu na kupema ti ba-nkaka na nge, mono ta basisa bana* na nge na nima na nge, mwana na nge mosi,* mpi mono ta tedimisa kimfumu na yandi ngolo.+ 13  Yandi muntu ta tunga nzo sambu na zina na mono,+ mpi mono ta tedimisa kiti na yandi ya kimfumu ngolo kimakulu.+ 14  Mono ta kuma tata na yandi, mpi yandi ta kuma mwana na mono.+ Kana yandi sala mbi, mono ta nganina yandi ti nti ya bantu mpi ti bafimbu ya bana ya bantu.*+ 15  Mono ta katula ve zola na mono ya kwikama na yandi mutindu mono katulaka yo na Saule,+ yina mono katulaka na ntwala na nge. 16  Nzo na nge mpi kimfumu na nge ta vanda kimakulu na lutaninu na ntwala na nge; kiti na nge ya kimfumu ta vanda ngolo kimakulu.”’”+ 17  Natani songaka Davidi mambu yai yonso mpi mbona-meso yai yonso.+ 18  Ebuna ntotila Davidi kotaka, yandi vandaka na ntwala ya Yehowa, mpi yandi tubaka nde: “O Yehowa Mfumu ya Kuluta Nene, mono kele nani? Mpi nzo na mono kele nki sambu nge nata mono ntama mutindu yai?+ 19  O Yehowa Mfumu ya Kuluta Nene, bonso nde yo me lunga ve, nge ke tuba mpi sambu na nzo ya nsadi na nge tii na bilumbu yina ke kwisa ntama na ntwala; mpi yai kele malongi* sambu na bantu yonso, O Yehowa Mfumu ya Kuluta Nene. 20  O Yehowa Mfumu ya Kuluta Nene, inki ya nkaka nsadi na nge Davidi lenda tubila nge diaka, sambu nge me zaba mono mbote-mbote?+ 21  Sambu na ndinga na nge mpi na kuwakana ti ntima* na nge, nge me sala mambu yai yonso ya nene mpi nge me monisa yo na nsadi na nge.+ 22  Yo yina, nge kele kibeni nene,+ O Yehowa Mfumu ya Kuluta Nene. Ata muntu mosi ve kele bonso nge,+ mpi Nzambi ya nkaka kele ve katula nge;+ mambu yonso ya beto me wa na makutu na beto ke ndimisa yo. 23  Ebuna inki dikanda ya nkaka na ntoto kele bonso bantu na nge Izraele?+ Nzambi kwendaka mpi sumbaka bo diaka sambu bo vanda bantu na yandi,+ mpi yandi kudisadilaka zina+ na mutindu yandi sadilaka bo mambu ya nene mpi ya ke pesa boma.+ Nge kulaka makanda ti banzambi na bo sambu na bantu na nge yina nge sumbaka diaka sambu na nge mosi na Ezipte. 24  Nge tulaka bantu na nge Izraele na kuvanda bantu na nge mosi ntangu yonso;+ ebuna nge, O Yehowa, nge me kumaka Nzambi na bo.+ 25  “Ntangu yai, O Yehowa Nzambi, lungisa ntangu yonso mambu yina nge silaka sambu na nsadi na nge ti nzo na yandi, mpi bika nde nge sala kaka mutindu nge silaka.+ 26  Bika nde zina na nge kuvanda ya kunanguka kimakulu+ sambu bantu kutuba nde, ‘Yehowa ya makesa kele Nzambi na Izraele,’ mpi bika nde nzo ya nsadi na nge Davidi kukuma ngolo ntangu yonso na ntwala na nge.+ 27  Sambu nge, Yehowa ya makesa, Nzambi ya Izraele, nge me monisa nsadi na nge diambu mosi ya kubumbana ntangu nge tubaka nde, ‘Mono ta sala dibuta ya kimfumu* sambu na nge.’+ Yo yina nsadi na nge kele ti kikesa ya* kusamba nge mutindu yai. 28  Ntangu yai, O Yehowa Mfumu ya Kuluta Nene, nge kele Nzambi ya kieleka,+ mpi mambu ya nge ke tubaka kele kieleka, mpi nge me sila nsadi na nge mambu yai ya mbote. 29  Yo yina bika nde yo pesa nge kiese na kusakumuna nzo ya nsadi na nge, mpi bika nde yo landa kuvanda kimakulu na ntwala na nge;+ sambu nge, O Yehowa Mfumu ya Kuluta Nene, nge silaka, mpi ti lusakumunu na nge, bika nde nzo ya nsadi na nge kubaka lusakumunu kimakulu.”+

Banoti na nsi ya lutiti

To “nzo ya ntotila.”
Na kisina, “bana yonso ya Izraele.”
Na kisina, “ta katula.”
Na kisina, “ta sala nzo.”
Na kisina, “nkuna.”
Na kisina, “mwana yina me basika na bitini na nge ya kati.”
To mbala ya nkaka, “Adami.”
To “nsiku.”
To “ti luzolo.”
Na kisina, “ta tunga nzo.”
Na kisina, “me mona ntima na yandi sambu na.”