2 Samuele 2:1-32

  • Davidi, ntotila ya Yuda (1-7)

  • Ishe-bosheti, ntotila ya Izraele (8-11)

  • Bitumba na kati ya nzo ya Davidi ti nzo ya Saule (12-32)

2  Na nima, Davidi yulaka Yehowa+ nde: “Keti mono fwete tombuka na mbanza mosi ya Yuda?” Yehowa tubilaka yandi nde: “Tombuka.” Ebuna Davidi yulaka nde: “Mono fwete kwenda na wapi?” Yandi vutulaka nde: “Na Ebroni.”+  Yo yina, Davidi tombukaka kuna ti bankento na yandi zole, Ahinoami+ muntu ya Yizreele ti Abigaile+ mufwidi ya Nabale muntu ya Karmele.  Davidi nataka mpi bantu yina vandaka ti yandi, konso muntu ti bantu ya nzo na yandi,+ mpi bo zingaka na bambanza yina kele pene-pene ya Ebroni.  Ebuna bantu ya Yuda kwisaka, mpi kuna bo tulaka Davidi mafuta sambu yandi kuma ntotila ya nzo ya Yuda.+ Bo songaka Davidi nde: “Bantu yina zikaka Saule vandaka bantu ya Yabeshi-gileadi.”  Yo yina Davidi tindaka binati-nsangu na bantu ya Yabeshi-gileadi mpi tubilaka bo nde: “Bika nde Yehowa kusakumuna beno, sambu beno monisilaka Saule mfumu na beno zola ya kwikama na mutindu beno zikaka yandi.+  Bika nde Yehowa kumonisila beno zola ya kwikama mpi kwikama. Mono ta monisila beno mpi ntima ya mbote sambu beno me sala diambu yina.+  Ntangu yai, bika nde maboko na beno kuvanda ngolo mpi beno vanda kikesa, ata mfumu na beno Saule me fwa, mpi bantu ya nzo ya Yuda me tula mono mafuta sambu mono kuma ntotila na bo.”  Kansi Abnere+ mwana ya Nere, mfumu ya basoda ya Saule, bakaka Ishe-bosheti,+ mwana ya Saule, mpi nataka yandi sambu na kusabuka na Mahanayimi+  ebuna yandi tulaka yandi ntotila ya Gileadi,+ ya bantu ya Ashuri, ya Yizreele,+ ya Efrayimi,+ ya Benyamini, mpi ya Izraele ya mvimba. 10  Ishe-bosheti, mwana ya Saule, vandaka ti bamvula 40 ntangu yandi kumaka ntotila ya Izraele, mpi yandi yalaka bamvula zole. Kansi nzo ya Yuda pesaka Davidi maboko.+ 11  Ntangu* yina Davidi vandaka ntotila ya nzo ya Yuda na Ebroni vandaka bamvula nsambwadi ti bangonda sambanu.+ 12  Na nima, Abnere mwana ya Nere ti bansadi ya Ishe-bosheti, mwana ya Saule, basikaka na Mahanayimi+ mpi kwendaka na Gibeoni.+ 13  Yoabi+ mwana ya Seruya+ ti bansadi ya Davidi mpi basikaka ebuna bo kutanaka ti bo na kiziba ya Gibeoni; kimvuka mosi vandaka ya kuvanda na lweka yai ya kiziba, mpi kimvuka ya nkaka na lweka ya nkaka ya kiziba. 14  Nsuka-nsuka, Abnere tubilaka Yoabi nde: “Bika nde baleke ya babakala kutelama mpi kunwana bitumba* na ntwala na beto.” Ebuna Yoabi tubaka nde: “Bo telama.” 15  Yo yina bo telamaka. Bimvuka yonso zole tangaka bantu na bo sambu na kutesana mpi bo sabukaka. Bantu 12 ya Benyamini ti ya Ishe-bosheti, mwana ya Saule, mpi bantu 12 na kati ya bansadi ya Davidi. 16  Konso muntu simbaka muntu ya nkaka na ntu mpi konso muntu na kati na bo kotisaka mbeni na yandi mbele na mpanzi, ebuna bo fwaka bo yonso kumosi. Yo yina bo bingaka kisika yina, ya kele na Gibeoni, nde Elekati-asurimi. 17  Bitumba yina landaka vandaka ngolo kibeni kilumbu yina, nsuka-nsuka Abnere ti bantu ya Izraele belaka na ntwala ya bansadi ya Davidi. 18  Bana tatu ya Seruya+ vandaka kuna—Yoabi,+ Abishai,+ mpi Asaele;+ mpi Asaele vandaka kubaka ntinu na makulu bonso mbambi na nseke. 19  Asaele landaka Abnere, mpi yandi balukaka ve na diboko ya kitata to na diboko ya kimama ntangu yandi vandaka kulanda Abnere. 20  Ntangu Abnere talaka na nima, yandi yulaka nde, “Keti yina nge Asaele?” ebuna yandi vutulaka nde, “Ee, yo kele mono.” 21  Ebuna Abnere tubilaka yandi nde: “Baluka na diboko na nge ya kitata to na diboko na nge ya kimama mpi kanga leke mosi ya bakala, mpi baka konso kima yina nge ta botula na yandi, yo kuma ya nge.” Kansi Asaele zolaka ve kuyambula na kulanda yandi. 22  Yo yina Abnere tubilaka diaka Asaele nde: “Yambula kulanda mono. Sambu na nki mono fwete fwa nge? Inki mutindu mono lenda tala mpangi na nge Yoabi na luse?” 23  Kansi yandi vandaka kaka kubuya na kuyambula, yo yina Abnere bulaka yandi nima ya dikonga na divumu,+ ebuna dikonga basikaka yandi na mukongo; mpi yandi bwaka pana mpi fwaka kisika yina. Konso muntu yina vandaka kukuma kisika yina Asaele bwaka mpi fwaka vandaka kutelama mpi kupema pana. 24  Ebuna Yoabi mpi Abishai landaka Abnere. Ntangu ntangu vandaka kudinda, bo kumaka na ngumba ya fioti ya Ama, yina ke talana ti Gia na nzila yina ke kwendaka na ntoto-makanga ya Gibeoni. 25  Kuna bantu ya Benyamini vukanaka kisika mosi na nima ya Abnere, ebuna bo salaka kimvuka mosi mpi bo telamaka na nsongi ya ngumba mosi buna ya fioti. 26  Ebuna Abnere bingaka Yoabi na ndinga ya ngolo nde: “Keti mbele ya bitumba ta landa kufwa kukonda nsuka? Keti nge ke zaba ve nde nsuka ta vanda kaka mbi? Yo ta sala ntangu ikwa na ntwala nde nge songa bantu na kubika kulanda bampangi na bo?” 27  Ebuna Yoabi tubaka nde: “Ya kieleka mutindu Nzambi kele na luzingu, kana nge tubaka ve, bantu zolaka kuyambula kulanda bampangi na bo kaka na suka.” 28  Ntangu yai Yoabi bulaka kibongo, ebuna bantu na yandi yambulaka kulanda Izraele, mpi bitumba manaka. 29  Ebuna Abnere ti bantu na yandi tambulaka na Araba+ mpimpa yina ya mvimba mpi bo sabukaka Yordani, bo tambulaka na dibengi ya mvimba* mpi nsuka-nsuka bo kumaka na Mahanayimi.+ 30  Ntangu Yoabi bikaka kulanda Abnere, yandi vukisaka bantu yonso kisika mosi. Bantu 19 na kati ya bansadi ya Davidi kondaka, yika mpi Asaele. 31  Kansi bansadi ya Davidi bedisaka bantu ya Benyamini ti bantu ya Abnere, mpi bantu na bo 360 fwaka. 32  Bo bakaka Asaele+ mpi zikaka yandi na maziamu ya tata na yandi, yina kele na Betelemi.+ Ebuna Yoabi ti bantu na yandi tambulaka mpimpa ya mvimba, mpi bo kumaka na Ebroni+ na suka-suka.

Banoti na nsi ya lutiti

Na kisina, “Ntalu ya bilumbu.”
To “kutesana.”
To mbala ya nkaka, “Biteroni ya mvimba.”