2 Samuele 17:1-29

  • Ushai me bebisa ndongisila ya Ahitofele (1-14)

  • Bo me kebisa Davidi; yandi me tina Absalomi (15-29)

    • Barzilai mpi bantu ya nkaka me pesa bima (27-29)

17  Ebuna Ahitofele tubilaka Absalomi nde: “Bika mono sola bantu 12 000, mono telama mpi mono landa Davidi na mpimpa ya bubu yai.  Mono ta basikila yandi ntangu yandi ta vanda ya kulemba mpi ya kukonda ngolo,*+ mpi mono ta kumisa yandi kisaka-saka; ebuna bantu yonso yina kele ti yandi ta tina, mpi mono ta fwa kaka ntotila.+  Ebuna mono ta vutula bantu yonso na nge. Kuvutuka ya bantu yonso me simbama na mambu yina ta kumina muntu yina nge ke sosa. Ebuna bantu yonso ta vanda na ngemba.”  Ngindu yina vandaka kibeni mbote na meso ya Absalomi mpi ya bankuluntu yonso ya Izraele.  Kansi, Absalomi tubaka nde: “Pardo binga mpi Ushai,+ muntu ya Arki, sambu beto wa mambu yina yandi kele na yo ya kutuba.”  Yo yina Ushai kotaka kisika ya Absalomi. Ebuna Absalomi tubilaka yandi nde: “Yai kele ndongisila yina Ahitofele me pesa. Keti beto fwete sadila ndongisila na yandi? Kana ve, nge songa beto.”  Ebuna Ushai tubilaka Absalomi nde: “Ndongisila yina Ahitofele me pesa mbala yai kele mbote ve!”+  Ushai tubaka diaka nde: “Nge ke zaba mbote nde tata na nge ti bantu na yandi kele ngolo,+ mpi bo kele na makasi,* bonso urse yina me vidisa bana na yandi na mfinda.+ Diaka, tata na nge kele soda,+ mpi yandi ta lala ve kisika mosi ti bantu.  Na ntangu yai kibeni, yandi ke bumbana na dibulu mosi* to na kisika ya nkaka;+ ebuna kana yandi nwanisa muntu ya ntete, bantu yina ta wa yo ta tuba nde, ‘Bo me bedisa bantu yina ke landa Absalomi!’ 10  Ntembe kele ve nde ata muntu ya kikesa yina kele ti ntima bonso ya ntambu+ ta lemba na boma, sambu Izraele ya mvimba ke zaba nde tata na nge kele muntu mosi ya ngolo+ mpi nde bantu yina kele ti yandi kele bantu ya kikesa. 11  Mono ke pesa ndongisila yai: Bika nde Izraele ya mvimba kuvukana pene-pene na nge, katuka na Dani tii na Bere-sheba,+ bo vanda mingi bonso bambuma ya zelo na lweka ya nzadi-mungwa,+ mpi nge fwete twadisa bo na bitumba. 12  Beto ta nwanisa yandi konso kisika yina beto ta mona yandi, mpi beto ta kwisila yandi kaka mutindu malulu ke bwaka na ntoto; mpi ata muntu mosi ve na kati na bo ta guluka, yo vanda yandi to konso muntu yina kele ti yandi. 13  Kana yandi tina na mbanza mosi, Izraele ya mvimba ta nata bansinga na mbanza yina, mpi beto ta benda mpi ta kulumusa yo na muwanda tii kuna ata ditadi mosi ve ya fioti ta bikala.” 14  Ebuna Absalomi ti bantu yonso ya Izraele tubaka nde: “Ndongisila ya Ushai muntu ya Arki kele mbote kuluta+ ndongisila ya Ahitofele!”+ Sambu Yehowa bakaka lukanu* ya kubebisa ndongisila ya mbote ya Ahitofele na mpila nde Yehowa kunatila Absalomi mpasi.+ 15  Na nima, Ushai tubilaka banganga-nzambi Zadoki ti Abiatare+ nde: “Yai kele ndongisila yina Ahitofele me pesa Absalomi mpi bankuluntu ya Izraele, mpi yai kele ndongisila yina mono me pesa. 16  Ntangu yai tindila Davidi ndinga nswalu mpi kebisa yandi nde: ‘Na mpimpa ya bubu yai kubikala ve na bisika ya bo lenda sabuka masa na makulu* ya ntoto-makanga kansi sabuka kibeni, kana ve bo ta fwa*+ ntotila ti bantu yonso yina kele ti yandi.’” 17  Yonatani+ ti Ahimaasi+ vandaka na Ene-rogele;+ yo yina nsadi mosi ya nkento kwendaka mpi songaka bo, ebuna bo kwendaka kusonga ntotila Davidi, sambu bo waka boma ya kukota na mbanza mpi bantu kumona bo. 18  Kansi leke mosi ya bakala monaka bo mpi yandi songaka Absalomi. Yo yina bo zole kwendaka ntinu mpi kumaka na nzo ya bakala mosi na Bahurimi+ yina vandaka ti dibulu ya masa na kibansala na yandi. Bo kotaka na kati na yo, 19  mpi nkento ya bakala yina tandulaka kima mosi na zulu ya munoko ya dibulu yina sambu na kufika yo, ebuna yandi tulaka bambuma ya kupasula na zulu na yo; ata muntu mosi ve zabaka. 20  Bansadi ya Absalomi kwisaka na nkento yina, na nzo na yandi, mpi yulaka nde: “Ahimaasi ti Yonatani kele na wapi?” Nkento yina vutulaka nde: “Bo me luta mpi me kwenda na ndambu ya masa.”+ Ebuna bantu yina sosaka bo, kansi bo monaka bo ve, yo yina bo vutukaka na Yeruzalemi. 21  Ntangu bantu yina kwendaka, bo basikaka na dibulu yina, kwendaka mpi zabisaka ntotila Davidi. Bo tubilaka yandi nde: “Beno telama mpi beno sabuka nswalu masa, sambu yai kele ndongisila yina Ahitofele me pesa sambu na kunwanisa beno.”+ 22  Na mbala mosi Davidi ti bantu yonso yina vandaka ti yandi telamaka mpi sabukaka Yordani. Ntangu ntongo tanaka, ata muntu mosi ve bikalaka yina sabukaka ve Yordani. 23  Ntangu Ahitofele monaka nde bo sadilaka ve ndongisila na yandi, yandi yidikaka mpunda mpi kwendaka na nzo na yandi na mbanza na yandi.+ Na nima ya kupesa bantuma na bantu ya nzo na yandi,+ yandi kuditulaka+ nsinga na nkingu.* Ebuna yandi fwaka mpi bo zikaka yandi na maziamu ya ba-nkaka na yandi. 24  Na ntangu yina, Davidi kwendaka na Mahanayimi,+ mpi Absalomi sabukaka Yordani ti bantu yonso ya Izraele. 25  Absalomi tulaka Amasa+ mfumu ya basoda na kisika ya Yoabi;+ Amasa vandaka mwana ya muntu mosi ya Izraele zina na yandi Yitra, yina vukisaka nitu ti Abigaile+ mwana ya Nahashi, mpangi-nkento ya Seruya, mama ya Yoabi. 26  Izraele ti Absalomi salaka camp na ntoto ya Gileadi.+ 27  Kaka ntangu Davidi kwisaka na Mahanayimi, Shobi mwana ya Nahashi ya Raba+ ya bantu ya Amoni, Makire+ mwana ya Amiele ya Lo-debare, mpi Barzilai+ muntu ya Gileadi ya Rogelimi 28  nataka bambeto, malonga ya nene, malonga ya ntoto, ble, orze, fufu, bambuma ya kuyoka, madesu ya nene, madesu ya fioti, bambuma ya kukalanga, 29  bwiki, manteka, mameme mpi fromaze.* Bo nataka bima yai yonso sambu Davidi ti bantu yina vandaka ti yandi kudia,+ sambu bo tubaka nde: “Bantu kele na nzala, bo me lemba mpi bo kele na nzala ya masa na ntoto-makanga.”+

Banoti na nsi ya lutiti

To “mpi ya kulemba na maboko yonso zole.”
To “na moyo ya ndudi.”
To “mabulu; mabengi.”
To “pesaka ntuma.”
To mbala ya nkaka, “na ntoto ya zelo na zelo.”
Na kisina, “mina.”
To “kudikangaka na nkingu.”
To “mabele ya bangombe ya me kuma ngolo.”