2 Bantotila 17:1-41

  • Oshea, ntotila ya Izraele (1-4)

  • Kubwa ya Izraele (5, 6)

  • Izraele me kwenda na kimpika sambu bo kolamaka (7-23)

  • Bo me nata banzenza na bambanza ya Samaria (24-26)

  • Lusambu ya banzambi mingi na Samaria (27-41)

17  Na mvula ya 12 ya Ahazi ntotila ya Yuda, Oshea+ mwana ya Ela kumaka ntotila ya Izraele na Samaria; yandi yalaka bamvula uvwa.  Yandi landaka kusala mambu ya mbi na meso ya Yehowa, kansi ve na kiteso yina bantotila ya Izraele yina vandaka na ntwala na yandi salaka.  Shalmanezere ntotila ya Asiria kwisaka kunwanisa yandi,+ ebuna Oshea kumaka nsadi na yandi mpi yandi yantikaka kufuta yandi kitadi.+  Kansi, ntotila ya Asiria waka nde Oshea salaka komplo, sambu yandi tindaka binati-nsangu na So ntotila ya Ezipte+ mpi yandi natilaka ve ntotila ya Asiria kitadi bonso na bamvula yina lutaka. Yo yina, ntotila ya Asiria kangaka yandi bansinga mpi tulaka yandi na boloko.  Ntotila ya Asiria kotaka na ngolo na insi ya mvimba sambu na kunwanisa yo, ebuna yandi kwisaka na Samaria mpi ziungaka yo bamvula tatu.  Na mvula ya uvwa ya Oshea, ntotila ya Asiria botulaka Samaria.+ Na nima yandi nataka+ bantu ya Izraele na Asiria mpi yandi tulaka bo sambu bo zinga na Ala, na Abore yina kele pene-pene ya nzadi ya Gozani,+ mpi na bambanza ya bantu ya Media.+  Mambu yai salamaka sambu bantu ya Izraele salaka masumu na ntwala ya Yehowa Nzambi na bo, yina basisaka bo na insi ya Ezipte mpi katulaka bo na nsi ya kiyeka ya Farao ntotila ya Ezipte.+ Bo sambilaka* banzambi ya nkaka,+  bo landaka binkulu ya makanda yina Yehowa kulaka na ntwala ya bantu ya Izraele, mpi bo landaka binkulu yina bantotila ya Izraele tulaka.  Bantu ya Izraele vandaka kaka kusala mambu yina vandaka mbote ve na meso ya Yehowa Nzambi na bo. Bo landaka kutunga bisika ya kunanguka na bambanza na bo yonso,+ katuka na nzo-zulu tii na mbanza ya ngolo.* 10  Bo landaka kutedimisa sambu na bo mosi makunzi ya santu mpi banti ya santu*+ na zulu ya konso ngumba ya nda mpi na nsi ya konso nti yina vandaka ti matiti mingi;+ 11  mpi bo vandaka kupesa midinga ya kimenga na zulu ya bisika yonso ya kunanguka, kaka mutindu makanda yina Yehowa katulaka na ntwala na bo vandaka kusala.+ Bo landaka kusala mambu ya mbi sambu na kupesa Yehowa makasi. 12  Bo landaka kusadila biteki ya nzanzi,*+ yina Yehowa songaka bo nde: “Beno fwete sala ve diambu yai!”+ 13  Yehowa landaka kukebisa Izraele ti Yuda na nzila ya bambikudi na yandi yonso+ mpi ya konso muntu ya ke monaka bambona-meso nde: “Beno yambula banzila na beno ya mbi!+ Beno zitisa bantuma na mono ti bansiku na mono na kuwakana ti nsiku yonso yina mono pesaka ba-nkaka na beno mpi yina mono tindilaka beno na nzila ya bansadi na mono bambikudi.” 14  Kansi bo waka ve, mpi bo landaka kutula ntu-ngolo bonso* ba-nkaka na bo yina monisaka ve lukwikilu na Yehowa Nzambi na bo.+ 15  Bo vandaka kaka kubuya bansiku na yandi, kuwakana+ na yandi yina yandi salaka ti ba-nkaka na bo, mpi bangibusa na yandi yina yandi pesaka sambu na kukebisa bo;+ bo vandaka kaka kulanda biteki ya kukonda mfunu+ mpi bo kumaka bo mosi bantu ya kukonda mfunu,+ mpi bo landaka mbandu ya makanda yina vandaka na nziunga na bo, yina Yehowa songaka bo na kulanda ve mbandu na bo.+ 16  Bo landaka kuyambula bansiku yonso ya Yehowa Nzambi na bo, mpi bo salaka biteki ya bibende* ya bana-bangombe zole+ mpi nti mosi ya santu;*+ bo fukiminaka makesa yonso ya zulu+ mpi bo sadilaka Baale.+ 17  Bo yokaka* mpi bana na bo ya babakala ti ya bankento na tiya,+ bo zabisaka na ntwala mambu yina ta bwa+ mpi bo sosaka bidimbu ya mambu yina ta kwisa, mpi bo landaka kudipesa* na kusala mambu ya mbi na meso ya Yehowa, sambu na kupesa yandi makasi. 18  Ebuna Yehowa wilaka Izraele makasi mingi, yo yina yandi katulaka bo na meso na yandi.+ Yandi salaka nde ata muntu mosi ve kubikala, katula kaka dikanda ya Yuda. 19  Ata Yuda mpi landaka ve bansiku ya Yehowa Nzambi na bo;+ bo mpi bo landaka binkulu yina Izraele landaka.+ 20  Yehowa buyaka bana yonso ya Izraele, yandi kulumusaka bo, mpi yandi pesaka bo na maboko ya miyibi, tii kuna yandi losaka bo ntama ti yandi. 21  Yandi katulaka Izraele na nzo ya Davidi, mpi bo kumisaka Yeroboami mwana ya Nebati ntotila.+ Kansi Yeroboami pusaka Izraele na kuyambula kulanda Yehowa, mpi yandi pusaka bo na kusala disumu ya nene. 22  Mpi bantu ya Izraele landaka kutambula na masumu yonso yina Yeroboami salaka.+ Bo yambulaka yo ve 23  tii kuna Yehowa katulaka Izraele na meso na yandi, kaka mutindu yandi tubaka na nzila ya bansadi na yandi yonso bambikudi.+ Yo yina bo katulaka Izraele na insi na yo mpi nataka yo na Asiria,+ kisika bo kele tii bubu yai. 24  Na nima, ntotila ya Asiria bakaka bantu na Babilone, Kuta, Ava, Amati, mpi na Sefarvayimi,+ yandi nataka bo mpi tulaka bo na bambanza ya Samaria sambu bo zinga kuna na kisika ya bantu ya Izraele; bo bakaka Samaria mpi bo zingaka na bambanza na yo. 25  Ntangu bo yantikaka ntete kuzinga kuna, bo vandaka ve kuwa boma ya* Yehowa. Yo yina Yehowa tindaka bantambu na kati na bo,+ mpi yo fwaka bantu ya nkaka. 26  Bo songaka ntotila ya Asiria nde: “Makanda yina nge nataka na insi ya nkaka mpi yina nge tulaka sambu bo zinga na bambanza ya Samaria me zaba ve lusambu ya* Nzambi ya insi yina. Yo yina yandi ke landa kutinda bantambu na kati na bo, yina ke fwa bo, sambu ata muntu mosi ve me zaba lusambu ya Nzambi ya insi yina.” 27  Yo yina ntotila ya Asiria tubaka nde: “Beno baka nganga-nzambi mosi yina beno katulaka kuna mpi nataka na insi ya nkaka, ebuna beno vutula yandi sambu yandi zinga kuna mpi yandi longa bo mutindu ya kusambila Nzambi ya insi yina.” 28  Yo yina nganga-nzambi mosi yina bo katulaka na Samaria mpi nataka na insi ya nkaka vutukaka sambu na kuzinga na Betele,+ ebuna yandi yantikaka kulonga bo mutindu bo fwete wa boma ya* Yehowa.+ 29  Kansi, konso dikanda salaka nzambi* na yo, yina bo tulaka na banzo ya lusambu yina vandaka na bisika ya kunanguka yina bantu ya Samaria salaka; konso dikanda salaka mutindu yina na bambanza na bo yina bo vandaka kuzinga. 30  Bantu ya Babilone salaka Sukoti-benoti, bantu ya Kuti salaka Nergali, bantu ya Amati+ salaka Ashima, 31  mpi bantu ya Ava salaka Nibazi ti Tartaki. Bantu ya Sefarvayimi vandaka kuyoka bana na bo na tiya sambu na Adrameleki mpi Anameleki banzambi ya Sefarvayimi.+ 32  Ata bo vandaka kuwa Yehowa boma, bo bakaka bantu na kati ya bantu yonso mpi tulaka bo banganga-nzambi sambu na bisika ya kunanguka, ebuna bantu yai vandaka kusala sambu na bo na banzo ya lusambu yina vandaka na bisika ya kunanguka.+ 33  Bo vandaka kuwa Yehowa boma, kansi bo vandaka kusambila banzambi na bo na kuwakana ti lusambu* ya makanda yina bo katukaka.+ 34  Tii bubu yai, bo ke landaka lusambu* na bo ya ntama. Muntu mosi ve na kati na bo ke sambilaka* Yehowa mpi muntu mosi ve ke landaka bansiku na yandi, balusambisu na yandi, Nsiku, mpi ntuma yina Yehowa pesaka bana ya Yakobi, yina yandi pesaka zina Izraele.+ 35  Ntangu Yehowa salaka kuwakana ti bo,+ yandi songaka bo nde: “Beno fwete wa ve banzambi ya nkaka boma, mpi beno fwete fukimina bo ve to kusadila bo to kupesa bo bimenga.+ 36  Kansi Yehowa, yina basisaka beno na insi ya Ezipte ti ngolo ya nene mpi diboko ya kutandula,+ kele Muntu yina beno fwete wa boma;+ beno fwete fukimina yandi, mpi beno fwete pesa yandi bimenga. 37  Ebuna bansiku, balusambisu, Nsiku, mpi ntuma yina yandi sonikilaka beno,+ beno fwete zitisa yo mbote-mbote ntangu yonso, mpi beno fwete wa ve banzambi ya nkaka boma. 38  Beno fwete vila ve kuwakana yina mono salaka ti beno,+ mpi beno fwete wa ve banzambi ya nkaka boma. 39  Kansi muntu ya beno fwete wa boma kele Yehowa Nzambi na beno, sambu yandi muntu ta gulusa beno na maboko ya bambeni na beno yonso.” 40  Kansi bo lemfukaka ve, mpi bo landaka lusambu* na bo ya ntama.+ 41  Yo yina makanda yai kumaka kuwa Yehowa boma,+ kansi bo vandaka mpi kusadila biteki na bo mosi. Bana na bo ti bantekolo na bo ke salaka kaka mutindu ba-nkaka na bo salaka, tii bubu yai.

Banoti na nsi ya lutiti

Na kisina, “waka boma ya.”
Disongidila, na konso kisika, ata yo vandaka ti bantu fioti to bantu mingi.
Ngogo ya Kiebreo ya bo me sadila awa lenda vanda na kuwakana ti ngogo “tufi” mpi bo me sadila yo sambu na kuvweza.
Na kisina, “bo kumisaka bankingu na bo ngolo bonso bankingu ya.”
To “biteki ya bibende ya bo me lamba na tiya.”
Na kisina, “lutisaka.”
Na kisina, “kuditeka.”
To “kusambila.”
To “mutindu ya kusambila.”
To “sambila.”
To “banzambi.”
To “mutindu ya kusambila.”
To “mutindu ya kusambila.”
Na kisina, “ke waka boma ya.”
To “mutindu ya kusambila.”