2 Bantotila 14:1-29

  • Amasia, ntotila ya Yuda (1-6)

  • Bitumba ti Edomi mpi ti Izraele (7-14)

  • Lufwa ya Yehoashi, ntotila ya Izraele (15, 16)

  • Lufwa ya Amasia (17-22)

  • Yeroboami II, ntotila ya Izraele (23-29)

14  Na mvula ya zole ya Yehoashi+ mwana ya Yehoahazi ntotila ya Izraele, Amasia mwana ya Yehoashi ntotila ya Yuda kumaka ntotila.  Yandi vandaka ti bamvula 25 ntangu yandi kumaka ntotila, mpi yandi yalaka bamvula 29 na Yeruzalemi. Zina ya mama na yandi Yehoadini muntu ya Yeruzalemi.+  Yandi landaka kusala mambu ya mbote na meso ya Yehowa, kansi bonso nkaka na yandi Davidi+ ve. Yandi salaka mambu yonso mutindu tata na yandi Yehoashi salaka.+  Kansi bo katulaka+ ve bisika ya kunanguka, mpi bantu vandaka kaka kutambika mpi kupesa midinga ya bimenga na zulu ya bisika ya kunanguka.+  Ntangu kimfumu kumaka ngolo na maboko na yandi, yandi fwaka bansadi na yandi yina fwaka tata na yandi ntotila.+  Kansi yandi fwaka ve bana ya bantu yina fwaka tata na yandi, na kuwakana ti nsiku ya Yehowa yina bo me sonikaka na mukanda ya Nsiku ya Moize nde: “Bo fwete fwa ve batata sambu na bana na bo, mpi bo fwete fwa ve bana sambu na batata na bo; kansi bo fwete fwa konso muntu sambu na disumu na yandi mosi.”+  Yandi fwaka bantu ya Edomi+ 10 000 na Muwanda ya Mungwa,+ mpi yandi botulaka Sela na bitumba,+ ebuna zina na yo kumaka Yokteele tii bubu yai.  Ebuna Amasia tindaka binati-nsangu na Yehoashi mwana ya Yehoahazi mwana ya Yehu ntotila ya Izraele nde: “Kwisa, beto nwana bitumba.”*+  Yehoashi ntotila ya Izraele tindilaka Amasia ntotila ya Yuda nsangu yai: “Nti ya bansende ya Libani tindilaka nti ya sedre ya Libani nsangu nde, ‘Pesa mwana na nge ya nkento na mwana na mono ya bakala sambu yandi vanda nkento na yandi.’ Kansi, mbisi mosi ya mfinda ya Libani lutaka pene-pene mpi niataka nti yina ya bansende. 10  Ya kieleka, nge me fwa Edomi,+ yo yina ntima na nge me kuma lulendo. Yangalala na nkembo na nge, kansi bikala na nzo na nge.* Sambu na nki nge ke kudisosila mpasi ti lufwa, mpi kunata Yuda na kufwa ti nge?” 11  Kansi Amasia waka ve.+ Yo yina Yehoashi ntotila ya Izraele tombukaka, ebuna yandi ti Amasia ntotila ya Yuda nwanaka bitumba na Bete-shemeshi,+ yina kele ya Yuda.+ 12  Izraele bedisaka Yuda, yo yina konso muntu tinaka na nzo* na yandi. 13  Yehoashi ntotila ya Izraele kangaka Amasia ntotila ya Yuda, mwana ya Yehoashi mwana ya Ahazia, na Bete-shemeshi. Ebuna bo kwisaka na Yeruzalemi, mpi yandi salaka mpwasa na kibaka ya Yeruzalemi katuka na Kielo ya Efrayimi+ tii na Kielo ya Kinkonko,+ maboko 400.* 14  Yandi bakaka wolo yonso ti arza mpi bima yonso yina vandaka na nzo ya Yehowa mpi na bisika ya kubumba bimvwama ya nzo ya ntotila; yandi bakaka mpi bantu yina bo kangaka. Na nima, yandi vutukaka na Samaria. 15  Sambu na mambu ya nkaka ya Yehoashi salaka, mambu yina yandi salaka, ngolo na yandi, mpi mutindu yandi nwanaka ti ntotila Amasia ya Yuda, keti bo me sonikaka yo ve na mukanda ya bansangu ya bantotila ya Izraele? 16  Ebuna Yehoashi lalaka sambu na kupema ti ba-nkaka na yandi mpi bo zikaka yandi na Samaria+ ti bantotila ya Izraele; ebuna mwana na yandi Yeroboami*+ kumaka ntotila na kisika na yandi. 17  Amasia+ mwana ya Yehoashi ntotila ya Yuda zingaka bamvula 15 na nima ya lufwa ya Yehoashi+ mwana ya Yehoahazi ntotila ya Izraele.+ 18  Sambu na mambu ya nkaka ya Amasia salaka, keti bo me sonikaka yo ve na mukanda ya bansangu ya bantotila ya Yuda? 19  Na nima, bo sadilaka yandi komplo na Yeruzalemi,+ mpi yandi tinaka na Lakishi, kansi bo tindaka bantu na kulanda yandi na Lakishi mpi bo fwaka yandi kuna. 20  Yo yina bo kwisaka kuvutula yandi na bampunda, mpi bo zikaka yandi na Yeruzalemi ti ba-nkaka na yandi na Mbanza ya Davidi.+ 21  Ebuna bantu yonso ya Yuda bakaka Azaria,*+ yina vandaka ti bamvula 16,+ mpi bo kumisaka yandi ntotila na kisika ya tata na yandi Amasia.+ 22  Yandi tungaka diaka Elati+ mpi vutulaka yo na Yuda ntangu ntotila* lalaka sambu na kupema ti ba-nkaka na yandi.+ 23  Na mvula ya 15 ya Amasia mwana ya Yehoashi ntotila ya Yuda, Yeroboami+ mwana ya Yehoashi ntotila ya Izraele kumaka ntotila na Samaria, mpi yandi yalaka bamvula 41. 24  Yandi landaka kusala mambu ya mbi na meso ya Yehowa. Yandi yambulaka ve masumu yonso yina Yeroboami mwana ya Nebati pusaka Izraele na kusala.+ 25  Yandi vutulaka ndilu ya Izraele katuka na Lebo-amati*+ tii na Nzadi-Mungwa ya Araba,*+ kaka mutindu Yehowa Nzambi ya Izraele tubaka na nzila ya nsadi na yandi Yonasi,+ mwana ya Amitai, mbikudi ya bwala Gati-efere.+ 26  Sambu Yehowa monaka mpasi ya ngolo kibeni ya Izraele.+ Muntu mosi ve bikalaka sambu na kusadisa Izraele, yo vanda muntu ya me konda lusadisu to muntu ya kele ve ngolo. 27  Kansi Yehowa silaka nde yandi ta katula ve zina ya Izraele na zulu ya ntoto.+ Yo yina yandi gulusaka bo na maboko ya Yeroboami mwana ya Yehoashi.+ 28  Sambu na mambu ya nkaka ya Yeroboami salaka, yonso yina yandi salaka mpi ngolo na yandi, mutindu yandi nwanaka mpi mutindu yandi vutulaka Damasi+ ti Amati+ na Yuda, keti bo me sonikaka yo ve na mukanda ya bansangu ya bantotila ya Izraele? 29  Ebuna Yeroboami lalaka sambu na kupema ti ba-nkaka na yandi, ti bantotila ya Izraele; ebuna mwana na yandi Zekaria+ kumaka ntotila na kisika na yandi.

Banoti na nsi ya lutiti

To “beto kutana meso na meso.”
To “nzo ya ntotila.”
Na kisina, “tenta.”
Kiteso ya bametre 178. Tala Bangindu ya Ngika B14.
Disongidila, Yeroboami II.
Yo ke tendula “Yehowa Me Sadisa.” Bo ke binga yandi Uziya na 2Bt 15:13; 2Bs 26:1-23; Yez 6:1; mpi Zek 14:5.
Disongidila, tata na yandi Amasia.
To “na kisika ya kukotila na Amati.”
Disongidila, Nzadi ya Mungwa, to Nzadi-Mungwa ya Kufwa.