2 Bansangu 9:1-31

  • Ntotila-nkento ya Sheba me kwisa kutala Salomo (1-12)

  • Kimvwama ya Salomo (13-28)

  • Lufwa ya Salomo (29-31)

9  Ntangu yai, ntotila-nkento ya Sheba+ waka nsangu ya Salomo, yo yina yandi kwisaka na Yeruzalemi sambu na kumeka Salomo ti bangiufula ya mpasi. Yandi kwisaka ti bantu mingi kibeni, ti bashamo yina vandaka kunata mafuta ya balsami mpi wolo mingi kibeni+ ti matadi ya ntalu. Yandi kotaka kisika Salomo vandaka mpi tubilaka yandi mambu yonso yina vandaka na ntima na yandi.+  Ebuna Salomo pesaka bamvutu na bangiufula na yandi yonso. Kuvandaka ve ata ti kima mosi ya mpasi mingi* yina Salomo kukaka ve kutendudila yandi.  Ntangu ntotila-nkento ya Sheba monaka mayele ya Salomo,+ nzo yina yandi tungaka,+  madia ya mesa na yandi,+ bakiti ya bansadi na yandi, kisalu ya bansadi na yandi yina ke tulaka madia na mesa ti bilele na bo, bantu yina ke pesaka yandi malafu ti bilele na bo, mpi bimenga ya kuyoka yina yandi vandaka kupesa mbala na mbala na nzo ya Yehowa,+ yandi kondaka kibeni ndinga.*  Yo yina yandi tubilaka ntotila nde: “Nsangu ya mono waka na insi na mono sambu na mambu ya nge ke sala* mpi sambu na mayele na nge vandaka ya kieleka.  Kansi mono ndimaka yo ve tii kuna mono me kwisa mpi me mona yo na meso na mono mosi.+ Kansi mambu ya bo songaka mono me kuma ve ata na kati-kati ya mayele na nge ya mingi.+ Nge me luta kibeni nsangu yina mono waka.+  Kiese na bantu na nge, mpi kiese na bansadi na nge yina ke vandaka ntangu yonso ti nge, mpi ke wa mayele na nge!  Lukumu na Yehowa Nzambi na nge, yina me sepela na nge mpi me tula nge na kiti ya kimfumu na yandi sambu nge vanda ntotila sambu na Yehowa Nzambi na nge. Sambu Nzambi na nge ke zolaka Izraele,+ mpi sambu yandi sala nde yo zinga kimakulu, yandi me tula nge ntotila na yo sambu nge sambisa mambu na lunungu mpi nge zenga mambu na mutindu ya kusungama.”  Ebuna yandi pesaka ntotila batalanta* 120 ya wolo,+ mafuta ya balsami mingi kibeni, mpi matadi ya ntalu. Bo me nataka diaka ve mafuta ya balsami mingi bonso yina ntotila-nkento ya Sheba pesaka ntotila Salomo.+ 10  Diaka, bansadi ya Hirami ti bansadi ya Salomo yina vandaka kunata wolo katuka na Ofire+ vandaka kunata mpi banti ya algumi ti matadi ya ntalu.+ 11  Ntotila sadilaka banti yina ya algumi sambu na kusala bimatilu ya nzo ya Yehowa+ mpi ya nzo ya ntotila,+ mpi bakidare ti bima ya kubudila miziki ya kele ti bansinga sambu na miyimbi-bankunga.+ Bo me monaka ntete ve bima yina me fwanana ti yo na insi ya Yuda. 12  Ntotila Salomo pesaka mpi ntotila-nkento ya Sheba konso kima yina yandi vandaka na nzala na yo mpi yina yandi lombaka, kuluta* bima yina yandi natilaka Salomo. Na nima, ntotila-nkento yina bikisaka yandi mpi vutukaka na insi na yandi ti bansadi na yandi.+ 13  Kilo ya wolo yina bo vandaka kunatila Salomo konso mvula vandaka batalanta ya wolo 666,+ 14  katula yina bantu ya ke tekaka ti bantu ya mumbongo vandaka kunata; mpi wolo ti arza yina bantotila yonso ya Ba-arabi ti bamfumu ya bambanza ya insi yina vandaka kunatila Salomo.+ 15  Ntotila Salomo salaka bitaninu ya nene 200 ya wolo yina bo me vukisa ti kibende ya nkaka+ (bo sadilaka bashekele* 600 ya wolo yina bo me vukisa ti kibende ya nkaka na konso kitaninu)+ 16  mpi bitaninu ya fioti* 300 ya wolo yina bo me vukisa ti kibende ya nkaka (bo sadilaka bamine* ya wolo tatu na konso kitaninu ya fioti). Na nima ntotila tulaka yo na Nzo ya Mfinda ya Libani.+ 17  Ntotila salaka mpi kiti ya kimfumu ya nene na meno ya nzioko mpi pakulaka yo wolo ya kukonda kuvukisa ti kima ya nkaka.+ 18  Kuvandaka ti bima sambanu ya kumatila sambu na kukuma na kiti ya kimfumu, mpi kuvandaka ti kazune mosi ya wolo ya kukangisa na kiti yina ya kimfumu, mpi kiti yina vandaka ti maboko na balweka yonso zole, mpi bantambu zole+ vandaka ya kutelama pene-pene ya maboko yina. 19  Bantambu+ 12 vandaka ya kutelama na zulu ya bima yina sambanu ya kumatila, ntambu mosi na konso nsuka ya kima ya kumatila na kati ya bima yina sambanu ya kumatila. Ata kimfumu mosi ve me salaka kima ya mutindu yina. 20  Makopa yonso yina ntotila Salomo vandaka kunwila bo salaka yo na wolo, mpi bisadilu yonso ya Nzo ya Mfinda ya Libani bo salaka yo na wolo ya kukonda kuvukisa ti kima ya nkaka. Bo salaka ve ata kima mosi na arza, sambu na bilumbu ya Salomo bo vandaka kutadila arza bonso kima ya mpamba.+ 21  Sambu bamaswa ya ntotila vandaka kukwenda na Tarsisi+ ti bansadi ya Hirami.+ Mbala mosi na bamvula tatu, bamaswa ya Tarsisi vandaka kukwisa ti wolo mpi arza, meno ya nzioko,+ makaku, mpi bandeke ya bo ke bingaka bapaoni. 22  Yo yina ntotila Salomo lutaka bantotila yonso ya nkaka ya ntoto na kimvwama mpi na mayele.+ 23  Mpi bantotila ya ntoto ya mvimba vandaka kusosa kukutana ti* Salomo sambu na kuwa mayele yina Nzambi ya kieleka tulaka na ntima na yandi.+ 24  Konso ntotila vandaka kunata dikabu—bima ya arza, bima ya wolo, bilele,+ binwaninu, mafuta ya balsami, bampunda ya bitumba, mpi bampunda ya nkaka—mpi yo vandaka kusalama mutindu yina konso mvula. 25  Salomo vandaka ti bisika 4 000 ya kutula bampunda na yandi mpi bampunda* 12 000,+ yandi tulaka yo na bambanza ya bapusu-pusu mpi pene-pene ya ntotila na Yeruzalemi.+ 26  Yandi vandaka kuyala bantotila yonso katuka na Nzadi* tii na insi ya bantu ya Filistia mpi tii na ndilu ya Ezipte.+ 27  Ntotila kumisaka arza na Yeruzalemi mingi bonso matadi, mpi yandi kumisaka banti ya sedre mingi bonso banti ya sikomore na Shefela.+ 28  Bo vandaka kunatila Salomo bampunda yina vandaka kukatuka na Ezipte+ mpi na bansi yonso ya nkaka. 29  Sambu na mambu ya nkaka ya Salomo+ salaka, katuka na luyantiku tii na nsuka, keti bo me sonikaka yo ve na masonama ya mbikudi Natani,+ na mbikudulu ya Ahiya+ muntu ya Shilo, mpi na disolo ya bambona-meso ya Ido,+ muntu ya ke monaka bambona-meso, na yina me tala Yeroboami+ mwana ya Nebati? 30  Salomo yalaka na Yeruzalemi na Izraele ya mvimba bamvula 40. 31  Ebuna Salomo lalaka sambu na kupema ti ba-nkaka na yandi. Bo zikaka yandi na Mbanza ya tata na yandi Davidi;+ ebuna mwana na yandi Rehoboami kumaka ntotila na kisika na yandi.+

Banoti na nsi ya lutiti

Na kisina, “kima mosi ya kubumbana.”
Na kisina, “mpeve vandaka diaka ve na kati na yandi.”
To “na bangogo na nge.”
Talanta mosi kele bakilo 34,2. Tala Bangindu ya Ngika B14.
To mbala ya nkaka, “katula makabu ya me fwanana ti ntalu ya.”
Shekele mosi kele bagrame 11,4. Tala Bangindu ya Ngika B14.
Kitaninu mosi ya fioti, mbala mingi bantu ya ke sadilaka munduki ya tolo-tolo bantu vandaka kulwata yo.
Mine mosi na Masonuku ya Kiebreo kele bagrame 570. Tala Bangindu ya Ngika B14.
Na kisina, “kusosa luse ya.”
To “bantu yina ke tambusaka bampunda.”
Disongidila, Efrate.