2 Bansangu 6:1-42

  • Salomo me tuba na bantu (1-11)

  • Kisambu ya Salomo sambu na kuyantika kusadila tempelo (12-42)

6  Na ntangu yina Salomo tubaka nde: “Yehowa tubaka nde yandi ta zinga na mpimpa ya ngolo.+  Ntangu yai, mono me tungila nge nzo ya lukumu, kisika ya ngolo yina nge ta zingaka kimakulu.”+  Ebuna ntotila balukaka mpi yantikaka kusakumuna dibundu ya mvimba ya Izraele, mpi dibundu ya mvimba ya Izraele vandaka ya kutelama.+  Yandi tubaka nde: “Bika nde bo kumisa Yehowa Nzambi ya Izraele, muntu yina na munoko na yandi mosi silaka tata na mono Davidi, mpi yina me lungisa yo na maboko na yandi mosi, nde:  ‘Yantika kilumbu yina mono basisaka bantu na mono na insi ya Ezipte, mono me solaka ve ata mbanza mosi na makanda yonso ya Izraele sambu na kutunga nzo sambu zina na mono kubikala kuna,+ mpi mono me solaka ve muntu mosi sambu yandi kuma ntwadisi ya bantu na mono Izraele.  Kansi mono me solaka Yeruzalemi+ sambu zina na mono kubikala kuna, mpi mono me solaka Davidi sambu yandi yala bantu na mono Izraele.’+  Mpi nzala ya ntima ya tata na mono Davidi vandaka ya kutunga nzo sambu na zina ya Yehowa Nzambi ya Izraele.+  Kansi Yehowa tubilaka tata na mono Davidi nde, ‘Nzala ya ntima na nge vandaka ya kutunga nzo sambu na zina na mono, mpi nge salaka mbote na kuvanda ti nzala yai na ntima na nge.  Ata mpidina, nge ta tunga ve nzo yina, kansi mwana na nge yina nge ta buta,* yandi muntu ta tunga nzo sambu na zina na mono.’+ 10  Yehowa me lungisa mambu yina yandi silaka, sambu mono me yingaka tata na mono Davidi mpi mono me vanda na kiti ya kimfumu ya Izraele,+ kaka mutindu Yehowa silaka.+ Mono me tunga mpi nzo sambu na zina ya Yehowa Nzambi ya Izraele, 11  mpi kuna mono me tula Sanduku yina kele ti kuwakana+ yina Yehowa salaka ti bantu ya Izraele.” 12  Na nima, yandi telamaka na ntwala ya mesa-kimenga ya Yehowa na meso ya dibundu ya mvimba ya Izraele, mpi yandi tandulaka maboko na zulu.+ 13  (Sambu Salomo salaka estrade ya kwivre mpi tulaka yo na kati-kati ya kibansala.*+ Yo vandaka nda maboko* tanu, nene maboko tanu, mpi maboko tatu katuka na ntoto tii na zulu; mpi yandi telamaka na zulu na yo.) Yandi fukamaka na ntwala ya dibundu ya mvimba ya Izraele mpi yandi tandulaka maboko na zulu,+ 14  mpi yandi tubaka nde: “O Yehowa Nzambi ya Izraele, kele ve ti Nzambi bonso nge na zulu to na ntoto, yina ke taninaka kuwakana mpi ke monisaka zola ya kwikama na bansadi na nge yina ke tambulaka na ntwala na nge na ntima na bo ya mvimba.+ 15  Nge me lungisa mambu yina nge silaka na nsadi na nge Davidi tata+ na mono. Nge silaka na munoko na nge mosi, mpi bubu yai nge me lungisa yo na maboko na nge mosi.+ 16  Ntangu yai, O Yehowa Nzambi ya Izraele, lungisa mambu yina nge silaka na nsadi na nge Davidi, tata na mono, ntangu nge tubaka nde: ‘Ntangu yonso yo ta vandaka ti muntu mosi ya dibuta na nge na ntwala na mono sambu na kuvanda na kiti ya kimfumu ya Izraele, kana bana na nge kutula dikebi na nzila na bo mpi bo zitisa nsiku na mono,+ kaka mutindu nge tambulaka na ntwala na mono.’+ 17  Ntangu yai, O Yehowa Nzambi ya Izraele, bika nde mambu yina nge silaka na nsadi na nge Davidi kulungana. 18  “Kansi, keti Nzambi ta zinga kibeni ti bantu na ntoto?+ Tala! Zulu, ee, zulu ya zulu, lenda kuka nge ve;+ ebuna nzo yai ya mono me tunga ta kuka nge ve ata fioti!+ 19  Ntangu yai, tula dikebi na kisambu ya nsadi na nge mpi na diambu yina yandi ke lomba sambu nge wila yandi mawa, O Yehowa Nzambi na mono, mpi wa kudila na mono sambu na kulomba lusadisu mpi kisambu yina nsadi na nge ke sala na ntwala na nge bubu yai. 20  Bika nde meso na nge kuvanda ya kukanguka na ndambu ya nzo yai mpimpa ti mwini, na ndambu ya kisika yina nge tubaka nde nge ta tula zina na nge,+ sambu na kuwa kisambu yina nsadi na nge ke sala na ndambu ya kisika yai. 21  Mpi wa mambu yina nsadi na nge ke lomba sambu nge sadisa yandi mpi mambu yina bantu na nge Izraele ke lomba ntangu bo ke samba na ndambu ya kisika yai,+ mpi bika nde nge wa katuka na kisika yina nge ke zingaka, kuna na zulu;+ ee, bika nde nge wa mpi nge lolula.+ 22  “Kana muntu kusala disumu na ntwala ya nkweno na yandi ebuna bo lomba yandi na kudia ndefi* mpi bo tula yandi na nsi ya kiyeka ya ndefi* yina, ebuna ntangu yandi kele na nsi ya ndefi* yina, yandi kwisa na ntwala ya mesa-kimenga na nge na nzo yai,+ 23  wa kuna na zulu, sala, sambisa bansadi na nge, mpi vutudila muntu ya mbi mbi na yandi mpi tula mambu yina yandi salaka na zulu ya ntu na yandi,+ mpi zenga nde muntu ya lunungu me sala mbi ve* mpi futa yandi na kutadila lunungu na yandi.+ 24  “Kana mbeni me bedisa bantu na nge Izraele sambu bo landaka kusala masumu na ntwala na nge,+ ebuna bo vutukila nge, bo pesa zina na nge nkembo,+ bo samba,+ mpi bo bondila nge na nzo yai sambu nge wila bo mawa,+ 25  wa kuna na zulu,+ lolula disumu ya bantu na nge Izraele, mpi vutula bo na ntoto yina nge pesaka bo mpi ba-nkaka na bo.+ 26  “Kana zulu kukangama mpi mvula ke noka diaka ve+ sambu bo landaka kusala masumu na ntwala na nge,+ ebuna bo samba na ndambu ya kisika yai, bo pesa zina na nge nkembo, mpi bo yambula disumu na bo sambu nge kulumusaka bo,*+ 27  wa kuna na zulu mpi lolula disumu ya bansadi na nge, ya bantu na nge Izraele, sambu nge ta longa bo nzila ya mbote yina bo fwete tambula;+ mpi nokisa mvula+ na ntoto na nge yina nge pesaka bantu na nge bonso dikabu. 28  “Kana nzala me kota na ntoto,+ to kipupa,+ mwini ya ngolo, madia me bwa lubungi,+ bampasu ya ke tambulaka na kimvuka, to bampasu ya lukasi;*+ to kana bambeni na bo me kwisa kuziunga bo na konso mbanza ya insi yai,*+ to kana mpasi to maladi ya konso mutindu yina me kota,+ 29  konso kisambu,+ konso diambu yina konso muntu to bantu na nge yonso ya Izraele ta lomba sambu nge wila bo mawa+ (sambu konso muntu me zaba mpasi na yandi mpi diambu ya ke niokula yandi)+ ntangu bo ke tandula maboko na bo na ndambu ya nzo yai,+ 30  wa kuna na zulu, kisika yina nge ke zingaka,+ mpi lolula;+ futa konso muntu na kutadila banzila na yandi yonso, sambu nge me zaba ntima na yandi (nge mpamba muntu me zaba kibeni ntima ya muntu),+ 31  sambu bo wa nge boma mpi bo tambula na banzila na nge bilumbu yonso ya bo ke zinga na insi yina nge pesaka ba-nkaka na beto. 32  “Diaka, sambu na munzenza yina kele ve na kati ya bantu na nge Izraele mpi yina me katuka na insi ya ntama sambu na zina* na nge ya nene,+ diboko na nge ya ngolo, mpi diboko na nge ya kutandula, ebuna yandi kwisa mpi yandi samba na ndambu ya nzo yai,+ 33  wa kuna na zulu, kisika yina nge ke zingaka, mpi sala mambu yonso yina munzenza ke lomba nge, sambu bantu yonso ya ntoto kuzaba zina na nge+ mpi kuwa nge boma, mutindu bantu na nge Izraele ke waka nge boma, mpi bo zaba nde bo ke bingaka zina na nge na nzo yai ya mono me tunga. 34  “Kana bantu na nge kukwenda na bitumba sambu na kunwana ti bambeni na bo na nzila yina nge me tinda bo,+ mpi bo samba+ nge na ndambu ya mbanza yai ya nge me solaka mpi na ndambu ya nzo yina mono me tunga sambu na zina na nge,+ 35  wa kuna na zulu kisambu na bo mpi diambu ya bo ke lomba sambu nge wila bo mawa mpi zenga mambu sambu na mambote na bo.+ 36  “Kana bo sala disumu na ntwala na nge (sambu kele ve ti muntu yina ke salaka ve masumu),+ ebuna nge wila bo makasi mpi nge yambula bo na maboko ya mbeni, mpi bantu yina me kanga bo kunata bo na kimpika na insi mosi, ya ntama to ya pene-pene,+ 37  mpi bo vutukila mabanza na bo na insi yina bo nataka bo na kimpika, bo vutukila nge, mpi bo bondila nge na insi yina bo kele bampika sambu nge wila bo mawa, mpi bo tuba nde, ‘Beto me sala masumu, mpi beto me sala mbi; beto me sala mambu na mutindu ya mbi,’+ 38  ebuna bo vutukila nge na ntima na bo ya mvimba+ ti na moyo* na bo ya mvimba na insi ya kimpika+ na bo kisika bo nataka bo na kimpika, mpi bo samba na ndambu ya insi na bo yina nge pesaka na ba-nkaka na bo, ya mbanza yina nge me solaka,+ mpi ya nzo yina mono me tunga sambu na zina na nge, 39  wa kuna na zulu, kisika yina nge ke zingaka, kisambu na bo mpi diambu ya bo ke lomba sambu nge wila bo mawa, mpi zenga mambu sambu na mambote na bo+ mpi lolula bantu na nge yina salaka disumu na ntwala na nge. 40  “Ntangu yai, O Nzambi na mono, pardo, bika nde meso na nge kuvanda ya kukanguka mpi makutu na nge kutula dikebi na kisambu yina bo ke sala na* kisika yai.+ 41  Ntangu yai, O Yehowa Nzambi, tombuka na kisika na nge ya kupema,+ nge ti Sanduku ya ngolo na nge. O Yehowa Nzambi, bika nde banganga-nzambi na nge kulwata luguluku, mpi bika nde bantu na nge ya kwikama kuwa kiese na bumbote na nge.+ 42  O Yehowa Nzambi, kubuya ve* muntu yina nge me tulaka mafuta.+ Bika nde nge yibuka zola na nge ya kwikama na nsadi na nge Davidi.”+

Banoti na nsi ya lutiti

Na kisina, “mwana na nge, yina ta basika na bapiku na nge.”
To “lupangu.”
Diboko mosi kele basantimetre 44,5. Tala Bangindu ya Ngika B14.
To “mpi muntu yina ya nkaka kusinga yandi.” Disongidila, ndefi yina vandaka kunata ndola kana muntu me dia ndefi ya luvunu to me lungisa yo ve.
Na kisina, “kusinga.”
Na kisina, “kusinga.”
Na kisina, “kele muntu ya lunungu.”
To “monisaka bo mpasi.”
To “bampasu yina ke pumbukaka.”
Na kisina, “na insi ya bakielo na yandi.”
To “lukumu.”
To “sambu na.”
Na kisina, “kukatula ve luse na.”