2 Bansangu 29:1-36

  • Ezekiasi, ntotila ya Yuda (1, 2)

  • Mambu yina Ezekiasi yidikaka (3-11)

  • Bo me kumisa tempelo bunkete (12-19)

  • Bo me vutukila bisalu na tempelo (20-36)

29  Ezekiasi+ kumaka ntotila ntangu yandi vandaka ti bamvula 25, mpi yandi yalaka bamvula 29 na Yeruzalemi. Zina ya mama na yandi Abiya mwana ya Zekaria.+  Yandi landaka kusala mambu ya mbote na meso ya Yehowa,+ kaka mutindu nkaka na yandi Davidi salaka.+  Na mvula ya ntete ya luyalu na yandi, na ngonda ya ntete, yandi kangulaka bakielo ya nzo ya Yehowa mpi yidikaka yo.+  Na nima yandi bingaka banganga-nzambi ti Balevi mpi yandi vukisaka bo na kisika ya mpenza na ndambu ya esti.  Yandi tubilaka bo nde: “Beno wa mono, beno Balevi. Ntangu yai beno kudisantisa+ mpi beno santisa nzo ya Yehowa Nzambi ya ba-nkaka na beno, mpi beno katula bima ya mvindu na kisika ya santu.+  Sambu batata na beto kondaka kwikama mpi bo salaka mambu ya mbi na meso ya Yehowa Nzambi na beto.+ Bo yambulaka yandi, bo katulaka baluse na bo na nzo-tenta ya Yehowa, mpi bo pesaka yandi mukongo.+  Bo kangaka mpi bakielo ya kisika ya kukotila+ mpi bo fwaka minda.+ Bo yambulaka kuyoka ndumbu+ mpi kupesa Nzambi ya Izraele bimenga ya kuyoka+ na kisika ya santu.  Ebuna Yehowa wilaka Yuda ti Yeruzalemi makasi,+ yo yina yandi kumisaka bo kima ya ke pesa boma, kima ya ke yitukisa, mpi kima ya kubudila mwita,* mutindu beno lenda mona yo na meso na beno mosi.+  Batata na beto fwaka na mbele ya bitumba,+ mpi bana na beto ya babakala ti ya bankento, mpi bankento na beto kwendaka na kimpika sambu na diambu yai.+ 10  Ntangu yai, nzala ya ntima na mono kele ya kusala kuwakana ti Yehowa Nzambi ya Izraele,+ sambu makasi ya ngolo yina yandi me wila beto kukatuka na beto. 11  Bana na mono, yai kele ve ntangu ya kupema,* sambu Yehowa me sola beno na kutelama na ntwala na yandi, na kuvanda bansadi na yandi,+ mpi na kuyoka bimenga na yandi sambu yo basisa midinga.”+ 12  Ebuna Balevi telamaka: Mahati mwana ya Amasai ti Yoele mwana ya Azaria na bana ya Kohati;+ na bana ya Merari:+ Kishi mwana ya Abdi ti Azaria mwana ya Yehalelele; na bana ya Gershoni:+ Yoa mwana ya Zima ti Edeni mwana ya Yoa; 13  na bana ya Elisafani: Shimri ti Yeuele; na bana ya Asafi:+ Zekaria ti Matania; 14  na bana ya Emani:+ Yehiele ti Shimei; na bana ya Yedutuni:+ Shemaya ti Uziele. 15  Ebuna bo vukisaka bampangi na bo, bo kudisantisaka, mpi bo kwisaka, mutindu ntotila songaka bo na kulanda mambu yina Yehowa tubaka, sambu na kukumisa nzo ya Yehowa bunkete.+ 16  Na nima, banganga-nzambi kotaka na nzo ya Yehowa sambu na kukumisa yo bunkete, mpi bo basisaka bima yonso ya mvindu yina bo monaka na tempelo ya Yehowa, ebuna bo nataka yo na kibansala+ ya nzo ya Yehowa. Na nima Balevi bakaka yo mpi bo nataka yo na nganda, na Muwanda ya Kidroni.+ 17  Na mutindu yina, bo yantikaka kusantisa yo na kilumbu ya ntete ya ngonda ya ntete, mpi na kilumbu ya nana ya ngonda yina bo kumaka na kisika ya kukotila ya nzo ya Yehowa.+ Bo santisaka nzo ya Yehowa bilumbu nana, mpi bo manisaka na kilumbu ya 16 ya ngonda ya ntete. 18  Na nima bo kotaka kisika ntotila Ezekiasi vandaka mpi bo tubaka nde: “Beto me kumisa bunkete nzo ya mvimba ya Yehowa, mesa-kimenga ya dikabu ya kuyoka+ ti bisadilu na yo yonso,+ mpi mesa ya mampa ya kutetika*+ ti bisadilu na yo yonso. 19  Beto me yidika mpi me santisa+ bisadilu yonso yina ntotila Ahazi katulaka na nsungi ya luyalu na yandi ntangu yandi salaka mambu kukonda kwikama,+ mpi yo kele na ntwala ya mesa-kimenga ya Yehowa.” 20  Ntotila Ezekiasi telamaka na suka-suka mpi vukisaka bamfumu ya mbanza, ebuna bo tombukaka na nzo ya Yehowa. 21  Bo nataka bangombe ya babakala nsambwadi, mameme ya babakala nsambwadi, bana-mameme ya babakala nsambwadi, mpi bankombo ya babakala nsambwadi bonso dikabu sambu na disumu sambu na kimfumu, sambu na kisika ya santu, mpi sambu na Yuda.+ Yo yina yandi songaka banganga-nzambi, bana ya Aroni, na kutambika yo na mesa-kimenga ya Yehowa. 22  Na nima bo fwaka bangombe,+ ebuna banganga-nzambi bakaka menga mpi bo mwangaka yo na mesa-kimenga;+ bo fwaka mameme ya babakala mpi bo mwangaka menga na mesa-kimenga, mpi bo fwaka bana-mameme ya babakala mpi bo mwangaka menga yina na mesa-kimenga. 23  Na nima bo nataka bankombo ya babakala ya dikabu sambu na disumu na ntwala ya ntotila mpi ya dibundu ebuna bo tulaka maboko na bo na zulu na yo. 24  Banganga-nzambi fwaka yo mpi pesaka dikabu sambu na disumu ti menga ya bambisi yina na mesa-kimenga, sambu na kufika masumu ya Izraele ya mvimba, sambu ntotila tubaka nde dikabu ya kuyoka mpi dikabu sambu na disumu fwete vanda sambu na Izraele ya mvimba. 25  Na ntangu yina, yandi songaka Balevi na kutelama na nzo ya Yehowa ti basembale, bima ya kubudila miziki ya kele ti bansinga, mpi bakidare,+ na kulanda nsiku ya Davidi,+ ya Gadi+ muntu ya ntotila ya ke monaka bambona-meso, mpi ya mbikudi Natani,+ sambu nsiku yina katukaka na Yehowa na nzila ya bambikudi na yandi. 26  Yo yina Balevi telamaka ti bima ya Davidi ya kubudila miziki, mpi banganga-nzambi vandaka ti bampungi.+ 27  Ebuna Ezekiasi songaka bo na kupesa kimenga ya kuyoka na mesa-kimenga.+ Ntangu bo yantikaka kupesa dikabu ya kuyoka, nkunga ya Yehowa mpi bampungi yantikaka, na kulanda lutwadisu ya bima ya kubudila miziki ya Davidi ntotila ya Izraele. 28  Dibundu ya mvimba fukamaka ntangu bo vandaka kuyimba nkunga mpi kubula bampungi—mambu yina yonso landaka kusalama tii kuna bo manisaka kupesa dikabu ya kuyoka. 29  Ntangu bo manisaka kupesa dikabu, ntotila mpi bantu yonso yina vandaka ti yandi fukamaka mpi bwaka luse na ntoto. 30  Ebuna ntotila Ezekiasi mpi bamfumu songaka Balevi na kukumisa Yehowa ti bangogo ya Davidi+ mpi ya Asafi+ muntu ya ke monaka bambona-meso. Yo yina, bo kumisaka Nzambi ti kiese mingi, ebuna bo fukamaka mpi bwaka luse na ntoto. 31  Ebuna Ezekiasi tubaka nde: “Ntangu yai ya bo me tula beno na kingenga* sambu na Yehowa, beno kwisa mpi beno nata bimenga mpi makabu ya kupesa matondo na nzo ya Yehowa.” Yo yina dibundu yantikaka kunata bimenga mpi makabu ya kupesa matondo, mpi konso muntu yina ntima na yandi zolaka nataka makabu ya kuyoka.+ 32  Ntalu ya makabu ya kuyoka yina dibundu nataka vandaka bangombe 70, mameme ya babakala 100, bana-mameme ya babakala 200, bambisi yai yonso vandaka dikabu ya kuyoka sambu na Yehowa,+ 33  mpi makabu ya santu vandaka bangombe 600 mpi mameme 3 000. 34  Kansi banganga-nzambi vandaka ve mingi sambu na kukatula bampusu ya makabu yonso ya kuyoka, yo yina bampangi na bo Balevi sadisaka bo+ tii kuna kisalu manaka mpi tii kuna banganga-nzambi lendaka kudisantisa,+ sambu Balevi vandaka kutula dikebi mingi* kuluta banganga-nzambi na yina me tala kudisantisa. 35  Diaka, makabu ya kuyoka vandaka mingi,+ ti bitini ya mafuta ya bimenga ya kinduku+ mpi makabu ya malafu sambu na makabu ya kuyoka.+ Mutindu yo yai bo vutulaka* kisalu ya nzo ya Yehowa. 36  Yo yina, Ezekiasi mpi bantu yonso waka kiese sambu na mambu yina Nzambi ya kieleka sadilaka bantu,+ sambu mambu yai yonso salamaka na kintulumukina.

Banoti na nsi ya lutiti

To “ya kuseka.”
Na kisina, “ya kuvanda kidiba.”
Disongidila, mampa ya kumonisa.
Na kisina, “Ntangu yai ya beno me fulusa maboko na beno.”
Na kisina, “vandaka ti ntima ya kusungama.”
To “yidikaka.”