2 Bansangu 26:1-23

  • Uziya, ntotila ya Yuda (1-5)

  • Mambu yina basoda ya Uziya salaka (6-15)

  • Uziya muntu ya lulendo me baka maladi ya lepre (16-21)

  • Lufwa ya Uziya (22, 23)

26  Ebuna bantu yonso ya Yuda bakaka Uziya,+ yina vandaka ti bamvula 16, mpi bo kumisaka yandi ntotila na kisika ya tata na yandi Amasia.+  Yandi tungaka diaka Eloti+ mpi vutulaka yo na Yuda ntangu ntotila* lalaka sambu na kupema ti ba-nkaka na yandi.+  Uziya+ vandaka ti bamvula 16 ntangu yandi kumaka ntotila, mpi yandi yalaka bamvula 52 na Yeruzalemi. Zina ya mama na yandi Yekolia muntu ya Yeruzalemi.+  Yandi landaka kusala mambu ya mbote na meso ya Yehowa, kaka mutindu tata na yandi Amasia salaka.+  Mpi yandi landaka kusosa Nzambi na bilumbu ya Zekaria, yina longaka yandi na kuwa Nzambi ya kieleka boma. Na ntangu yandi vandaka kusosa Yehowa, Nzambi ya kieleka salaka nde yandi toma.+  Yandi basikaka mpi nwanaka ti bantu ya Filistia+ mpi yandi tobulaka kibaka ya Gati,+ kibaka ya Yabne,+ mpi kibaka ya Ashdodi.+ Ebuna yandi tungaka bambanza na teritware ya Ashdodi mpi na kati ya bantu ya Filistia.  Nzambi ya kieleka landaka kusadisa yandi ntangu yandi vandaka kunwana ti bantu ya Filistia, ti bantu ya Arabia+ yina vandaka kuzinga na Gurbaale, mpi ti bantu ya Meunimi.  Bantu ya Amoni+ yantikaka kupesa Uziya kitadi. Nsuka-nsuka lukumu na yandi panzanaka tii na Ezipte, sambu yandi kumaka ngolo mingi kibeni.  Diaka, Uziya tungaka banzo-zulu+ na Yeruzalemi pene-pene ya Kielo ya Kinkonko,+ ya Kielo ya Muwanda,+ mpi ya Dikunzi ya Ke Simbaka Kibaka, mpi yandi kumisaka yo ngolo. 10  Yandi tungaka diaka banzo-zulu+ na ntoto-makanga, mpi yandi timunaka* mabulu mingi ya masa (sambu yandi vandaka ti bitwisi mingi); yandi salaka mpi mutindu mosi na Shefela mpi na ntoto ya kukonda ngumba. Yandi vandaka ti bantu ya ke salaka bilanga mpi bantu ya ke salaka bilanga ya vinu na bangumba mpi na Karmele, sambu yandi vandaka kuzola kisalu ya bilanga. 11  Diaka, Uziya kumaka ti basoda yina zabaka kunwana bitumba. Bo vandaka kukwenda bitumba na bimvuka ya bo me yidika mbote. Sekretere Yeyele+ mpi kapita Maaseya vandaka kutanga bo mpi kusonika bazina na bo,+ na lutwadisu ya Hanania, mfumu mosi ya ntotila. 12  Ntalu ya mvimba ya bamfumu ya banzo ya batata yina vandaka kutwadisa basoda yai ya ngolo vandaka 2 600. 13  Basoda yina vandaka na nsi ya lutwadisu na bo vandaka 307 500, babakala yina vandaka ya kuyilama sambu na bitumba, basoda ya me fwana na kupesa ntotila maboko sambu na kunwana ti mbeni.+ 14  Uziya pesaka basoda yonso bitaninu, makonga,+ bampu, binkutu ya bibende,+ minduki ya batolo-tolo, mpi matadi ya lanse.+ 15  Diaka, yandi salaka bamasini ya bitumba na Yeruzalemi, yina bantu ya mayele salaka; bo tulaka yo na zulu ya banzo-zulu+ mpi na binkonko ya bibaka mpi yo vandaka kulosa batolo-tolo ti matadi ya nene. Yo yina, lukumu na yandi panzanaka na bisika yonso, sambu yandi bakaka lusadisu mingi kibeni mpi yandi kumaka ngolo. 16  Kansi, ntangu yandi kumaka ngolo, ntima na yandi kumaka lulendo sambu na kubwa na yandi mosi, mpi yandi salaka mambu kukonda kwikama na ntwala ya Yehowa Nzambi na yandi na mutindu yandi kotaka na tempelo ya Yehowa sambu na kuyoka ndumbu na mesa-kimenga ya ndumbu.+ 17  Na mbala mosi nganga-nzambi Azaria mpi banganga-nzambi ya nkaka ya Yehowa ya kikesa 80 landaka yandi. 18  Bo nwanisaka ntotila Uziya mpi bo tubilaka yandi nde: “Uziya, nge me fwana ve na kuyokila Yehowa ndumbu!+ Kaka banganga-nzambi bantu fwete yoka ndumbu, sambu bo kele bana ya Aroni,+ bantu yina bo me santisaka. Basika na kisika ya santu, sambu nge me sala mambu kukonda kwikama, mpi Yehowa Nzambi ta pesa nge ve nkembo sambu na diambu yai.” 19  Kansi Uziya, yina vandaka ti kima ya kuyokila ndumbu na maboko na yandi, waka makasi ya ngolo;+ mpi ntangu yandi wilaka banganga-nzambi makasi ya ngolo, maladi ya lepre+ basikaka na mbunzu na yandi na ntwala ya banganga-nzambi na nzo ya Yehowa, pene-pene ya mesa-kimenga ya ndumbu. 20  Ntangu Azaria mfumu ya banganga-nzambi mpi banganga-nzambi yonso balukaka sambu na kutala yandi, bo monaka nde maladi ya lepre me simba yandi na mbunzu! Yo yina bo basisaka yandi kuna nswalu, mpi yandi mosi salaka nswalu na kubasika, sambu Yehowa bulaka yandi. 21  Ntotila Uziya bikalaka muntu ya maladi ya lepre tii na kilumbu ya lufwa na yandi, mpi yandi vandaka kuzinga na nzo mosi ya kingenga bonso muntu ya maladi ya lepre,+ sambu bo kulaka yandi na nzo ya Yehowa. Mwana na yandi Yotami vandaka kutwadisa nzo ya ntotila mpi yandi vandaka kusambisa bantu ya insi.+ 22  Mpi mambu ya nkaka ya Uziya salaka, katuka na luyantiku tii na nsuka, mbikudi Yezaya+ mwana ya Amozi sonikaka yo. 23  Ebuna Uziya lalaka sambu na kupema ti ba-nkaka na yandi, mpi bo zikaka yandi ti ba-nkaka na yandi, kansi na kilanga ya kuzika bantu, kilanga yina vandaka sambu na bantotila, sambu bo tubaka nde: “Yandi kele muntu ya maladi ya lepre.” Ebuna mwana na yandi Yotami+ kumaka ntotila na kisika na yandi.

Banoti na nsi ya lutiti

Disongidila, tata na yandi Amasia.
Ziku timunaka na ditadi.