2 Bansangu 22:1-12

  • Ahazia, ntotila ya Yuda (1-9)

  • Atalia me baka kimfumu na kingolo-ngolo (10-12)

22  Ebuna bantu ya Yeruzalemi kumisaka mwana na yandi ya nsuka Ahazia ntotila na kisika na yandi, sambu kimvuka ya miyibi yina kwisaka na camp ti Ba-arabi fwaka bana yonso ya bambuta.+ Yo yina, Ahazia mwana ya Yehorami yantikaka kuyala bonso ntotila ya Yuda.+  Ahazia vandaka ti bamvula 22 ntangu yandi kumaka ntotila, mpi yandi yalaka mvula mosi na Yeruzalemi. Zina ya mama na yandi Atalia,+ mutekolo* ya Omri.+  Yandi mpi tambulaka na banzila ya nzo ya Ahabi,+ sambu mama na yandi kumaka ndongisi na yandi na kusala mambu ya mbi.  Yandi landaka kusala mambu ya mbi na meso ya Yehowa, bonso nzo ya Ahabi, sambu bo kumaka bandongisi na yandi na nima ya lufwa ya tata na yandi, mpi bo nataka yandi na lufwa.  Yandi landaka ndongisila na bo mpi kwendaka ti Yehorami mwana ya Ahabi ntotila ya Izraele sambu na kunwanisa Azaele+ ntotila ya Siria na Ramoti-gileadi,+ kisika bantu ya ke sadilaka munduki ya tolo-tolo lwadisaka Yehorami.  Yandi vutukaka na Yizreele+ sambu na kusansa bamputa yina bo lwadisaka yandi na Rama ntangu yandi nwanaka ti Azaele ntotila ya Siria.+ Ahazia* mwana ya Yehorami+ ntotila ya Yuda kwendaka na Yizreele sambu na kutala Yehorami+ mwana ya Ahabi, sambu bo lwadisaka yandi.*+  Kansi Nzambi salaka nde Ahazia kubwa ntangu yandi kwisaka kutala Yehorami; mpi ntangu yandi kumaka, yandi basikaka ti Yehorami sambu na kukutana ti Yehu+ mutekolo* ya Nimshi, yina Yehowa tulaka mafuta sambu na kufwa* nzo ya Ahabi.+  Ntangu Yehu yantikaka kupesa nzo ya Ahabi ndola, yandi monaka bamfumu ya Yuda mpi bana ya bampangi ya Ahazia, bansadi ya Ahazia, ebuna yandi fwaka bo.+  Na nima yandi sosaka Ahazia; bo kangaka yandi kisika yandi bumbanaka na Samaria, mpi bo nataka yandi na Yehu. Na nima bo fwaka yandi mpi bo zikaka yandi,+ sambu bo tubaka nde: “Yandi kele mutekolo ya Yehoshafati, yina sosaka Yehowa na ntima na yandi ya mvimba.”+ Ata muntu mosi ve ya nzo ya Ahazia vandaka ti kiyeka ya kuyala na kimfumu. 10  Ntangu Atalia,+ mama ya Ahazia, monaka nde mwana na yandi me fwa, yandi telamaka mpi fwaka dibuta ya mvimba ya kimfumu* ya nzo ya Yuda.+ 11  Kansi, Yehoshabeati mwana ya ntotila ya nkento bakaka Yehoashi+ mwana ya Ahazia, yandi katulaka yandi na kati ya bana ya ntotila yina bo zolaka kufwa mpi tinisaka yandi, ebuna yandi tulaka yandi ti ndesi na yandi na suku mosi ya kulala ya kati. Yehoshabeati mwana ya ntotila Yehorami+ (yandi vandaka nkento ya nganga-nzambi Yehoyada+ mpi mpangi ya Ahazia) nungaka na kubumba yandi sambu Atalia kumona yandi ve, yo yina Atalia fwaka yandi ve.+ 12  Yandi bikalaka ti bo bamvula sambanu, ya kubumbana na nzo ya Nzambi ya kieleka, na ntangu yina Atalia vandaka kuyala insi.

Banoti na nsi ya lutiti

Na kisina, “mwana-nkento.”
Na bamaniskri ya nkaka ya Kiebreo, “Azaria.”
To “yandi vandaka kubela.”
Na kisina, “mwana.”
Na kisina, “kukatula.”
Na kisina, “nkuna yonso ya kimfumu.”