2 Bansangu 19:1-11

  • Yehu me nganina Yehoshafati (1-3)

  • Mambu yina Yehoshafati yidikaka (4-11)

19  Ebuna Yehoshafati ntotila ya Yuda vutukaka mbote*+ na nzo na yandi* na Yeruzalemi.  Yehu+ mwana ya Hanani+ muntu ya ke monaka bambona-meso basikaka sambu na kukutana ti yandi mpi tubilaka ntotila Yehoshafati nde: “Keti nge fwete sadisa muntu ya mbi,+ mpi keti nge fwete zola bantu yina ke mengaka Yehowa?+ Yehowa me wila nge makasi sambu na diambu yai.  Ata mpidina, Nzambi me mona mambu ya mbote na kati na nge,+ sambu nge katulaka banti ya santu* na insi mpi nge me yidika ntima na nge sambu na* kusosa Nzambi ya kieleka.”+  Yehoshafati landaka kuzinga na Yeruzalemi, mpi yandi kwendaka diaka na kati ya bantu katuka na Bere-sheba tii na ntoto ya bangumba ya Efrayimi,+ sambu na kuvutula bo na Yehowa Nzambi ya ba-nkaka na bo.+  Yandi tulaka mpi bazuzi na insi ya mvimba, na bambanza ya Yuda yonso ya ngolo, mbanza na mbanza.+  Mpi yandi tubilaka bazuzi nde: “Beno keba na mambu yina beno ke sala, sambu beno ke sambisa ve sambu na muntu kansi sambu na Yehowa, mpi yandi kele ti beno ntangu beno ke sambisa.+  Yo yina, bika nde boma ya Yehowa kusimba beno.+ Beno keba na mambu yina beno ke sala, sambu kukonda lunungu,+ kupona-pona,+ mpi kubaka avoka+ ke vandaka ve na Yehowa Nzambi na beto.”  Na Yeruzalemi mpi, Yehoshafati tulaka ndambu ya Balevi, banganga-nzambi, mpi ndambu ya bamfumu ya banzo ya batata ya Izraele na kuvanda bazuzi sambu na Yehowa mpi sambu na kusambisa mambu ya bantu ya Yeruzalemi.+  Mpi yandi songaka bo nde: “Yai mambu ya beno fwete sala sambu na boma ya Yehowa, na kwikama, mpi na ntima ya mvimba:* 10  Konso ntangu yina bampangi na beno yina ke zingaka na bambanza na bo ke kwisa kunata diambu mosi yina ke tadila kutiamuna menga+ to ngiufula ya me tala nsiku, ntuma, bansiku, to balusambisu, beno fwete kebisa bo sambu bo sala ve mbi na ntwala ya Yehowa; kana ve yandi ta wila beno ti bampangi na beno makasi. Yai mambu ya beno fwete sala, sambu beno sala mbi ve. 11  Amaria mfumu ya banganga-nzambi ke twadisa beno na mambu yonso ya Yehowa.+ Zebadia mwana ya Ismaele kele ntwadisi ya nzo ya Yuda sambu na mambu yonso ya me tala ntotila. Mpi Balevi ta vanda bakapita na beno. Beno vanda ngolo mpi beno sala, mpi bika nde Yehowa kuvanda ti bantu yina ke sala mambu ya mbote.”*+

Banoti na nsi ya lutiti

To “na ngemba.”
To “nzo ya ntotila.”
To “mpi ntima na nge kele ti lukanu ya.”
To “ya kudipesa ya mvimba.”
To “kuvanda ti yina kele mbote.”