2 Bansangu 14:1-15

  • Lufwa ya Abiya (1)

  • Aza, ntotila ya Yuda (2-8)

  • Aza me bedisa bantu ya Etiopia 1 000 000 (9-15)

14  Ebuna Abiya lalaka sambu na kupema ti ba-nkaka na yandi, mpi bo zikaka yandi na Mbanza ya Davidi;+ ebuna mwana na yandi Aza kumaka ntotila na kisika na yandi. Na bilumbu na yandi insi vandaka na ngemba bamvula kumi.  Aza salaka mambu ya mbote mpi ya lunungu na meso ya Yehowa Nzambi na yandi.  Yandi katulaka bamesa-kimenga ya banzenza+ mpi bisika ya kunanguka,+ yandi panza-panzaka makunzi ya santu, mpi zengaka banti ya santu.*+  Diaka, yandi songaka bantu ya Yuda na kusosa Yehowa Nzambi ya ba-nkaka na bo mpi na kuzitisa Nsiku ti ntuma.  Yo yina yandi katulaka bisika ya kunanguka ti bamesa-kimenga ya ndumbu na bambanza yonso ya Yuda,+ mpi kimfumu vandaka na ngemba na luyalu na yandi.  Yandi tungaka bambanza ya ngolo na Yuda,+ sambu insi vandaka na ngemba mpi bo vandaka ve kunwanisa yandi na bamvula yina, sambu Yehowa pesaka yandi ngemba.+  Yandi tubilaka bantu ya Yuda nde: “Beto tunga bambanza yai mpi beto ziunga yo ti bibaka mpi banzo-zulu,+ bakielo* mpi banti. Sambu insi kele na maboko na beto, sambu beto me sosa Yehowa Nzambi na beto. Beto me sosa yandi, mpi yandi me pesa beto ngemba na bandambu yonso.” Yo yina bo nungaka na kutunga.+  Na Yuda, Aza vandaka ti basoda 300 000, yina vandaka ti bitaninu ya nene mpi makonga. Na Benyamini, yandi vandaka ti basoda ya ngolo 280 000 yina vandaka kunata bitaninu ya fioti* mpi vandaka ti minduki ya batolo-tolo.*+  Na nima, Zera muntu ya Etiopia kwisaka ti basoda 1 000 000 mpi bapusu-pusu 300 sambu na kunwanisa bo.+ Ntangu yandi kumaka na Maresha,+ 10  Aza basikaka sambu na kunwana ti yandi mpi bo yilamaka sambu na bitumba na Muwanda ya Sefata na Maresha. 11  Ebuna Aza bingaka Yehowa Nzambi na yandi+ mpi tubaka nde: “O Yehowa, yo kele ve na mfunu sambu na nge kana bantu yina nge ke sadisa kele mingi to kele ve na ngolo.+ Sadisa beto, O Yehowa Nzambi na beto, sambu beto ke tula ntima na nge,+ mpi beto me kwisa kunwanisa kimvuka yai ya bantu na zina na nge.+ O Yehowa, nge kele Nzambi na beto. Kubika ve nde muntu kununga nge.”+ 12  Yo yina Yehowa bedisaka bantu ya Etiopia na ntwala ya Aza mpi na ntwala ya Yuda, ebuna bantu ya Etiopia tinaka.+ 13  Aza ti bantu yina vandaka ti yandi landaka bo tii na Gerare,+ mpi bantu ya Etiopia landaka kubwa tii kuna ata muntu mosi ve bikalaka na luzingu, sambu Yehowa mpi makesa na yandi bedisaka bo. Na nima bo nataka bima mingi kibeni yina bo botulaka. 14  Bo fwaka mpi bambanza yonso yina vandaka na nziunga ya Gerare, sambu boma ya Yehowa simbaka bantu yina; mpi bo botulaka bima na bambanza yina yonso, sambu bima ya kubotula vandaka mingi na kati na yo. 15  Bo kotaka mpi na batenta ya bantu yina vandaka ti bitwisi, mpi bo botulaka bitwisi ti bashamo mingi kibeni, na nima bo vutukaka na Yeruzalemi.

Banoti na nsi ya lutiti

Na kisina, “bakielo zole.”
Kitaninu mosi ya fioti, mbala mingi bantu ya ke sadilaka munduki ya tolo-tolo bantu vandaka kulwata yo.
Na kisina, “vandaka kubenda minduki ya batolo-tolo.”