1 Timoteo 5:1-25

  • Mutindu ya kusadila baleke ti bambuta mambu (1, 2)

  • Kusadisa mifwidi ya bankento (3-16)

    • Konso muntu kulungisa banzala ya bantu ya nzo na yandi (8)

  • Kupesa lukumu na bankuluntu yina ke salaka ngolo (17-25)

    • “Ndambu ya vinu sambu na divumu na nge” (23)

5  Kunganina ve mbuta-muntu+ ti bangogo ya ngolo. Kansi, bondila yandi bonso tata, baleke ya babakala bonso bampangi ya babakala,  bankento yina kele bambuta bonso bamama, baleke ya bankento bonso bampangi ya bankento ti mabanza ya bunkete kibeni.  Tula dikebi na* mifwidi ya bankento yina kele kibeni mifwidi.*+  Kansi kana mufwidi ya nkento kele ti bana to bantekolo, mbote bo sadila ntete kikalulu ya kukangama na Nzambi na nzo na bo mosi+ mpi bo pesa bibuti ti ba-nkaka na bo bima yina me fwana na bo,+ sambu yo kele mambu yina Nzambi ke ndimaka.+  Nkento yina kele kibeni mufwidi mpi yina me bikalaka maboko mpamba, yandi me tulaka ntima na Nzambi+ mpi yandi ke kwaminaka na kubondila mpi na bisambu mpimpa ti mwini.+  Kansi mufwidi yina ke kudipesa na biese ya nitu kele ya kufwa ata yandi kele na luzingu.  Yo yina, landa kupesa bo malongi* yai, sambu bo vanda bantu yina bo lenda funda ve ata na kima mosi.  Ya kieleka, kana muntu ke lungisa ve banzala ya bantu na yandi, mpi mingi-mingi ya bantu ya nzo na yandi, yandi me buya lukwikilu mpi yandi kele mbi kuluta muntu yina kele ve ti lukwikilu.+  Mufwidi ya nkento yina bo fwete tula zina na yandi na lisiti fwete vanda ve ti bamvula na nsi ya 60, kana yandi vandaka nkento ya bakala mosi mpamba, 10  yina me zabanaka sambu na bisalu ya mbote,+ kana yandi sansaka bana,+ kana yandi vandaka kuyamba banzenza,+ kana yandi vandaka kuyobisa makulu ya basantu,+ kana yandi vandaka kusadisa bantu yina vandaka na mpasi,+ kana yandi vandaka kudipesa na konso kisalu ya mbote. 11  Kansi, kutula ve bazina ya mifwidi ya baleke na lisiti, sambu ntangu banzala na bo ya kuvukisa nitu ke kwisaka kutelama na kati na bo mpi Kristu, bo ke zolaka kukwela. 12  Bo ta baka ndola sambu bo me yambula lukwikilu yina bo monisaka ntete.* 13  Kaka na ntangu yina, bo ke longukaka na kukonda mambu ya kusala, bo ke kwendaka nzo na nzo; ee, bo ke kondaka kaka ve mambu ya kusala, kansi bo ke tongaka mpi bo ke kudikotisaka na mambu ya bantu ya nkaka+ mpi bo ke tubilaka mambu yina bo fwete tubila ve. 14  Yo yina, mono ke zola nde mifwidi ya baleke kukwela,+ kubuta bana,+ kutwadisa banzo na bo, mpi bo pesa ve mbeni dibaku ya kutuba mambu ya mbi. 15  Ya kieleka, bankaka me bikaka nzila ya mbote sambu na kulanda Satana. 16  Kana nkento mosi ya ke kwikilaka kele ti bantu ya dibuta na yandi yina kele mifwidi, mbote yandi sadisa bo, sambu dibundu kuvanda ve ti kizitu. Ebuna dibundu lenda sadisa mifwidi yina kele kibeni mifwidi.*+ 17  Bankuluntu yina ke twadisaka na mutindu ya mbote,+ bo me fwana na kubaka lukumu mingi kibeni,+ mingi-mingi bayina ke salaka ngolo na kutuba mpi na kulonga.+ 18  Sambu masonama ya santu ke tuba nde, “Nge fwete kanga ve munoko ya ngombe ntangu yo ke niata mbuma sambu na kukatula yo bampusu,”+ mpi nde, “Muntu ya kisalu me fwana na kubaka lufutu na yandi.”+ 19  Kundima ve kana bo me funda mbuta-muntu,* katula kaka na kimbangi ya bambangi zole to tatu.+ 20  Bantu yina kele ti kikalulu ya kusala masumu,+ nganina+ bo na meso ya bantu yonso, sambu yo vanda lukebisu sambu na bantu ya nkaka.* 21  Mono ke songa nge kibeni na ntwala ya Nzambi mpi ya Kristu Yezu mpi ya bawanzio yina bo me solaka na kuzitisa bansiku yai kukonda bangindu ya mbi to kupona-pona.+ 22  Kutula ve muntu maboko ntinu-ntinu;*+ kuvukana mpi ve na masumu ya bankaka; vanda kaka ti bikalulu ya bunkete. 23  Kunwa diaka ve masa,* kansi nwa ndambu ya vinu sambu na divumu na nge mpi sambu nge ke belaka mbala na mbala. 24  Masumu ya bantu ya nkaka ke zabanaka na bantu yonso, mpi yo ke nataka mbala mosi na lusambisu, kansi ya bankaka ke monikaka na nima.+ 25  Mutindu mosi mpi, bisalu ya mbote ke zabanaka na bantu yonso+ mpi bisalu ya mbote yina ke zabanaka ve na bantu yonso, bo lenda bumba yo ve.+

Banoti na nsi ya lutiti

Na kisina, “Kumisa.”
To “mifwidi ya bankento yina kele kibeni ti mfunu ya lusadisu”; disongidila, yina kele ve ti muntu ya kusadisa bo.
To “bansiku.”
To “lusilu na bo ya ntete.”
To “mifwidi ya bankento yina kele kibeni ti mfunu ya lusadisu”; Disongidila, yina kele ve ti muntu ya kusadisa bo.
To “nkuluntu.”
Na kisina, “sambu bantu ya nkaka kuwa boma.”
Disongidila, kupesa ve muntu mukumba ntinu-ntinu.
To “Bika kunwa kaka masa.”