Samuele ya Ntete 8:1-22
8 Ntangu Samuele kumaka mununu, yandi tulaka bana na yandi ya babakala bazuzi ya Izraele.
2 Zina ya mwana na yandi ya ntete Yoele, mpi zina ya mwana na yandi ya zole Abiya;+ bo vandaka bazuzi na Bere-sheba.
3 Kansi bana na yandi tambulaka ve na banzila na yandi; bangindu na bo vandaka kaka ya kubaka luta na banzila ya luvunu,+ bo vandaka kundima avoka,+ mpi bo vandaka kusambisa mambu na mutindu ya mbi.+
4 Na nima, bankuluntu yonso ya Izraele vukanaka mpi kwisaka na Samuele na Rama.
5 Bo tubilaka yandi nde: “Tala! Nge me nuna, kansi bana na nge ke tambula ve na banzila na nge. Ntangu yai, tudila beto ntotila sambu yandi sambisa beto bonso makanda yonso ya nkaka.”+
6 Kansi yo sepedisaka ve* Samuele ntangu bo tubaka nde: “Pesa beto ntotila sambu yandi sambisa beto.” Ebuna Samuele sambaka Yehowa,
7 mpi Yehowa tubilaka yandi nde: “Wa mambu yonso yina bantu ke tubila nge; sambu nge ve muntu bo me buya, kansi mono muntu bo me buya sambu mono vanda ve ntotila na bo.+
8 Bo ke sala kaka mambu yina bo me salaka katuka ntangu yina mono basisaka bo na Ezipte tii bubu yai; bo ke landa kuyambula mono+ mpi kusadila banzambi ya nkaka,+ mpi yai mambu ya bo ke sala nge.
9 Ntangu yai, wila bo. Kansi, nge fwete kebisa bo ngolo; songa bo mambu yina ntotila yina ta yala bo ta vanda ti nswa ya kulomba.”
10 Yo yina, Samuele songaka bantu yina vandaka kulomba yandi ntotila mambu yonso yina Yehowa tubaka.
11 Yandi tubaka nde: “Ntotila yina ta yala beno ta vanda ti nswa ya kulomba mambu yai:+ Yandi ta baka bana na beno ya babakala+ mpi yandi ta tula bo na bapusu-pusu na yandi+ mpi yandi ta kumisa bo bantu na yandi yina ke tambusaka bampunda,+ mpi bankaka ta bakaka ntinu na ntwala ya bapusu-pusu na yandi.
12 Yandi ta kuditudila bamfumu ya mafunda+ mpi bamfumu ya makumi tanu,+ mpi bankaka ta bundudilaka yandi ntoto,+ ta katulaka bambuma na yandi,+ mpi ta salaka binwaninu na yandi ya bitumba mpi bisadilu ya bapusu-pusu na yandi.+
13 Yandi ta baka bana na beno ya bankento sambu na kukumisa bo bantu ya ke vukisaka mafuta ya nsudi ya kitoko,* bantu ya ke lambaka, mpi bantu ya ke salaka mampa.+
14 Yandi ta baka bilanga na beno ya kuluta kitoko, bilanga na beno ya vinu, mpi bilanga na beno ya olive,+ mpi yandi ta pesa yo na bansadi na yandi.
15 Yandi ta baka ndambu mosi na kati ya bandambu kumi ya bambuma ya bilanga na beno mpi ya bima ya bilanga na beno ya vinu, mpi yandi ta pesa yo na bakapita ya nzo na yandi mpi na bansadi na yandi.
16 Yandi ta baka bansadi na beno ya babakala ti ya bankento, bimvuka na beno ya bambisi ya kuluta kitoko, mpi bampunda na beno, mpi yandi ta sadila yo sambu na kisalu na yandi.+
17 Yandi ta baka ndambu mosi na kati ya bandambu kumi ya bitwisi na beno,+ mpi beno ta kuma bansadi na yandi.
18 Kilumbu ta kwisa ntangu beno ta dila sambu na ntotila yina beno mosi me sola,+ kansi Yehowa ta pesa beno ve mvutu na kilumbu yina.”
19 Ata mpidina, bantu buyaka kuwa mambu yina Samuele songaka bo, mpi bo tubaka nde: “Ve, lukanu na beto kele kaka ya kuvanda ti ntotila yina ta yala beto.
20 Ebuna beto ta vanda bonso makanda yonso ya nkaka, mpi ntotila na beto ta sambisaka beto, ta twadisaka beto, mpi ta nwanaka bitumba na beto.”
21 Samuele waka mambu yonso yina bantu tubaka, mpi na nima yandi vutukilaka yo na makutu ya Yehowa.
22 Yehowa tubilaka Samuele nde: “Wila bo, mpi tudila bo ntotila yina ta yalaka bo.”+ Ebuna Samuele tubilaka bantu ya Izraele nde: “Konso muntu fwete vutuka na mbanza na yandi.”
Banoti na nsi ya lutiti
^ Na kisina, “yo vandaka mbi na meso ya.”
^ To “bantu ya ke salaka mananasi.”
