1 Bakorinto 12:1-31

  • Makabu ya mpeve (1-11)

  • Nitu mosi, bitini mingi (12-31)

12  Bampangi, sambu na makabu ya kimpeve,+ mono ke zola nde beno bakisa mambu yai mbote.  Beno me zaba nde ntangu beno vandaka bantu ya makanda,* bo vandaka kupusa beno mpi kukusa beno sambu beno sambila biteki yina ke tubaka ve,+ mpi beno vandaka kukwenda bisika yonso yina yo vandaka kunata beno.  Mono ke zola beno zaba nde muntu mosi ve yina ke tubaka na ngolo ya mpeve ya Nzambi, ke tubaka nde: “Bo me singaka Yezu!” mpi muntu mosi ve lenda tuba nde: “Yezu kele Mfumu!” katula kaka na nzila ya mpeve santu.+  Makabu kele ya mutindu na mutindu, kansi mpeve kele kaka mosi;+  bisalu ya kusadisa bankaka kele ya mutindu na mutindu,+ kansi Mfumu kele kaka mosi;  mpi bisalu kele ya mutindu na mutindu, kansi Nzambi mosi mpamba muntu ke salaka bisalu yina yonso na konso muntu.+  Kansi mpeve ke monanaka na konso muntu sambu na lukanu mosi ya mfunu.+  Muntu mosi lenda tuba ti mayele na nsadisa ya mpeve, muntu ya nkaka lenda tuba ti nzayilu na nsadisa ya mpeve yina mosi,  muntu ya nkaka lenda vanda ti lukwikilu+ na nsadisa ya mpeve yina mosi, muntu ya nkaka kele ti makabu ya kubelula bantu+ na nsadisa ya mpeve yina mosi, 10  muntu ya nkaka diaka lenda vanda ti ngolo ya kusala bidimbu ya nkumbwa,+ muntu ya nkaka kubikula, muntu ya nkaka mayele ya kuswasisa bangogo ya kupemama,+ muntu ya nkaka bandinga ya mutindu na mutindu,+ mpi muntu ya nkaka kutendula bandinga.+ 11  Kansi kaka mpeve yina mosi ke salaka bisalu yai yonso, mpi yo ke pesaka konso muntu mutindu yo me zola. 12  Mutindu nitu kele mosi kansi yo kele ti bitini mingi, mpi bitini yonso ya nitu yina, ata yo kele mingi, yo kele nitu mosi,+ Kristu mpi kele mutindu yina. 13  Sambu beto yonso bakaka mbotika na nitu mosi na nsadisa ya mpeve mosi, yo vanda Bayuda to Bagreki, bampika to bayina kele na kimpwanza, mpi beto yonso bakaka mpeve yina. 14  Sambu, ya kieleka, nitu kele ve ti kitini mosi mpamba, kansi yo kele ti bitini mingi.+ 15  Kana dikulu kutuba nde, “Sambu mono kele ve diboko, mono kele ve kitini ya nitu,” yo ke sala ve nde yo vanda ve kitini ya nitu. 16  Mpi kana dikutu kutuba nde, “Sambu mono kele ve disu, mono kele ve kitini ya nitu,” yo ke sala ve nde yo vanda ve kitini ya nitu. 17  Kana nitu ya mvimba vandaka disu, dikutu zolaka kuvanda na wapi? Kana nitu ya mvimba vandaka dikutu, mbombo zolaka kuvanda na wapi? 18  Kansi Nzambi me yidikaka konso kitini ya nitu mutindu yandi zolaka. 19  Kana bitini yonso vandaka kima mosi, nitu zolaka kuvanda na wapi? 20  Bitini kele mingi, kansi nitu mosi. 21  Disu lenda tubila ve diboko nde, “Mono kele na mfunu na nge ve,” mpi ntu lenda tubila ve makulu nde, “Mono kele na mfunu na beno ve.” 22  Kansi, bitini ya nitu yina ke monanaka bonso nde yo kele ngolo ve kele mfunu, 23  mpi bitini ya nitu yina beto ke yindulaka nde yo kele na lukumu mingi ve beto ke pesaka yo lukumu mingi kuluta,+ mpi bitini ya nitu na beto yina kele kitoko mingi ve, beto ke zitisaka yo mingi kuluta, 24  kansi bitini na beto ya kitoko ke vandaka na mfunu ya kima ve. Kansi Nzambi salaka nitu mutindu yina, mpi yandi me pesaka lukumu mingi kuluta na kitini yina me konda lukumu, 25  sambu kukabwana kuvanda ve na nitu, kansi bitini na yo fwete kudibanza sambu na bitini ya nkaka.+ 26  Kana kitini mosi ke wa mpasi, bitini yonso ya nkaka ke waka mpasi ti yo;+ to kana kitini mosi me baka nkembo, bitini yonso ya nkaka ke waka kiese ti yo.+ 27  Beno kele nitu ya Kristu,+ mpi konso muntu na kati na beno kele kitini ya nitu na yandi.+ 28  Mpi Nzambi me tulaka bantu ya mutindu na mutindu na dibundu: ya ntete, bantumwa;+ ya zole, bambikudi;+ ya tatu, balongi;+ na nima bidimbu ya nkumbwa;+ ebuna makabu ya kubelula;+ bisalu ya kusadisa bankaka; mayele ya kutwadisa;+ bandinga ya mutindu na mutindu.+ 29  Keti bo yonso kele bantumwa? Keti bo yonso kele bambikudi? Keti bo yonso kele balongi? Keti bo yonso ke salaka bidimbu ya nkumbwa? 30  Keti bo yonso kele ti makabu ya kubelula? Keti bo yonso ke tubaka na bandinga?+ Keti bo yonso kele bambaludi?+ 31  Beno landa kusosa ti kikesa* makabu ya kuluta nene.+ Kansi mono ke songa beno nzila yina me luta banzila yonso.+

Banoti na nsi ya lutiti

Disongidila, mimpani.
Na kisina, “landa kusala ngolo sambu na.”