Kwenda na mambu ke na kati

Kwenda na tansi ya malongi

 DISOLO YINA KELE NA LUTITI YA ZULU | NGE LENDA BAKISA BIBLIA

Sambu na Nki Yo Kele Mfunu na Kubakisa Biblia?

Sambu na Nki Yo Kele Mfunu na Kubakisa Biblia?

“Biblia kele mukanda mosi ya me zabanaka mingi yina mabundu ke sadilaka. Kansi, yo kele mukanda ya me katukaka na banzenza mpi yo kele ve mfunu sambu na Bashinwa.”—LIN, NA CHINE.

“Mono ke kukaka nkutu ve kubakisa mikanda ya santu ya dibundu na beto ya ba Hindu. Ebuna nki mutindu mono lenda bakisa Biblia ya Santu?”—AMIT, NA INDE.

“Mono ke zitisaka Biblia sambu yo kele mukanda mosi ya ntama mpi mono ke waka nde yo ke tekamaka mingi kuluta mikanda ya nkaka. Kansi, mono me monaka yo ntete ve.”—YUMIKO, NA JAPON.

Bantu mingi na ntoto ya mvimba ke bakaka Biblia na mbalu. Kansi, bo ke zabaka ve mambu mingi ya kele na kati to nkutu bo ke zabaka ve ata kima. Mambu yai ke monanaka mingi na bamilio ya bantu yina ke zingaka na Asie. Yo ke monanaka mpi na bantu mingi ya ke zingaka na bansi yina Biblia ke vandaka mingi.

Kansi, nge lenda kudiyula nde: ‘Sambu na nki mono fwete sosa kubakisa Biblia?’ Kana nge bakisa mambu yina mukanda yai ya santu ke tubaka, yo lenda sadisa nge na:

  • Kuvanda na kiese

  • Kunwana ti bampasi ya dibuta

  • Kunwana ti basusi ya luzingu

  • Kuvanda ti bangwisana ya mbote ti bantu ya nkaka

  • Kusadila mbongo na mayele

Beto baka mbandu ya Yoshiko, na Japon. Yandi vandaka kudiyula nki mambu Biblia ke tubilaka, yo yina yandi bakaka lukanu ya kutanga yo. Inki mambote yandi bakaka? Yandi ke tuba nde: “Biblia me sadisaka mono na kuzaba lukanu ya luzingu mpi na kuvanda ti kivuvu sambu na bilumbu ke kwisa.” Yandi ke tuba diaka nde: “Mono ke kudimonaka diaka ve mpamba.” Amit, muntu ya beto me tubila na luyantiku ya disolo yai, bakaka lukanu ya kutanga Biblia yandi mosi. Yandi ke tuba nde: “Mono yitukaka na kumona nde Biblia kele ti bandongisila ya mfunu sambu na bantu yonso.”

Biblia me sobaka mpenza luzingu ya bantu mingi. Nge lenda tanga yo nge mosi sambu na kumona mutindu yo lenda natila nge mambote.