Kwenda na mambu ke na kati

Kwenda na tansi ya malongi

 BIBLIA KE SOBAKA LUZINGU YA BANTU

Mono Vandaka Kuyindula nde Luzingu na Mono Vandaka ya Mbote

Mono Vandaka Kuyindula nde Luzingu na Mono Vandaka ya Mbote
  • MVULA YINA YANDI BUTUKAKA: 1982

  • INSI: POLOGNE

  • LUZINGU NA YANDI YA NTAMA: VANDAKA KUSALA MUBULU, KUNWA BIMA YA KE LAWUSAKA, MPI KUSOSA KISALU YA KULUTA MBOTE

MUTINDU MONO VANDAKA:

Mono butukaka na mbanza mosi ya fioti na Pologne mpi mbanza yango vandaka ntama ve ti ndilu ya Allemagne. Mono vandaka ti luzingu mosi ya ngemba sambu mono vandaka kuzinga na lweka ya baferme mpi ya bamfinda. Bibuti na mono vandaka kusiamisa mono na kuvanda ti bikalulu ya mbote, na kusala ngolo na nzo-nkanda mpi na kuvanda ti lukanu ya kupona kisalu mosi ya kuluta mbote.

Mono yantikaka mubulu ntangu mono kwendaka kulonguka na iniversite na mbanza Wrocław sambu na kukuma avoka. Sambu mono vandaka kuzinga ntama ti bibuti na mono, mono kumaka ti banduku ya mbi. Banda ntama, mono vandaka kuzola nsaka ya nkweso, kansi banduku na mono ya mpa pusaka mono na kuzola yo diaka mingi. Mono vandaka kuzola ekipi ya Varsovie mingi, yo yina na bawikendi mono vandaka kulanda bo konso kisika yina bo vandaka kukwenda kubula nkweso. Na banzietelo yai, beto vandaka kulawuka malafu mpi kunwa bima ya nkaka ya ke lawusaka. Na bantangu ya nkaka, beto vandaka kunwana ti bantu ya ekipi ya nkaka. Sambu na mono, mambu yai vandaka kukatula mono basusi ya luzingu, ata mono zabaka nde kana bapolisi kukanga mono, nzo-nkanda na mono ta beba.

Beto vandaka kuzola kukwenda na banzo ya biese ya bo ke kangulaka na mpimpa. Mbala mingi ya beto vandaka kukwenda kuna, beto vandaka kunwana. Bapolisi vandaka kukanga mono mbala na mbala, kansi mono vandaka kupesa bo mbongo bantangu ya nkaka sambu nsiku kukanga mono ve. Mono vandaka kuyindula kibeni nde luzingu na mono vandaka ya mbote. Kansi bantangu ya nkaka, mono vandaka kuzaba na nsi ya ntima nde mambu ya mono vandaka kusala vandaka mbi. Mono vandaka kukwenda na nzo-nzambi konso Lumingu sambu kansansa na mono kuvanda mbote.

MUTINDU BIBLIA SOBAKA LUZINGU NA MONO: Na 2004, Bambangi ya Yehowa zole kokulaka na porte na mono, mpi mono ndimaka kusolula ti bo mambu ya Biblia.

Ntangu mono zabaka mambu mingi yina Mukristu ya kieleka fwete sala, kansansa na mono kumaka kuyangisa mono kibeni. Mono zabaka nde mono fwete yambula kulawuka malafu, kunwa bima ya ke lawusaka, mpi kuzenga kinduku ti bantu yina ke zitisaka ve minsiku ya Biblia. Mono bakisaka mpi nde mono fwete soba kikalulu na mono ya mubulu ti ya nku. Kansi mono sobaka ve.

Mono kwisaka kusoba mabanza na mono kilumbu mosi na mpimpa ntangu mono nwanaka ti bantu nana. Mono ke yibuka mutindu mono vandaka ya kulala na bala-bala, mpi bantu yango ke bula mono makofi ti makulu na ntu. Mono monaka bonso nde mono ke zola kufwa, yo yina mono sambaka nde: “Yehowa, lolula mono sambu mono tulaka  ve dikebi na Ndinga na nge. Kana mono guluka, mono ta landa na kulonguka Biblia ti Bambangi mpi mono ta soba luzingu na mono.” Mono yitukaka mutindu mono gulukaka. Yo yina, mono landaka na kulonguka Biblia.

Na 2006, mono kwendaka na Angleterre. Lukanu na mono vandaka ya kuzwa mbongo mingi mpi kuvutuka na Pologne sambu na kumanisa nzo-nkanda na mono ya ki-avoka. Ntangu mono landaka kulonguka Biblia, verse mosi bendaka dikebi na mono. Ntumwa Polo sonikaka nde: “Mono ke tadilaka mpi bima yonso bonso nde yo kele bima ya me vilaka, sambu na mfunu mingi kibeni ya nzayilu ya Mfumu na mono Kristu Yezu. Sambu na yandi, mono me ndimaka kuvidisa bima yonso mpi mono ke tadilaka yo bonso kita ya mvindu, sambu mono zwa Kristu.” (Bafilipi 3:8) Bonso mono, ntumwa Polo longukaka mambu ya me tala nsiku mpi yandi vandaka muntu ya nku kibeni. (Bisalu 8:3) Kansi, yandi bakisaka nde kusadila Nzambi mpi kusala ngolo sambu na kulanda mbandu ya Yezu kele mutindu ya kuluta mbote ya kuzinga. Ntangu mono yindulaka mbandu ya Polo, mono bakisaka nde kisalu ya ke pesaka mbongo mingi mpi kikalulu ya nku ke pesaka ve kiese. Mono bakisaka nde kana Polo sobaka, mono mpi mono lenda soba. Yo yina, mono bakaka lukanu ya kuvanda na Angleterre mpi bikaka ngindu ya kumanisa nzo-nkanda na mono.

Ntangu mono longukaka mambu mingi ya me tala Yehowa, mono kumaka kudiwa pene-pene na Nzambi. Ntangu mono zabaka nde Nzambi ke lolulaka bantu yina ke sobaka luzingu na bo na masonga yonso, yo simbaka ntima na mono. (Bisalu 2:38) Mpi ntangu mono yindululaka verse ya 1 Yoane 4:16 ya ke tuba nde “Nzambi kele zola,” mono yantikaka kubakisa sambu na nki Nzambi ke mengaka mambu ya nku.

Mono vandaka ti nzala ya kukota na kimvuka yai ya kiese ya bampangi

Diaka, bikalulu ya Bambangi yitukisaka mono. Mono monaka nde bo ke zitisaka minsiku ya kuzanguka ya Biblia ya bikalulu ya mbote. Yo yina, mono vandaka ti nzala ya kukota na kimvuka yai ya kiese ya bampangi. Na nima ya kusala ngolo mpi ya kusoba luzingu na mono, mono bakaka mbotika na 2008 mpi mono kumaka Mbangi ya Yehowa.

Mono ti Esther ke sepelaka kulonga Biblia na bantu yina ke tubaka ndinga ya bantu ya Pologne

MAMBOTE YA MONO ME BAKAKA: Biblia me sobaka luzingu na mono.

Mono ke sosaka diaka ve mambu ya nene mpi mono ke vandaka diaka ve muntu ya nku. Mono ke lawukaka diaka ve malafu mpi bima ya nkaka ya ke lawusaka. Mono ke zolaka diaka ve nsaka ya nkweso kuluta ndilu. Mono me kumaka nsadi ya Nzambi yina ke sepelaka na kulonga bantu ya nkaka Biblia. Mono ke landaka kutala nsaka ya nkweso, kansi mono me kumaka kutula bansaka ya mutindu yai na kisika na yo.

Bubu yai, mono me kwelaka Esther, nkento mosi ya kitoko ya ke sambilaka Yehowa, mpi mono kele na makwela ya kiese. Beto ke sepelaka kulonga Biblia na bantu yina ke tubaka ndinga ya bantu ya Pologne awa na nordi-westi ya Angleterre. Yai kele mbala na mono ya ntete ya kuvanda ti luzingu ya kiese. Mono kele ti kansansa mpi luzingu ya mbote