Kwenda na mambu ke na kati

Kwenda na tansi ya malongi

 DISOLO YINA KELE NA LUTITI YA ZULU

Inki Mutindu Nzambi Ke Tadilaka Bitumba?

Inki Mutindu Nzambi Ke Tadilaka Bitumba?

Inki mvutu nge ta pesa na ngiufula yai? Bantu mingi ke yindulaka nde Nzambi ke zolaka bitumba. Bo ke tubaka nde na ntangu ya ntama, Nzambi vandaka kutinda bansadi na yandi ya nkaka na kunwana bitumba. Biblia ke monisaka mpi nde Nzambi vandaka kutinda bansadi na yandi na kunwana bitumba. Kansi, bantu ya nkaka ke tubaka nde Yezu, Mwana ya Nzambi, longaka balongoki na yandi na kuzola bambeni na bo. (Matayo 5:43, 44) Bantu yango ke monaka nde na ntangu mosi buna Nzambi sobaka mutindu na yandi ya kutadila bitumba mpi nde yandi ke zolaka diaka ve bitumba bubu yai.

Nge ke yindula nki? Keti Nzambi ke zolaka bitumba? Kana ee, yandi ke vandaka na lweka ya banani ntangu bantu ke nwanaka bitumba bubu yai? Kana nge zwa bamvutu na bangiufula yai, yo lenda soba mutindu nge ke tadilaka bitumba. Mu mbandu, kana nge ke zaba nde Nzambi ke zolaka bitumba mpi nde yandi ke kotila bantu yina nge ke zola nde bo nunga na bitumba mosi buna, ziku nge ta kudiwa mbote mpi nge ta vanda ti kivuvu nde bantu ya nge ke kotila ta nunga. Kansi, nge ta kudiwa nki mutindu kana nge zaba nde Nzambi ke kotila bantu yina nge ke zola ve nde bo nunga? Ziku, nge ta tadila diaka lweka ya nge kele.

Kele ti diambu mosi ya mfunu mingi ya beto fwete tadila. Kana nge zaba mutindu Nzambi ke tadilaka bitumba, yo lenda vanda ti bupusi na mutindu nge ke tadilaka Nzambi. Kana nge me kutanaka ti bampasi ya bitumba, ntembe kele ve nde nge kele ti mfunu ya kubaka mvutu na ngiufula yai: Keti Nzambi ke pesaka nzila nde bantu kumona mpasi na bitumba to nkutu yandi ke zolaka bampasi yango, bonso bantu ya nkaka ke yindulaka, to keti yo lenda vanda nde yandi ke tulaka ve dikebi na bitumba mpi ke kudibanzaka ve sambu na bantu yina bo ke niokula?

Nge lenda yituka kana nge zaba nde mvutu ya Biblia me swaswana kibeni na bangindu yai. Diaka, banda ntama tii bubu yai, Nzambi me sobaka ve mutindu yandi ke tadilaka bitumba. Beto tadila mambu yina Biblia ke tuba sambu na kuzaba mutindu Nzambi vandaka kutadila bitumba na ntangu ya ntama mpi na mvu-nkama ya ntete, ntangu Yezu vandaka na ntoto. Yo ta sadisa beto na kuzaba mutindu Nzambi ke tadilaka bitumba bubu yai mpi kana bitumba ta vandaka na bilumbu yina ke kwisa.