Kwenda na mambu ke na kati

Kwenda na tansi ya malongi

 BIBLIA KE SOBAKA LUZINGU YA BANTU

Mono Zabaka nde Yehowa Kele Nzambi ya Mawa mpi ya Ke Lolulaka

Mono Zabaka nde Yehowa Kele Nzambi ya Mawa mpi ya Ke Lolulaka
  • MVULA YINA YANDI BUTUKAKA: 1954

  • INSI: CANADA

  • LUZINGU NA YANDI YA NTAMA: MUYIBI MPI MUNTU YA VANDAKA KUBULA BANSAKA YA MBONGO

MUTINDU MONO VANDAKA:

Mono yelaka na mbanza Montréal na kisika yina luzingu vandaka mpasi. Ntangu papa fwaka, mono vandaka ti bangonda sambanu, mpi mama bikalaka ti mukumba ya nene. Beto butukaka bana nana mpi mono vandaka mwana ya nsuka.

Ntangu mono vandaka kuyela, luzingu na mono vandaka kaka kunwa bima ya ke lausaka, kubula bansaka ya mbongo, kusala mubulu mpi kuvukana ti babandi. Ntangu mono lungisaka bamvula kumi, mono kumaka kusadila bandumba kisalu mpi bantu yina ke defisaka bantu ya nkaka mbongo. Mbala mingi, mono vandaka kuta luvunu mpi kusadila mayele ya mbi sambu na kukusa bantu. Mono kumaka muntu ya luvunu ya ngolo.

Ntangu mono lungisaka bamvula 14, mono kumaka ti mitindu mingi ya kukusa bantu sambu na kuzwa mbongo. Mu mbandu, mono vandaka kusumba ba montre, mitaku, balupetu mpi kusala yo bonso wolo ya ba carat 14 ti kashe ya kitoko mpi na nima, mono vandaka kuteka yo na babala-bala mpi na baparkingi ya bisika yina bamagazini vandaka mingi. Mono vandaka kuzwa mbongo kukonda mpasi. Kilumbu mosi, mono zwaka badolare 10 000!

Ntangu mono vandaka ti bamvula 15, bo kulaka mono na Nzo-nkanda yina bo vandaka kulonga bana mutindu ya kusoba bikalulu na bo. Mono vandaka ve ti kisika ya kuvanda. Mono vandaka kulala na babala-bala, na baparke to na banzo ya banduku.

Mbala mingi, bapolisi vandaka kukanga mono sambu na kisalu na mono ya kukusa bantu. Bo vandaka kutula mono ve na boloko sambu mono vandaka ve kuteka bima ya muyibi. Kansi, mono vandaka kufuta amande sambu mono vandaka kukusa bantu, kutekila bo bima ya luvunu mpi kuteka yo kukonda nswa. Sambu mono vandaka ve kuwa bantu boma, mono kumaka nkutu kudefa mbongo na bantu ya ke defisaka mbongo. Luzingu na mono kumaka na kigonsa mpi mono vandaka kutambula bantangu ya nkaka ti munduki ya fioti. Na bantangu ya nkaka, mono vandaka kuvukana ti babandi.

MUTINDU BIBLIA SOBAKA LUZINGU NA MONO:

Mono waka nsangu ya Biblia na mbala ya ntete ntangu mono vandaka ti bamvula 17. Mono vandaka ti makangu mpi makangu yango yantikaka kulonguka Biblia ti Bambangi ya Yehowa. Sambu  mono vandaka kuzola ve bansiku ya Biblia, mono bikaka yandi mpi bakaka makangu ya nkaka.

Mambu sobaka ntangu makangu na mono ya zole yantikaka mpi kulonguka Biblia ti Bambangi! Mono yitukaka mutindu yandi sobaka. Yandi kumaka mawete mpi ntima-nda. Ntangu bo bingisaka mono na lukutakanu na Nzo ya Kimfumu ya Bambangi ya Yehowa, mono ndimaka. Bambangi ya Yehowa yambaka mono mbote mpi na mawete. Mutindu na bo ya kuyamba mono swaswanaka ngolo kibeni ti ya bantu ya nkaka! Dibuta na mono vandaka ve kutudila mono ntima; ntangu mono vandaka mwana, mono vandaka ve ti muntu ya kumonisila mono zola mpi mawete. Zola ya mono monaka na Bambangi ya Yehowa vandaka kibeni kikalulu yina mono vandaka na yo mfunu. Ntangu Bambangi lombaka mono na kulonguka Biblia, mono ndimaka na kiese yonso.

Mambu ya mono longukaka na Biblia me gulusaka luzingu na mono. Sambu mono vandaka ti mfuka ya bansaka ya mbongo badolare kuluta 50 000, mono wakanaka ti banduku na mono zole na kukwenda kuyiba sambu mono futa mfuka yango. Kansi, mono ke sepelaka mingi sambu mono kwendaka diaka ve kuyiba! Banduku na mono landaka kuyiba; bo tulaka mosi na boloko mpi yina ya nkaka bo fwaka yandi.

Sambu mono landaka kulonguka Biblia, mono monaka nde mono fwete sala bansoba mingi. Mu mbandu, mono bakisaka mambu yai ya kele na mukanda ya 1 Bakorinto 6:10. Verse yango ke tuba nde: “Miyibi, bantu ya lukasi, bantu ya ke laukaka malafu, bantu ya ke fingaka, to bantu ya ke botulaka bima ya bantu ya nkaka ta baka ve kimfumu ya Nzambi.” Ntangu mono tangaka verse yai, mono dilaka. Mono bakisaka nde mono fwete soba luzingu na mono ya mvimba. (Baroma 12:2) Mono vandaka muntu ya nku, ya makasi mpi ya luvunu.

Mono longukaka mpi na Biblia nde Yehowa kele Nzambi ya mawa mpi ya ke lolulaka. (Yezaya 1:18) Mono sambaka Yehowa mingi sambu yandi sadisa mono na kuyambula luzingu na mono ya ntama. Sambu Yehowa sadisaka mono, mono sobaka malembe-malembe kimuntu na mono. Mono salaka nsoba ya nene ntangu mono kwelaka nkento yina vandaka makangu na mono.

Bubu yai, mono kele na luzingu sambu mono ke zitisaka minsiku ya Biblia

Ntangu mono kumaka ti bamvula 24, mono vandaka ti bana tatu. Yo yina, yo lombaka nde mono sosa kisalu ya mbote. Kansi, mono longukaka mingi ve; mono vandaka ve ti diplome mpi bantu ya kutubila mono. Yo yina, mono sambaka Yehowa mpi na nima mono kwendaka kusosa kisalu. Mono vandaka kusonga bamfumu ya kisalu nde mono me soba luzingu na mono mpi ke zola kusala kisalu na masonga yonso. Mbala mingi, mono vandaka kutendudila bo nde mono ke longukaka Biblia mpi mono ke zola kukuma ti bikalulu ya mbote. Ata mpidina, bamfumu mingi ya kisalu buyaka na kubaka mono na kisalu. Nsuka-nsuka, mono kutanaka ti mfumu ya nkaka ya kisalu mpi yandi yulaka mono bangiufula. Mono zabisaka yandi mutindu luzingu na mono vandaka ntete, ebuna yandi zabisaka mono nde: “Mono ke zaba kibeni ve kikuma yina mono fwete baka nge na kisalu, kansi kima mosi ke songa mono nde mono fwete baka nge na kisalu.” Mono bakisaka nde Yehowa me pesa mvutu na bisambu na mono. Na ntangu yina, mono ti nkento na mono vandaka me baka mbotika mpi me kuma Bambangi ya Yehowa.

MAMBOTE YA MONO ME BAKAKA:

Bubu yai, mono kele na luzingu sambu mono me kumaka Mukristu mpi ke zitisaka minsiku ya Biblia. Mono kele ti dibuta mosi ya mbote. Mono ke ndimaka nde Yehowa me lolulaka mono mpi mono ke sepelaka sambu kansansa na mono me kumaka bunkete.

Bamvula 14 me luta, mono ke salaka bangunga kiteso ya 70 na kisalu ya kusamuna mpi ke sadisaka bantu ya nkaka na kuzaba mambu yina Biblia ke longaka. Nkento na mono yantikaka mpi kisalu yango ntama mingi ve. Bamvula 30 me luta, mono ke vandaka na kiese sambu mono me sadisaka banduku na mono ya kisalu 22 na kukuma bansadi ya Yehowa. Bubu yai, mono ke kwendaka na bamagazini kansi mono ke kwenda diaka ve sambu na kuyiba bantu. Ntangu yai, mono ke kwendaka mbala mingi sambu na kuzabisa bo nsangu ya mbote: kivuvu ya kuzinga na nsi-ntoto ya mpa, kisika yina miyibi ta vanda diaka ve.—Nkunga 37:10, 11.