Kwenda na mambu ke na kati

Kwenda na tansi ya malongi

 DISOLO YINA KELE NA LUTITI YA ZULU | YEZU TA GULUSA BANTU NA NKI MAMBU?

Sambu na Nki Yo Ke Lomba nde Bo Gulusa Beto?

Sambu na Nki Yo Ke Lomba nde Bo Gulusa Beto?

“Muntu yonso me butuka na ntoto yai ke na luzingu mosi ya nkufi ti ya mpasi. Yandi ke yelaka ti kununa nswalu bonso kintuntu; yandi ke vilaka bonso madidi ya nti ke vilaka.”Yobi 14:1, 2.

Tuka ntama, bantu ke sosaka kuzinga kimakulu bonso batoko mpi na mavimpi ya mbote. Kansi, diambu ya mawa kele nde beto yonso ke fwaka. Bangogo yina Yobi tubaka bamvula mafunda tatu me luta kele mpenza ya kieleka tii bubu yai.

Bantu yonso ke vandaka ti mpusa ya ngolo ya kuzinga kimakulu. Biblia ke zabisa beto nde Nzambi me tulaka mpusa ya ngolo ya kuzinga kimakulu na bantima na beto mpi yandi me pesaka beto makuki ya kubakisa mfunu ya luzingu yango. (Longi 3:11) Kana yo kele mutindu yai, keti nge ke yindula nde Nzambi ya zola lenda tula mpusa mosi na kati na beto kansi yo lungana ve? Kana nge pesa mvutu nde ve, nge me tuba mbote. Ndinga ya Nzambi ke bingaka lufwa mbeni mpi yo ke tubaka nde Nzambi “ta katula lufwa.”1 Bakorinto 15:26.

Ntembe kele ve nde lufwa kele mbeni mpi ata muntu mosi ve ke zolaka yo. Kana beto me kutana ti kigonsa, beto ke bumbanaka to ke tinaka. Kana beto ke bela, beto ke sansaka maladi sambu na kubeluka. Beto ke salaka ngolo sambu na kutina bigonsa ya lenda natila beto lufwa.

Keti beto kele ti bikuma ya kukwikila nde Nzambi ta katula mbeni yai ya ntama? Ee. Yehowa Nzambi gangaka ve bantu sambu na kuzinga bamvula fioti mpi kufwa. Lukanu ya Nzambi ya kisina vandaka ve nde bantu kufwa kansi yo vandaka nde bantu kuzinga kimakulu na ntoto. Mambu yina Nzambi ke silaka, yandi ke lungisaka yo.Yezaya 55:10, 11.

Inki mutindu Nzambi ta katula lufwa? Banda ntama, bantu me salaka ngolo sambu na kukatula lufwa kansi bo me kukaka ve. Tii bubu yai, bo ke landa kaka na kusala bansosa. Bantu ya siansi me salaka bankisi ya ke belulaka bamaladi ya nkaka. Bo me longukaka mbote-mbote ba gène ya bigangwa ya ke zingaka. Na bisika mingi, bantu me kumaka kuzinga bamvula mingi bubu yai kuluta mvu-nkama ya me luta. Kansi, bo me kukaka ve kukatula lufwa. Mutindu Biblia ke tubaka, ‘bo yonso ke vutukaka na ntoto.’Longi 3:20.

Diambu ya mfunu kele nde beto lenda tula ve ntima na mayele ya bantu sambu na kumanisa lufwa. Yehowa Nzambi me bakaka dezia bangidika sambu na kugulusa beto na lufwa mpi muntu yina yandi ta sadila sambu na kukatula yo kele Yezu Kristu.