Kwenda na mambu ke na kati

Kwenda na tansi ya malongi

 BATANGI NA BETO KE YULA . . .

Inki Mambu Beto Fwete Zaba Sambu na Nkinsi ya Lubutuku?

Inki Mambu Beto Fwete Zaba Sambu na Nkinsi ya Lubutuku?

Bikuma mingi ke pusaka bamilio ya bantu na ntoto ya mvimba na kuta Nkinsi ya Lubutuku. Bantu ya nkaka ke lutisaka ntangu ti banduku mpi ti bantu ya dibuta na bo. Bantu ya nkaka diaka ke yindulaka Nzambi mpi ke bakaka ntangu ya kusadisa bansukami. Ya kieleka, mambu yai kele mbi ve. Kansi, yo ke wakana ti bisalu ya nkaka ya mbi ya nkinsi yai.

Ntete, bantu mingi ya ke taka Nkinsi yai ke yindulaka nde yo kele kilumbu yina Yezu butukaka. Kansi, bantu ya istware ke ndimaka nde kilumbu yina Yezu butukaka ke zabanaka ve. Mukanda mosi (Christian Book of Why) ke tuba nde: “Bakristu ya ntete tulaka ve dati mosi ya kuta Nkinsi ya Lubutuku ya Yezu” sambu bo “kota ve na mambu yonso ya mimpani.” Diambu ya ke benda dikebi kele nde ata kisika mosi ve na Biblia ke monisa nde Yezu taka nkinsi ya lubutuku na yandi to ya muntu ya nkaka. Kansi, yandi pesaka balongoki na yandi ntuma ya kusungimina lufwa na yandi.Luka 22:19.

Ya zole, bantu mingi ya mayele ke ndimaka nde mambu mingi ya ke salamaka na Nkinsi ya Lubutuku me katukaka na binkulu ya mimpani. Binkulu yango kele Père Noël, kusadila nti ya gui, bintuntu ya lubutuku, kupesana bakado, kupedisa babuzi, nkuni ya lubutuku, kutula bintuntu na bisika mingi mpi kuyimba bankunga ya lubutuku. Mukanda mosi (The Externals of the Catholic Church) ke tuba sambu na binkulu yai nde: “Keti beto ke zabaka nde beto ke sadilaka binkulu ya mimpani ntangu beto ke pesaka to ke bakaka bakado na Nkinsi ya Lubutuku mpi ke tulaka bintuntu na banzo na beto mpi na banzo-nzambi?”

“Keti beto ke zabaka nde beto ke sadilaka binkulu ya mimpani ntangu beto ke pesaka to ke bakaka bakado na Nkinsi ya Lubutuku mpi ke tulaka bintuntu na banzo na beto mpi na banzo-nzambi?”—Mukanda The Externals of the Catholic Church

Ziku, nge lenda yindula nde yo kele mbi ve na kusadila binkulu yai ya ke monanaka bonso nde yo kele mbote. Beto tadila kitini yai ya tatu sambu na kubaka mvutu. Nzambi ke zolaka ve nde bantu kuvukisa binkulu ya mimpani ti lusambu ya bunkete. Na nsadisa ya profete na yandi Amosi, Yehowa Nzambi zabisaka bansadi na yandi ya ntu-ngolo ya Izraele nde: “Mono ke zola ve bankisi na beno . . . Beno katula makelele ya bankunga na beno awa na mono.”Amosi 5:21, 23.

Sambu na nki Nzambi kebisaka bo mutindu yai? Beto tadila mambu yina bantu ya kimfumu ya nordi ya Izraele ya ntama vandaka kusala. Yeroboami, ntotila ya ntete, tulaka bana bangombe ya wolo na mbanza ya Dani mpi ya Betele. Yandi pusaka bantu na kusambila bana ya bangombe na kisika ya kusambila Yehowa Nzambi na bunkete yonso na tempelo na yandi na Yeruzalemi. Ntotila yantikaka kusala nkinsi yai mpi ponaka banganga-nzambi sambu bo sadisa bantu na kusala yo.1 Bantotila 12:26-33.

Ziku, bantu ya Izraele monaka nde yo vandaka mbote na kuta nkinsi yai. Keti bo salaka ve mambu yai yonso sambu na kumonisa nde bo ke sambila Nzambi mpi ke sepedisa yandi? Mambu yina Nzambi zabisaka Amosi mpi baprofete ya nkaka ke monisa pwelele mutindu Nzambi ke tadilaka bankinsi ya mutindu yai. Na nzila ya profete Malashi, Nzambi tubaka nde: “Mono kele Mfumu Nzambi, mono ke bikalaka kaka Mfumu Nzambi.” (Malashi 3:6) Keti mambu yai ke monisa ve mutindu Nzambi ke tadilaka Nkinsi ya Lubutuku bubu yai?

Na nima ya kuzaba mambu yai, bantu mingi me yambulaka kuta Nkinsi ya Lubutuku. Bo ke monaka kiese na kulutisa ntangu ti banduku, bantu ya mabuta na bo mpi na kusadisa bansukami na konso ntangu ya bo me zola.