Kwenda na mambu ke na kati

Kwenda na tansi ya malongi

 DISOLO YINA KELE NA LUTITI YA ZULU | KETI SATANA KELE MPENZA?

Keti Beto Fwete Wa Satana Boma?

Keti Beto Fwete Wa Satana Boma?

Monoxyde de carbone ke monanaka ve mpi yo kele kigonsa bonso Satana

Monoxyde de carbone kele ndikila mosi ya ke vandaka mpasi na kubakisa. Sambu yo kele ve na mukubu mpi nsudi, yo lenda fwa bantu nkatu bantu yango kubakisa. Ziku, bantu kuluta makumi tanu na kati ya nkama na ntoto ya mvimba ke fwaka sambu na ndikila yai. Beto fwete wa yo ve boma sambu mitindu kele mingi ya kuzaba ndikila yai mpi ya kuditanina. Na mayele yonso, bantu mingi me tulaka ba apareyi ya ke kengilaka ndikila yango mpi bo ke tudilaka yo dikebi ntangu yo ke kebisa bo.

Bonso monoxyde de carbone, Satana ke monanaka ve, yandi kele kigonsa mpi yo kele mpasi sambu bantu kubakisa yandi. Kansi, Nzambi me bikaka beto ve kukonda lusadisu. Nge ta wa ve Satana boma kana nge sadila bandongisila yai ya ke landa ya Nzambi ke pesa:

Kimpwanza ya kupona. Yakobo 4:7 ke zabisa beto nde: “Beno telamina Diabulu, ebuna yandi ta tina ntama ti beno.” Ata Satana kele ngolo, yandi lenda pusa nge ve na kingolo-ngolo na kusala mambu yina ya nge ke zola ve. Nge kele ti nswa ya kupona. Na 1 Piere 5:9, Biblia ke tuba nde: “Beno vanda bambeni na yandi [Diabulu], beno vanda ngolo na lukwikilu.” Kuvila ve nde Satana bikisaka Yezu ntangu Yezu buyaka kibeni bampukumuna na yandi tatu. (Matayo 4:11) Mutindu mosi, nge lenda telamina mpukumuna ya Satana.

Sala kinduku ti Nzambi. Yakobo 4:8 ke siamisa beto na ‘kukwenda pene-pene na Nzambi.’ Yehowa ke lomba nge na kusala kinduku ya ngolo ti yandi. Inki mutindu nge lenda sala yo? Mutindu ya mbote ya kuyantika kele ya kulonguka mambu mingi ya me tala yandi na Biblia. (Yoane 17:3) Mambu ya Yehowa ya nge ke longuka ta pusa nge na kuzola yandi, mpi zola yango ta sadisa nge na kusala luzolo na yandi. (1 Yoane 5:3) Kana nge kwenda pene-pene ya Tata na nge ya zulu, yandi ta sala nki? Yakobo ke tuba diaka nde Nzambi “ta kwisa pene-pene na nge.”

Yehowa ke bakaka bangidika ya kimpeve sambu na kutanina nge

Yandi ke sila na kutanina beto. Bingana 18:10 ke tuba nde: “Zina ya Mfumu Nzambi kele bonso nzo ya ngolo, kisika ya bantu ya mbote lenda kwenda kubumbana.” Yo ke tendula ve nde zina ya Nzambi kele bonso mazi mosi buna. Kansi, yo ke tendula nde bantu yonso ya ke waka zina ya Nzambi boma lenda lomba yandi lusadisu na konso ntangu.

Mbandu ya mbote. Mukanda ya Bisalu 19:19 ke zabisa beto diambu mosi ya mbote sambu na bantu yina kumaka Bakristu na Efezo. Biblia ke tuba nde: “Bantu mingi yina vandaka kusala bisalu ya mazi vukisaka mikanda na bo mpi yokaka yo na meso ya  bantu yonso. Ntangu bo tangaka ntalu na yo, bo monaka nde yo vandaka na mbalu ya mbongo ya bibende 50000.” * Bakristu yai yokaka bima yonso ya vandaka kuwakana ti bisalu ya bampeve ya mbi, ata yo vandaka ntalu mingi. Mbandu na bo lenda sadisa beto mingi bubu yai. Nsi-ntoto me fuluka ti lusambu ya biteki mpi ya bisalu ya bampeve ya mbi. Ata bima mpi bisalu ya bampeve ya mbi yina ke monanaka kukonda kigonsa lenda benda bademo. Yo yina, yo ke mfunu mpenza na kulosa bima ya mutindu yai na luzingu na nge, ata yo ke lomba kusala bibansa.—Kulonga 18:10-12.

Rogelio, yina ya beto me tubila na disolo ya ntete na masolo yai ya ke landana, vandaka kukwikila ve na Diabulu tii kuna yandi lungisaka bamvula 50. Kansi, yandi tadilaka diaka dibanza na yandi. Sambu na nki? Yandi ke tuba nde: “Yai vandaka mbala ya ntete ya mono bakaka Biblia. Nzayilu ya Masonuku ndimisaka mono nde Diabulu kele. Nzayilu yango ke taninaka mono na kubwa ve na mpukumuna ya Diabulu.”

““Nzayilu ya Masonuku ndimisaka mono nde Diabulu kele. Nzayilu yango ke taninaka mono na kubwa ve na mpukumuna ya Diabulu”

Keti nge ke zolaka kuzinga na ntangu yina Satana ta vanda diaka ve? Ee. Masonuku ke tubila ntangu yina ‘bo ta losa Diabulu na dizanga ya tiya mpi ya sufre,’ muntu yina ke kusaka bantu mingi. (Kusonga 20:10) Tiya to sufre lenda sala ve kigangwa ya kimpeve mbi. Yo yina, dizanga ya tiya fwete vanda lufwa ya kimakulu. Bo ta fwa Satana kimakulu. Yo ta vanda ntangu mosi ya kiese kibeni sambu na bantu ya ke zolaka Nzambi!

Ntangu yai, landa na kulonguka mambu ya me tala Yehowa mpi banzila na yandi. * Kudimona na mabanza bonso nde nge ke zinga na ntangu yina “Satana ta vanda diaka ve!”

^ par. 8 Kana mbongo ya kibende ya bo ke tubila awa vandaka denari ya bantu ya Roma, mpidina ntalu yango vandaka mbongo yina bo vandaka kufuta bantu ya kisalu kiteso ya 50 000 sambu na kisalu ya bo ya kilumbu mosi. Mbongo ya mingi mpenza!

^ par. 11 Sambu na kuzaba mambu mingi ya me tala Satana mpi bisalu ya bampeve ya mbi, tala kapu 10 ya mukanda Inki Biblia Kelongaka Mpenza? Lomba mukanda yango na Bambangi ya Yehowa to tanga yo na Internet na www.jw.org.