Kwenda na mambu ke na kati

Kwenda na tansi ya malongi

 DISOLO YINA KELE NA LUTITI YA ZULU | KETI SATANA KELE MPENZA?

Keti Satana Kele Mbi Yina Kele na Ntima ya Muntu?

Keti Satana Kele Mbi Yina Kele na Ntima ya Muntu?

Yo kele mpasi ve na kutuba nde Satana yina Biblia ke tubilaka kele mbi yina kele na ntima ya muntu. Keti Biblia ke longaka kibeni mambu yai? Kana mpidina, sambu na nki Biblia ke tubaka nde Satana solulaka ti Yezu Kristu mpi ti Nzambi Nkwa-Ngolo Yonso? Bika beto tadila masolo yango.

NTANGU SATANA SOLULAKA TI YEZU

Ntangu Yezu yantikaka kisalu na yandi na ntoto, Diabulu mekaka Yezu mbala tatu. Ntete, Satana pusaka Yezu na kusadila ngolo yina Nzambi pesaka yandi na mutindu ya mbi sambu na kumanisa nzala yina yandi vandaka ti yo. Na nima, Diabulu pusaka Yezu na kutula luzingu na yandi na kigonsa mpi kubenda dikebi na yandi mosi. Na nsuka, Satana songaka Yezu nde yandi ta pesa Yezu bimfumu yonso ya nsi-ntoto kana Yezu kusambila yandi. Yezu buyaka bampukumuna yai tatu mpi konso ntangu yandi vandaka kusadila Masonuku.—Matayo 4:1-11; Luka 4:1-13.

Yezu vandaka kusolula ti nani? Keti yandi vandaka kusolula ti ngindu mosi ya mbi na ntima na yandi? Biblia ke tuba nde bo mekaka Yezu “na mambu yonso bonso beto mosi, kansi yandi bikalaka kukonda disumu.” (Baebreo 4:15) Biblia ke tuba diaka nde: “Yandi salaka disumu ve, bo monaka mpi ve luvunu na munoko na yandi.” (1 Piere 2:22) Yezu vandaka ya kukuka mpi bikalaka ya kwikama. Yandi bikaka ve nde kikalulu mosi ya mbi kuyela na ntima na yandi. Yo ke pwelele nde Yezu vandaka kusolula ve ti kikalulu mosi ya mbi na ntima na yandi, kansi yandi vandaka kusolula ti muntu mosi ya kieleka.

Disolo yango ke pesa nzikisa ya nkaka ya ke monisa nde Satana kele kigangwa ya kieleka.

  • Kuvila ve nde Diabulu songaka Yezu nde yandi ta pesa Yezu bimfumu yonso ya nsi-ntoto kana Yezu kusambila yandi. (Matayo 4:8, 9) Kana Satana vandaka ve kigangwa ya kieleka, bimfumu yina yandi pesaka Yezu zolaka kuvanda mpi ve ya kieleka. Diaka, Yezu tulaka ve ntembe na kiyeka ya Satana.

  • Ntangu Yezu buyaka bampukumuna yango, Diabulu “bikisaka yandi tii na ntangu ya nkaka ya mbote.” (Luka 4:13) Na dibaku yai, keti Satana ke monana bonso ngindu mosi ya mbi to mbeni mosi ya ngolo?

  • Simba nde “bawanzio kwisaka mpi yantikaka kusadila yandi.” (Matayo 4:11) Keti bawanzio yina pesaka Yezu kikesa mpi lusadisu vandaka bigangwa ya kieleka ya kimpeve? Kana ee. Sambu nki beto fwete kwikila nde Satana kele ngindu ya mbi kansi kigangwa ya kieleka ve?

 NTANGU SATANA SOLULAKA TI NZAMBI

Disolo ya zole ke tadila Yobi, muntu yina vandaka kuwa Nzambi boma. Na disolo yango, Nzambi solulaka ti Diabulu mbala zole. Na mabaku yai zole, Nzambi vandaka kukumisa kwikama ya Yobi. Satana tubaka nde Yobi ke sadilaka Nzambi sambu na bikuma ya bwimi, mpi kusilaka Nzambi nde yandi vandaka kusumba kwikama ya Yobi. Diabulu tubaka diaka nde yandi me zaba Yobi mbote-mbote kuluta Nzambi. Yehowa pesaka Satana nzila ya kubebisa bima ya Yobi, mavimpi na yandi mpi kufwa bana na yandi. * Na nima, yo monanaka pwelele nde mambu yina Yehova tubaka sambu na Yobi vandaka ya kieleka mpi Satana monanaka muntu ya luvunu. Nzambi sakumunaka Yobi sambu na kwikama na yandi.—Yobi 1:6-12; 2:1-7.

Na konso mbala ya Nzambi solulaka ti Satana, keti yandi vandaka kusolula ti ngindu ya mbi na ntima na yandi? Biblia ke tuba nde: ‘Mambu ya Nzambi ke salaka, ya kieleka yo kele mbote mpenza!’ (2 Samuele 22:31) Ndinga ya Nzambi ke tuba diaka nde: “Santu, santu, santu kele Yehowa Nzambi, Nkwa-Ngolo Yonso.” (Kusonga 4:8) Ngogo santu ke tendula bunkete, kima ya me konda disumu. Yehowa kele ya kukuka. Yo ke pwelele nde yandi ke vandaka ve ti ngindu ya mbi ata fioti.

Mambu yina Satana solulaka ti Nzambi natilaka Yobi bampasi

Nkutu, bantu ya nkaka lenda tuba nde Yobi vandaka ve muntu ya kieleka mpi disolo na yandi kele ya luvunu. Keti dibanza yai kele kieleka? Baverse ya nkaka ya Biblia ke monisa nde Yobi vandaka muntu ya kieleka. Mu mbandu, na Yakobo 5:7-11, bo me sadila mbandu ya Yobi sambu na kusiamisa Bakristu na kukanga ntima na bantangu ya mpasi mpi mbandu yango ke yibusa beto nde Yehowa ke sakumunaka bantu yina ke kangaka ntima. Keti mbandu yai zolaka kuvanda ti bupusi kana Yobi vandaka ve muntu ya kieleka mpi kana bampasi yina Satana natilaka yandi vandaka ya luvunu? Diaka, Ezekiele 14:14, 20, ke tanga bazina ya bantu tatu ya lunungu: Noa, Daniele mpi Yobi. Bonso Noa ti Daniele, Yobi vandaka muntu ya kieleka, muntu yina vandaka ti lukwikilu ya ngolo. Kana Yobi vandaka muntu ya kieleka, yo ke monisa nde muntu yina natilaka yandi bampasi vandaka mpi muntu ya kieleka.

Biblia ke monisa pwelele nde Satana kele kigangwa mosi ya kieleka ya kimpeve. Kansi nge lenda kudiyula nde: ‘Keti yandi kele kigonsa sambu na mono mpi sambu na dibuta na mono bubu yai?’

NA NTANGU NA BETO

Yindula nde babandi mingi me kota na kintulumukina na mbanza na beno. Ntembe kele ve nde bantu ta vanda ve na lutaninu mpi bikalulu na bo ta beba. Ntangu yai, baka mbandu ya mutindu mosi: Satana mpi bademo na yandi, bigangwa ya kieleka ya kimpeve, kolamaka na Nzambi mpi bo losaka bo na ntoto. Inki mambu yo me basisaka? Yindula mambu yina ke salama na nsi na beno mpi na ntoto ya mvimba.

  • Keti nge ke mona mutindu mubulu ke kuma mingi ata bantu ke sala bikesa sambu na kumanisa yo?

  • Keti nge ke mona mutindu bansaka mingi me kuma kumonisa bisalu ya bampeve ya mbi ata bibuti ke zola ve bansaka yango?

  • Keti nge ke mona mutindu nziunga ke beba ata bantu ke sala bikesa sambu na kutanina yo?

  • Keti yo ke monana nde diambu mosi ke kwendila ve na nsi-ntoto disongidila ngolo mosi ke nata bantu na bampasi ya nene?

Simba mambu yai ya Biblia ke tuba sambu na muntu yina kele na kisina ya bampasi. Yo ke tuba nde: “Bo losaka dragoni ya nene na nsi, nioka ya ntama, yina bo ke bingaka Diabulu mpi Satana, yina ke kusaka ntoto ya mvimba; bo losaka yandi na ntoto, mpi bo losaka yandi na nsi ti bawanzio na yandi. . . . Kansi mawa na ntoto mpi na nzadi-mungwa, sambu Diabulu me kulumuka kuna na beno, yandi kele ti makasi mingi, sambu yandi me zaba nde yandi kele ti ntangu fioti.” (Kusonga 12:9, 12) Na nima ya kutadila baverse yai, bantu mingi me monaka nde Satana kele kigangwa mosi ya kigonsa ya ke monanaka ve, muntu yina ke nata mavwanga na nsi-ntoto.

Nge lenda kudiyula nde nki kisika mono lenda zwa lutaninu? Kuyula ngiufula yai kele mbi ve. Disolo ya ke landa ta sadisa nge.

^ par. 12 Yehowa kele zina ya Nzambi mutindu Biblia ke monisa yo.