Kwenda na mambu ke na kati

Kwenda na tansi ya malongi

 DISOLO YINA KELE NA LUTITI YA ZULU | KETI LUFWA KELE NSUKA YA MAMBU YONSO?

Mpasi ya Lufwa

Mpasi ya Lufwa

Lufwa kele diambu mosi ya mpasi mingi. Bantu mingi ke zolaka ve kutubila yo. Kansi, nsuka-nsuka yo fwete kumina beto. Mpi mpasi ya lufwa ke vandaka ngolo mpi ke tatikaka mingi.

Ata kima mosi ve lenda sala nde beto vanda ya kuyilama sambu na lufwa ya kibuti, ya nkwelani to ya mwana. Mpasi yango lenda bwila beto na kintulumukina to mbala na mbala. Kansi, beto lenda tina ve mpasi ya lufwa mpi nsuka-nsuka yo lenda yangisa beto mingi.

Antonio, yina tata na yandi fwaka na kisumbula ya kamio ke tuba nde: “Yo kele bonso nde muntu mosi me kanga nzo na nge mpi me kwenda ti bansapi. Nge lenda kota ve, ata sambu na ntangu fioti. Nge me kuma kaka kuyindula nzo yango. Yo kele diambu mosi ya nge me kutanaka ntete ve ti yo. Ata nge ke ndima yo ve—sambu yo ke monana kukonda lunungu—nge lenda sala mpi ve ata kima mosi.”

Ntangu Dorothy kumaka mufwidi ti bamvula 47, yandi kutanaka ti diambu ya mutindu yai, mpi yandi bakaka lukanu ya kusosa bamvutu. Ata yandi vandaka kulonga bana malongi ya dibundu konso Lumingu, yandi yindulaka ve nde lufwa kele nsuka ya mambu yonso. Kansi yandi zabaka ve mambu ya ke salamaka na nima ya lufwa. Yandi yulaka pastere mosi ya Anglican nde: “Inki ke kuminaka beto kana beto me fwa?” Pastere pesaka yandi mvutu nde: “Ata muntu mosi ve ke zabaka mpenza, beto fwete vingila kaka.”

Keti beto fwete “vingila kaka?” Keti kele ti diambu yina lenda ndimisa beto kana lufwa kele nsuka ya mambu yonso?