Kwenda na mambu ke na kati

Kwenda na tansi ya malongi

 LONGA BANA NA NGE

Nzambi Lenda Wa Mpasi na Ntima​—Mutindu Beto Lenda Sepedisa Yandi

Nzambi Lenda Wa Mpasi na Ntima​—Mutindu Beto Lenda Sepedisa Yandi

Keti nge me waka ntete ve mpasi mingi mpi kudila? * Ntembe kele ve nde yo me kuminaka beto yonso. Kansi, na bantangu ya nkaka, beto lenda dila sambu beto kele na mawa. Muntu mosi lenda tuba mambu ya mbi mpi ya luvunu sambu na beto. Yo lenda pesa beto mpasi na ntima, mpidina ve?—Nzambi mpi lenda wa mpasi na ntima ntangu bantu ke tuba mambu ya luvunu sambu na yandi. Bika beto tadila ntete diambu yango mpi kumona mutindu beto lenda sepedisa Nzambi na kisika ya kupesa yandi mpasi.

Biblia ke tuba nde bantu ya nkaka yina vandaka kutuba nde bo ke zolaka Nzambi vandaka ‘kupesa yandi mpasi na ntima.’ Ya kieleka, ‘bo vandaka kupesa Nzambi mpasi’! Ntembe kele ve nde, ata muntu mosi ve lenda pesa nitu ya Yehowa mpasi. Yandi kele Nkwa-Ngolo Yonso. Yo yina, bika beto tadila kikuma yina Yehowa ke waka mpasi na ntima ntangu beto ke lemfukilaka yandi ve.

Bantu zole ya ntete yina Yehowa gangaka na ntoto pesaka yandi mpasi mingi na ntima. Yandi tulaka bantu yina awa na ntoto na paladisu yina bo vandaka kubinga ‘kilanga ya Edeni.’ Bantu yina zole vandaka banani?—Adami, mpi na nima ya mwa ntangu, Eva. Bika beto tadila diambu yina bo salaka ya kupesaka Yehowa mpasi na ntima.

Na nima ya kutula bo na kilanga yina, Yehowa zabisaka bo na kutanina yo. Yandi songaka bo mpi nde bo lendaka kubuta bana mpi kuzinga kumosi na kilanga yina kukonda kufwa. Kansi na ntwala nde Adami mpi Eva kubuta, diambu mosi ya mbi kibeni salamaka. Keti nge ke zaba diambu yina?—Wanzio mosi pusaka Eva mpi Adami na kukolama na Yehowa. Beto tala mutindu yo salamaka.

Wanzio salaka nde nioka kumonana bonso nde yo ke tuba. Eva sepelaka na mambu yina yandi waka ​—nioka zabisaka yandi nde yandi ta kuma ‘bonso Nzambi.’ Yo yina, yandi salaka diambu yina nioka zabisaka yandi. Keti nge me zaba diambu yina yandi salaka?

Eva diaka mbuma ya nti yina Yehowa zabisaka Adami nde bo fwete dia ve. Na ntwala nde Nzambi kuganga Eva, yandi zabisaka Adami nde: ‘Nge lenda dia mbuma ya konso nti ya kilanga mutindu nge me zola. Kansi nge fwete dia ve bambuma ya nti ya kuzaba mambu ya mbote ti ya mbi. Kilumbu nge ta dia yo, kilumbu yo yina nge ta fwa.’

Eva zabaka nsiku yina. Kansi, yandi landaka kutala nti yina, mpi monaka nde ‘yo vandaka kima mosi ya kitoko sambu na meso. Yandi bakaka mbuma na yo mpi diaka.’ Na nima yandi pesaka Adami mbuma yina mpi ‘yandi diaka yo.’ Nge ke yindula nde sambu na nki Adami salaka mpidina?—Sambu yandi kumaka kuzola Eva mingi kuluta Yehowa. Yandi ponaka kusepedisa nkento na yandi na kisika ya kusepedisa Nzambi. Kulemfukila Yehowa kele mfunu mingi kuluta kulemfukila konso muntu ya nkaka!

Keti nge ke yibuka diaka nioka yina tubaka na Eva? Kaka mutindu muntu lenda sala nde kiteki kumonana bonso nde yo ke tuba, muntu mosi salaka nde nioka yina kumonana bonso nde yo ke tuba. Ndinga ya nani vandaka kubasika na kati ya nioka?—Yo vandaka ndinga ya “nioka ya ntama, yina bo ke bingaka Diabulu mpi Satana.”

Keti nge ke zaba mutindu nge lenda sepedisa Yehowa?—Nge lenda sala yo kana nge ke sala bikesa ntangu yonso na kulemfukila yandi. Satana ke tubaka nde yandi lenda pusa muntu yonso na kusala mambu yina yandi ke zola. Yo yina, Yehowa ke longisila beto nde: ‘Mwana na mono, vanda mayele, mpi sepedisa ntima na mono; mpidina konso muntu yina ta sosila mono, mono ta zaba kupesa yandi mvutu.’ Satana ke vwezaka to ke sosilaka Yehowa. Yandi ke tubaka nde yandi lenda pusa muntu yonso na kuyambula kusadila Yehowa. Yo yina, lemfukilaka Yehowa mpi sadilaka yandi sambu na kusepedisa yandi! Keti nge ta sala yonso sambu na kusala yo?

^ par. 3 Kana nge ke tanga ti mwana-fioti, kidimbu yai:—ya kele na nima ya ngiufula, ke yibusa nde, beno fwete pema mpi kusiamisa mwana na kupesa dibanza na yandi.