Kwenda na mambu ke na kati

Kwenda na tansi ya malongi

 BIBLIA KE SOBAKA LUZINGU YA BANTU

“Mono Yantikaka Kudiyula Kana Luzingu na Mono Vandaka Kukwenda na Wapi”

“Mono Yantikaka Kudiyula Kana Luzingu na Mono Vandaka Kukwenda na Wapi”
  • MVULA YINA YANDI BUTUKAKA: 1941

  • INSI: AUSTRALIE

  • LUZINGU NA YANDI YA NTAMA: KUNWA MAKAYA, KULAUKA MALAFU

MUTINDU MONO VANDAKA:

Mono yelaka na Warialda, mbanza mosi ya fioti na insi Nouvelle-Galles du Sud. Bantu ya mbanza yina ke sansaka mameme, bangombe mpi ke salaka bilanga. Mbanza yango kele bunkete, mpi mubulu kele ve mingi.

Sambu mono kele mwana ya ntete na dibuta ya bana 10, mono yantikaka kusala sambu na kusadisa dibuta na beto ntangu mono kumaka ti bamvula 13. Sambu mono longukaka mingi ve, mono vandaka kusala na ferme. Ntangu mono kumaka ti bamvula 15, mono kumaka kusansa bangombe mpi bampunda ya mfinda sambu yo yikana ti bantu.

Kusala na ferme vandaka mbote mpi mbi. Yo vandaka mbote sambu mono vandaka kusepela ti kisalu na mono mpi kisika yina. Na mpimpa mono vandaka kufonga na lweka ya tiya mpi kutala ngonda ti bambwetete ntangu mupepe ya nkokila vandaka kubula mpi kunata nsudi ya kitoko ya banti yina vandaka na nziunga. Mono ke yibuka mutindu mono vandaka kuditubila nde, yo fwete vanda ti Muntu mosi yina me gangaka bima yai yonso ya kitoko. Yo vandaka mbi sambu mono kumaka kulanda bifu ya mbi yina vandaka na ferme. Mbala mingi, mono vandaka kuwa bantu ke fingana, mpi mono kumaka kunwa makaya. Kukonda kusukinina, kufinga mpi kunwa makaya kumaka kitini ya luzingu na mono.

Ntangu mono kumaka ti bamvula 18, mono kwendaka na Sydney. Mono sosaka kukota na kisalu ya kisoda kansi bo buyaka mono sambu mono longukaka mingi ve. Mono bakaka kisalu na Sydney mpi zingaka kuna mvula mosi. Yo kele ntangu yina mono solulaka ti Bambangi ya Yehowa sambu na mbala ya ntete. Ntangu bo bingisaka mono na balukutakanu na bo, mono ndimaka, mpi kukonda kusukinina mono bakisaka nde malongi na bo vandaka ya kieleka.

Kansi ntangu fioti na nima, mono bakaka lukanu ya kuvutuka na bwala. Mono kumaka kuzinga na mbanza Goondiwindi, na Queensland. Mono zwaka kisalu, kwelaka, mpi diambu ya mawa mono yantikaka mpi kunwa malafu.

 Beto butaka bana zole. Na nima ya kubutuka ya bana na beto ya babakala, mono yantikaka kudiyula kana luzingu na mono vandaka kukwenda na wapi. Mono yibukaka mambu yina mono waka na lukutakanu ya Bambangi ya Yehowa na Sydney, mpi mono bakaka lukanu ya kusala diambu mosi sambu na yo.

Mono monaka Nzozulu ya Nkengi mosi ya ntama, yina vandaka ti adresi ya filiale ya Bambangi ya Yehowa ya Australie. Mono tindaka mukanda sambu na kulomba bo na kulonguka Biblia. Yo yina, Mbangi mosi ya ntima mawete kwisaka kutala mono. Kukonda kusukinina, yandi yantikaka kulonguka Biblia ti mono.

MUTINDU BIBLIA SOBAKA LUZINGU NA MONO:

Ntangu mono vandaka kulonguka Biblia, mono bakisaka nde mono fwete sala bansoba ya nene na luzingu na mono. Verse mosi yina simbaka ntima na mono kele 2 Bakorinto 7:1. Verse yango ke siamisa beto na kukatula “na nitu na beto mvindu yonso ya kinsuni.”

Mono bakaka lukanu ya kuyambula kunwa makaya mpi kulauka malafu. Yo vandaka pete ve na kusala bansoba yina, sambu bifu yai kumaka kitini ya luzingu na mono. Kansi lukanu na mono vandaka ya kuvanda ti luzingu yina ke sepedisaka Nzambi. Baroma 12:2 sadisaka mono mingi kibeni, yo ke tubaka nde: “Beno yambula kulanda ngidika yai ya bima, kansi beno soba kimuntu na beno mpi beno kumisa mabanza na beno ya mpa.” Mono monaka nde sambu na kuyambula bifu na mono, mono fwete soba mabanza na mono mpi kutadila bifu na mono mutindu Nzambi ke monaka yo​—nde yo kele mbi. Ti lusadisu na yandi, mono yambulaka kunwa makaya mpi kulauka malafu.

Kansi, kuyambula kufinga vandaka diambu ya kuluta mpasi. Mono zabaka ndongisila ya Biblia yina kele na Baefezo 4:29 ya ke tubaka nde: “Bika nde ata ngogo mosi ve ya kupola kubasika na munoko na beno.” Ata mpidina, mono sobaka ve ntubilu na mono mbala mosi. Mono bakaka lusadisu na kuyindululaka na bangogo yina kele na Yezaya 40:26. Sambu na bambwetete yina kele na zulu, verse yina ke tuba nde: ‘Beno tala na zulu! Nani salaka bambwetete yai yonso? Muntu yina ke tambusaka yo na bandonga bonso basoda, yandi muntu salaka yo yonso. Yandi ke zaba yo yonso, ke bingaka yo na bazina na yo! Ngolo na yandi ti kimfumu na yandi kele nene mpenza.’ Mono tubaka nde, kana Nzambi kele ti ngolo ya kuganga luyalanganu yai ya nene​—ya mono ke zolaka mingi kutala—​ntembe kele ve nde, yandi lenda pesa mono ngolo ya kusala bansoba sambu na kusepedisa yandi. Bisambu mpi bikesa ya mingi sadisaka mono na kuyambula malembe-malembe ntubilu na mono.

MAMBOTE YA MONO ME BAKAKA:

Sambu mono vandaka kusansa bangombe, mono vandaka ve ti mabaku mingi ya kusolula ti bantu sambu bantu vandaka fioti na baferme yina. Ata mpidina, formasio yina mono bakaka na balukutakanu ya Bambangi ya Yehowa sadisaka mono na kuzaba mutindu ya kusolula. Diaka, formasio yina sadisaka mono na kuzabisa bankaka nsangu ya mbote ya Kimfumu ya Nzambi.​—Matayo 6:9, 10; 24:14.

Bamvula mingi me luta ntangu yai mpi mono ke vandaka na kiese ya kusala bonso nkuluntu na dibundu. Mono ke monaka nde yo kele lukumu na kusala yonso yina mono lenda sala sambu na kusadisa bampangi na mono Bakristu. Kansi, kusadila Yehowa kumosi ti nkento na mono ya kwikama mpi ya zola, tanga mpi bana na beto ya kitoko kele lusakumunu ya nene yina mono me bakaka.

Mono ke tondaka Yehowa na mutindu yandi me pesaka mono​—muntu yina me longukaka mingi ve—​nzila ya kulongama na yandi. (Yezaya 54:13) Mono ke ndimaka kibeni bangogo yina kele na Bingana 10:22 ya ke tubaka nde: ‘Lusakumunu ya Yehowa​—ke kumisaka muntu mvwama.’ Mono ti dibuta na mono ke vingila ntangu yina beto ta longuka mambu mingi ya me tala Yehowa mpi ta sadila yandi kimakulu.

“Mono monaka nde sambu na kuyambula bifu na mono, mono fwete soba mabanza na mono”