Estelle, * kele mama mosi ya ke kwendaka na nzo-nzambi mbala na mbala ti bana na yandi mingi. Yandi ke tuba nde: “Mono songaka pastere nde mono ke zola kulonguka Biblia.” Kansi, pastere lombaka yandi ve ata kilumbu mosi na kulonguka Biblia. Nsuka-nsuka, yandi yambulaka kukwenda na nzo-nzambi. Yandi ke landa kutuba nde: “Mfumu ya dibundu yina ke tadilaka mambu ya mbongo, sonikaka nde, kana mono me kwisa ve, beno tinda kaka mbongo. Mono tubaka nde: ‘Bo ke kudiyangisa ve kana mono ta kwisa to ve; bo kele kaka na mfunu ya mbongo na mono.’”

Angelina, yina kudipesaka na mambu ya lusambu, ke tuba nde: “Na nzo-nzambi na mono, bo ke lutisaka kitunga ya makabu mbala tatu na konso lusambu, mpi beto fwete pesa na konso ntangu. Ntangu yonso, bo ke lombaka mbongo. Mono kuditubilaka nde: ‘Nzambi kele ve na kati ya bantu yai.’”

Keti mabundu ya nziunga na nge ke sadilaka mitindu ya pwelele to ya kubumbana sambu na kubaka mbongo? Keti yo ke wakana ti Biblia?

Yezu, yina yantikisaka dibundu ya Bukristu tubaka nde: “Beno me baka ya ofele, beno pesa mpi ya ofele.” (Matayo 10:8) Bo lenda teka ve nsangu ya mfunu ya Biblia mpi muntu yonso yina kele na mfunu na yo fwete wa yo.

Bakristu ya mvu-nkama ya ntete vandaka kusala inki sambu na kulungisa badepanse ya dibundu?

Konso muntu vandaka kupesa “kaka mutindu yandi me kana na ntima na yandi, ti kubokuta ve to sambu bo ke pusa yandi, sambu Nzambi ke zolaka muntu yina ke pesaka na kiese.” (2 Bakorinto 9:7) Ntumwa Polo tubaka nde: “Beto salaka mpimpa ti mwini sambu beto vanda ve kizitu ya nene ata na muntu mosi na kati na beno ntangu beto vandaka kuzabisa beno nsangu ya mbote ya Nzambi.” (1 Batesalonika 2:9) Polo vandaka kutunga batenta sambu yo sadisa yandi na kisalu ya kusamuna.​—Bisalu 18:2, 3.

Mbala mingi, Bambangi ya Yehowa ke vukanaka na banzo ya kukonda mindondo ya bo ke bingaka Banzo ya Kimfumu. Inki mutindu bo ke lungisaka badepanse na bo? Bo ke lutisaka ve bitunga, bo ke tindaka mpi ve ba amvelope sambu na kulomba makabu. Kansi, muntu yonso yina ke sepela na manaka ya kimpeve lenda tula na kinsweki mbongo na bakesi ya makabu na Nzo ya Kimfumu.

Ya kieleka, yo ke lombaka mbongo sambu na kuniema zulunalu yai mpi kutinda yo na mabundu. Ata mpidina, nge ta mona ve piblisite mosi ya ke tubila kusumba to kulomba mbongo. Bambangi ke tulaka dikebi na kuzabisa kieleka ya Biblia.

Inki nge ke yindula: Keti kulungisa badepanse mutindu yai ke wakana ti bangogo ya Yezu mpi mbandu ya Bakristu ya mvu-nkama ya ntete?