Kwenda na mambu ke na kati

Kwenda na tansi ya malongi

Sadila Yehowa na “Bilumbu ya Mpasi”

Sadila Yehowa na “Bilumbu ya Mpasi”

ERNST yina kele na bamvula 70 ti ndambu ke tuba nde: “Kimbefo na mono ke landa kaka kukuma ngolo.” Bantu mingi ke tubaka bangogo yai. Kana nge ke kuma mbuta mpi ke kudiwa nde mavimpi na nge ke beba mpi ngolo na nge ke mana, nge ta kuma kundima mambu yina Kapu 12 ya mukanda ya Longi ke tubaka. Verse na yo ya ntete ke binga bamvula ya kinunu “bilumbu ya mpasi.” Ata mpidina, yo ke tendula ve nde bilumbu yonso mununu ta belaka kaka. Yo yina, ata muntu me kuma mununu yandi lenda sadila mpi Yehowa na kiese yonso.

LANDA NA KUVANDA TI LUKWIKILU YA NGOLO

Bampangi ya minunu, beno kele ve bantu ya ntete yina ke kutana ti bampasi ya mutindu yai. Bansadi ya Yehowa ya nkaka ya minunu yina Biblia ke tubilaka kutanaka mpi ti bampasi ya mutindu yai. Mu mbandu, Izaki, Yakobi mpi Ahiya vandaka kumona diaka ve. (Kuy. 27:1; 48:10; 1 Bant. 14:4) Sara tubaka nde: “Mono me nuna.” (Kuy. 18:11, 12) Ntotila Davidi ‘vandaka diaka ve kuwa tiya.’ (1 Bant. 1:1) Barzilai yina vandaka mvwama, vandaka kuwa diaka ve ntomo ya madia to kusepela na miziki. (2 Sam. 19:33-36) Abrahami ti Naomi vandaka na mpasi sambu bo fwilaka bankwelani na bo.Kuy. 23:1, 2; Ruti 1:3, 12.

Inki sadisaka bantu yai na kubikala ya kwikama na Yehowa mpi kutanina kiese na bo? Ntangu Abrahami kumaka mununu, yandi tulaka kivuvu na lusilu ya Nzambi mpi “lukwikilu na yandi kumisaka yandi ngolo.” (Bar. 4:19, 20) Beto mpi fwete vanda ti lukwikilu ya ngolo. Kuvanda ti lukwikilu ya ngolo ke tadila ve bamvula mpi makuki na beto to mambu ya nkaka. Mu mbandu, ata ntangu Yakobi kumaka kubela, kumona diaka ve, mpi kumaka kaka kulala na mbeto, yandi landaka kumonisa lukwikilu ya ngolo na balusilu ya Nzambi. (Kuy. 48:1-4, 10; Baeb. 11:21) Bubu yai, Ines yina kele na bamvula 93 ke belaka maladi ya misuni. Ata mpidina yandi ke tuba nde: “Yehowa ke sakumunaka mono konso kilumbu. Konso kilumbu mono ke yindulaka paladisu. Yo ke pesaka mono kivuvu.” Yai kele mpeve ya mbote kibeni!

Bisambu, kutanga Ndinga ya Nzambi, mpi balukutakanu ya Bukristu ke kumisaka lukwikilu na beto ngolo. Ntangu profete Daniele kumaka mununu, yandi vandaka kusamba mbala tatu na kilumbu mpi vandaka kulonguka Ndinga ya Nzambi mbala na mbala. (Dan. 6:10; 9:2) Ana, mufwidi mosi ya mununu “vandaka kukonda ve na tempelo ata fioti.” (Luka 2:36, 37) Kana nitu ke pesa nge nzila ya kukwenda na balukutakanu mpi kuna nge ke pesa bamvutu na kutadila makuki na nge, nge ta baka kikesa mpi ta pesa bampangi ya nkaka kikesa. Diaka, ntangu yonso Yehowa ke sepelaka ti bisambu na nge ata nge kele ve ti ngolo ya kusadila yandi mambu ya nkaka.Bing. 15:8.

Beno pesana kikesa

Bampangi ya nkaka ya kwikama ya minunu lenda vanda ti makuki ya kumona, kutanga mpi kukwenda na balukutakanu, kansi ziku nge kele ve ti makuki yina mpi mbala ya nkaka nge ta kuka ve kusala mambu yina bo ke salaka. Inki nge lenda sala? Sala mambu yina nge lenda sala. Minunu mingi yina kele ve ti ngolo ya kukwenda na balukutakanu ke widikilaka yo na telefone. Ata Inge yina kele ti bamvula 79 ke monaka diaka mbote ve, yandi ke lombaka mpangi mosi na dibundu na kubasisila yandi mikanda na bisono ya nene na ordinatere sambu yandi yidika balukutakanu.

Ziku nge ke vandaka ti ntangu ya kufwana. Nge lenda widikila lutangu ya Biblia, ya mikanda ya nkaka, badiskure mpi badrame na bande kaseti. Diaka, nge lenda sadila telefone sambu na kubinga bampangi ya nkaka mpi kusolula ti bo mambu ya nkaka ya kimpeve sambu na ‘kupesana kikesa.’Bar. 1:11, 12.

LANDA NA KUSADILA NZAMBI NA KIKESA YONSO

Longa Ndinga ya Nzambi

Christa yina kele ti bamvula 85 ke tuba nde: “Kuvidisa kikesa yina nge vandaka na yo ke salaka mpasi.” Inki mutindu bampangi ya minunu lenda tanina kiese na bo? Peter yina kele ti bamvula 75 ke tuba nde: “Tadila luzingu na nge na mutindu ya mbote, kuyindula ve ntangu yonso mambu yina nge lenda  kuka diaka ve kusala, kansi yindula mambu yina nge lenda sala.”

Keti nge lenda yindula mabaku ya kuta kimbangi yina nge kele na yo? Heidi ke kukaka diaka ve kusamuna nzo na nzo. Ata yandi me kumaka ti bamvula 80 ti ndambu, yandi ke longukaka kusadila ordinatere sambu na kukuma kusonikila bantu mikanda. Bansamuni ya nkaka ya minunu ke yantikaka kusolula ti bantu masolo ya Biblia na bisika bonsobaparke to na bisika yina bantu ke vingilaka kamio. Diaka, kana nge ke zingaka na banzo yina bo ke sansaka minunu, nge lenda kumisa yo “teritware” na nge sambu na kusamuna na minganga yina ke sansa nge mpi bantu ya nkaka yina kele kuna.

Vanda ti kikalulu ya kuyamba bantu

Ntangu Ntotila Davidi kumaka na bamvula ya nsuka ya luzingu na yandi, yandi pesaka maboko mingi na lusambu ya kieleka. Yandi pesaka makabu mpi bakaka bangidika sambu na kisalu ya kutunga tempelo. (1 Bans. 28:11–29:5) Nge mpi lenda monisa mpusa ya ngolo ya kupesa maboko na kiteso ya ngolo na nge na kisalu ya Kimfumu yina ke salama na ntoto ya mvimba. Nge lenda sadisa bapasudi-nzila to bansamuni ya nkaka ya kikesa ya dibundu na beno, na bangogo na nge ya ke pesa bo kikesa, na dikabu mosi ya fioti, to kubingisa bo na kudia ti nge. Nge lenda samba mpi sambu na batoko, mabuta, bansadi ya ntangu yonso, bambefo, mpi bampangi yina kele ti mikumba.

Zaba nde nge ti kisalu yina nge ke salaka kele na mbalu mingi. Bampangi ya minunu, Tata na beto ya zulu ta yambula beno ve ata fioti. (Nk. 71:9) Yehowa ke zolaka beno mpi ke bakaka beno na mbalu. Kubika fioti, beto yonso ta niokwama diaka ve na bampasi yina kinunu ke natilaka bantu. Beto ta vanda ngolo mingi, na mavimpi ya kukuka mpi beto ta landa na kusadila Yehowa Nzambi na beto ya zola mvula na mvula!

Beto me soba bazina ya nkaka